ନୂଆଦିଲ୍ଲୀ: ରାଜ୍ୟ ବିଜୁ ଜନତା ଦଳର ଘଡ଼ିକେ ଘୋଡ଼ା ଛୁଟୁଛି । କେତେବେଳେ ହଁ କହୁଛି, ତ କେତେବେଳେ ହଁ କହୁଛି ବିଜେଡ଼ି । ପ୍ରଥମେ କେନ୍ଦ୍ର ସରକାର ଆଣିଥିବା ୱାକଫ ସଂଶୋଧନ ବିଧେୟକୁ ବିରୋଧ କରିବା ପରେ ଏବେ ଭୋଟ ଦେବାର ସଙ୍କେତ ଦେଇଛି ବିଜେଡ଼ି । ଦଳୀୟ ସାଂସଦ ଡାକ୍ତର ସସ୍ମିତ ପାତ୍ରଙ୍କ ଏକ୍ସ ଆକାଉଣ୍ଟ ପୋଷ୍ଟକୁ ନେଇ ରାଜନୈତିକ ଆଲୋଚନା ତେଜିଛି । 

ସସ୍ମିତ ପାତ୍ର ପୋଷ୍ଟରେ ଲେଖିଛନ୍ତି ଯେ ବିଜୁ ଜନତା ଦଳ ସର୍ବଦା ଧର୍ମନିରପେକ୍ଷତା ଏବଂ ଅନ୍ତର୍ଭୁକ୍ତିର ନୀତିକୁ ବଜାୟ ରଖିଆସିଛି, ସମସ୍ତ ସମ୍ପ୍ରଦାୟର ଅଧିକାରକୁ ସୁନିଶ୍ଚିତ କରିଛି । ୱାକଫ (ସଂଶୋଧନ) ବିଲ୍, ୨୦୨୪  ସମ୍ପର୍କରେ ସଂଖ୍ୟାଲଘୁ ସମ୍ପ୍ରଦାୟର ବିଭିନ୍ନ ବର୍ଗ ଦ୍ୱାରା ପ୍ରକାଶିତ ବିବିଧ ଭାବନାକୁ ଆମେ ଗଭୀର ଭାବରେ ସମ୍ମାନ କରୁ । ଏହି ମତାମତଗୁଡ଼ିକୁ ସାବଧାନତାର ସହ ବିଚାର କରି, ବିଲ୍ ଭୋଟିଂ ପାଇଁ ଆସିଲେ ବିବେକ ଅନୁସାରେ ସଦଭାବନା ଏବଂ ସମସ୍ତ ସମ୍ପ୍ରଦାୟର ଅଧିକାରର ସର୍ବୋତ୍ତମ ସ୍ୱାର୍ଥରେ ରାଜ୍ୟସଭାରେ ଭୋଟ ଦେବାର ଅଧିକାର ସଦସ୍ୟମାନଙ୍କୁ ପ୍ରଦାନ କରାଯାଇଛି । ଏ ନେଇ  କୌଣସି ଦଳୀୟ ହ୍ୱିପ୍ ଜାରି ହୋଇ ନାହିଁ ବୋଲି ସସ୍ମିତ କହିଛନ୍ତି ।  

ଏହା ପୂର୍ବରୁ ବିଜେଡ଼ି ସାଂସଦ ମୁନ୍ନା ଖାଁ ରାଜ୍ୟସଭାରେ ବିଲକୁ କଡ଼ା ବିରୋଧ କରିଥିଲେ ଏବଂ କହିଥିଲେ ସେ ବିଲକୁ ବିରୋଧ କରିବାକୁ ହିଁ ଛିଡ଼ା ହୋଇଛନ୍ତି । ନେଇ ୱକ୍‌ଫ ସମ୍ପତ୍ତି ସୁରକ୍ଷିତ ରହିବା ନେଇ ମନ୍ତ୍ରୀ ସ୍ପଷ୍ଟ କରନ୍ତୁ ବୋଲି ଦାବି କରିଛନ୍ତି । ୱାକଫରେ ଦଣ୍ଡ ବିଧାନ ବ୍ୟବସ୍ଥାକୁ ସେ ବିରୋଧ କରିଛନ୍ତି । ସେହିପରି ମୁସଲମାନ ବୋଲି ନିଜର ପ୍ରମାଣ ଦେବାର ଯେଉଁ ପ୍ରାବଧାନ ରଖାଯାଇଛି ତାହାକୁ ସେ ବିରୋଧ କରିଛନ୍ତି, ଜଣେ ମୁସଲମାନ ବୋଲି 5 ବର୍ଷରେ କେମିତି ନିଜକୁ ପ୍ରମାଣ କରିପାରିବ । ତାହାକୁ ହଟାଇବାକୁ ସେ କହିଛନ୍ତି । ସରକାର କହୁଛନ୍ତି ଗରିବ ମୁସଲମାନ ଲାଭବାନ ହେବେ, ଯଦି ତାହା ସତ ହୁଏ ତାହା ଏ ଦେଶର ସମସ୍ତ ଗରିବ ମୁସଲମାନ ଆପଣଙ୍କ ନିକଟରେ କୃତଜ୍ଞ ହୋଇ ରହିବେ । କିନ୍ତୁ ସରକାର ସୁନିଶ୍ଚିତ କରନ୍ତୁ ଯେ ୱାକଫ ଜମି ଯେମିତି ଅନ୍ୟ କୌଣସି ମୁସଲମାନଙ୍କ ନିକଟକୁ ନ ଯାଏ । 

ସେହିପରି ଗତ ମଙ୍ଗଳବାର ଦିନ ସସ୍ମିତ ପାତ୍ର କହିଥିଲେ ଯେ ଦଳର ସୁପ୍ରିମୋ ନବୀନ ପଟ୍ଟନାୟକ ସ୍ପଷ୍ଟ କରିଛନ୍ତି କି ୱାକଫ ଆମ ସପକ୍ଷରେ ନାହିଁ । ସଂଖ୍ୟାଲଘୁଙ୍କ ସପକ୍ଷରେ ନାହିଁ । ଏଥିରେ କିଛି ପ୍ରାବଧାନ ରହିଛି ତାହା ଠିକ୍ ନୁହେଁ । ତେଣୁ ବିଜୁ ଜନତା ଦଳ ୱାକଫ ବିଲକୁ ସମର୍ଥନ ଜଣାଇବାର କୌଣସି ପ୍ରଶ୍ନ ଉଠୁ ନାହିଁ ।