ନୂଆଦିଲ୍ଲୀ: ରାଜ୍ୟସଭାରେ କେନ୍ଦ୍ର ସଂସଦୀୟ ବ୍ୟାପାର ମନ୍ତ୍ରୀ ତଥା ସଂଖ୍ୟାଲଘୁ ବ୍ୟାପାର ମନ୍ତ୍ରୀ କିରଣ ରିଜୁଜି ବିବାଦୀୟ ୱାକଫ ସଂଶୋଧିତ ବିଲ୍ ୨୦୨୫ କୁ ଉପସ୍ଥାପନ କରିଛନ୍ତି । ସଂଶୋଧିତ ବିଧେୟକୁ ବିରୋଧ କରିଛି ବିଜୁ ଜନତା ଦଳ । ଗୃହରେ ଆଲୋଚନାରେ ଅଂଶ ଗ୍ରହଣ କରି ବିଲ ବିରୋଧରେ କହିଛନ୍ତି ବିଜେଡ଼ି ରାଜ୍ୟସଭା ସାଂସଦ ମୁଜିବୁଲ୍ଲା ଖାଁ ଓରଫ୍ ମୁନା ଖାଁ । 

ମୁନା ଖାଁ ରାଜ୍ୟସଭାରେ ୱାକଫ ବିଲ ଆଲୋଚନାରେ ଭାଗ ନେଇ ୱକ୍‌ଫ ସମ୍ପତ୍ତି ସୁରକ୍ଷିତ ରହିବା ନେଇ ମନ୍ତ୍ରୀ ସ୍ପଷ୍ଟ କରନ୍ତୁ ବୋଲି ଦାବି କରିଛନ୍ତି । ୱାକଫରେ ଦଣ୍ଡ ବିଧାନ ବ୍ୟବସ୍ଥାକୁ ସେ ବିରୋଧ କରିଛନ୍ତି । ସେହିପରି ମୁସଲମାନ ବୋଲି ନିଜର ପ୍ରମାଣ ଦେବାର ଯେଉଁ ପ୍ରାବଧାନ ରଖାଯାଇଛି ତାହାକୁ ସେ ବିରୋଧ କରିଛନ୍ତି, ଜଣେ ମୁସଲମାନ ବୋଲି ୫ ବର୍ଷରେ କେମିତି ନିଜକୁ ପ୍ରମାଣ କରିପାରିବ । ତାହାକୁ ହଟାଇବାକୁ ସେ କହିଛନ୍ତି । ସରକାର କହୁଛନ୍ତି ଗରିବ ମୁସଲମାନ ଲାଭବାନ ହେବେ, ଯଦି ତାହା ସତ ହୁଏ ତାହା ଏ ଦେଶର ସମସ୍ତ ଗରିବ ମୁସଲମାନ ଆପଣଙ୍କ ନିକଟରେ କୃତଜ୍ଞ ହୋଇ ରହିବେ । କିନ୍ତୁ ସରକାର ସୁନିଶ୍ଚିତ କରନ୍ତୁ ଯେ ୱାକଫ ଜମି ଯେମିତି ଅନ୍ୟ କୌଣସି ମୁସଲମାନଙ୍କ ନିକଟକୁ ନ ଯାଏ । 

ଅନ୍ୟପକ୍ଷରେ ବିଜେଡ଼ି ସାଂସଦ ସସ୍ମିତ ପାତ୍ର ମଧ୍ୟ ବିଲକୁ ବିରୋଧ କରୁଥିବା ଦେଖାଯାଇଛି । ସେ ଏକ ଗଣମାଧ୍ୟମକୁ ପ୍ରତିକ୍ରିୟା ଦେଇଛନ୍ତି ଯେ  ଦଳର ସୁପ୍ରିମୋ ନବୀନ ପଟ୍ଟନାୟକ ସ୍ପଷ୍ଟ କରିଛନ୍ତି କି ୱାକଫ ଆମ ସପକ୍ଷରେ ନାହିଁ । ସଂଖ୍ୟାଲଘୁଙ୍କ ସପକ୍ଷରେ ନାହିଁ । ଏଥିରେ କିଛି ପ୍ରାବଧାନ ରହିଛି ତାହା ଠିକ୍ ନୁହେଁ । ତେଣୁ ବିଜୁ ଜନତା ଦଳ ୱାକଫ ବିଲକୁ ସମର୍ଥନ ଜଣାଇବାର କୌଣସି ପ୍ରଶ୍ନ ଉଠୁ ନାହିଁ ।   

ଏଠାରେ ଉଲ୍ଲେଖ ଯୋଗ୍ୟ, ଗତ ଦୁଇ ସପ୍ତାହ ପୂର୍ବରୁ ମଧ୍ୟ ଏମ କେ ଷ୍ଟାଲିନ ଡାକିଥିବା ଡିଲିମିଟେସନ ବୈଠକରେ ଯୋଗ ଦେଇଥିଲା ବିଜେଡ଼ି । ଦଳ ଦୁଇ ନେତା ସଂଜୟ ଦାସ ବର୍ମା ଏବଂ ଅମର ପଟ୍ଟାନାୟକ ଚେନ୍ନାଇରେ ଷ୍ଟାଲିନଙ୍କ ବୈଠକରେ ଯୋଗ ଦେଇଥିଲେ । ଏହା ପରେ ୱାକଫକୁ ମଧ୍ୟ ବିରୋଧ କରୁଛି । ତେଣୁ ଏଥିରୁ ସ୍ପଷ୍ଟ ବାରି ହୋଇ ପଡ଼ୁଛି ଯେ ଦଳ ଓଡ଼ିଶା ବିଧାନସଭା ନିର୍ବାଚନ ହାରିବା ପରେ ବିରୋଧୀର ଭୂମିକା ଗ୍ରହଣ ସହିତ  ଏନଡିଏ ବିରୋଧୀ ମଧ୍ୟ ହୋଇଯାଇଛି ।