ବ୍ରହ୍ମପୁର: ଆଜିଠୁ (ଗୁରୁବାର) ଆରମ୍ଭ ହୋଇଛି ବ୍ରହ୍ମପୁରର ପ୍ରସିଦ୍ଧ ମା' ବୁଢ଼ୀ ଠାକୁରାଣୀ ଯାତ୍ରା । ଦୁଇ ବର୍ଷକୁ ଥରେ ମା' ବାପଘରକୁ ଆସୁଥିବାରୁ ଉତ୍ସାହିତ ବ୍ରହ୍ମପୁରବାସୀ । ପ୍ରାୟ ଏକ ମାସ ଧରି ମା' ବାପ ଘରେ ରହି ପୂଜା ପାଇବେ। ଏଥିପାଇଁ ବଡ଼ବଜାରର ଦେଶୀ ବେହେରା ସାହି ଚଳଚଞ୍ଚଳ ହୋଇଉଠିଛି। ଆଜି ମା'ଙ୍କୁ ଡାକରା କରିବେ ବାପା ଦେଶୀ ବେହେରା ।

ଆଜି (ଗୁରୁବାର) ମଧ୍ୟରାତ୍ରରେ ଦେଶୀ ବେହେରା ସାହିରୁ ଏକ ବିରାଟ ପଟୁଆରରେ ମା'ଙ୍କ ମନ୍ଦିରରେ ପହଞ୍ଚିବେ ମା’ଙ୍କ ବାପାଙ୍କ ସମେତ ସହରବାସୀ। ସେଠାରେ ମା'ଙ୍କୁ ପୂଜାର୍ଚ୍ଚନା କରାଯିବା ସହ ମା'ଙ୍କ ଆଜ୍ଞାମାଳ ଧରି ପୁଣି ବିରାଟ ପଟୁଆରରେ ଦେଶୀ ବେହେରା ସାହିକୁ ଆସି ଆଜ୍ଞାମାଳକୁ ସ୍ଥାପନ କରାଯିବ। ଏହାପରେ ଆରମ୍ଭ ହେବ ମା'ଙ୍କ ଯାତ୍ରା । ମା’ ଶାଶୂଘରୁ ବାପଘରକୁ ଆସିବେ । ପ୍ରାୟ ମାସେ ଧରି ବାପଘରେ ରହିବା ପରେ ବାପଘରୁ ବିଦାୟ ନେବେ । 

ମା'ଙ୍କ ଏହି ଯାତ୍ରା ପାଇଁ ଲକ୍ଷାଧିକ ଭକ୍ତଙ୍କ ସମାଗମ ଥିବାରୁ ଏଥିପାଇଁ ବ୍ୟାପକ ପୋଲିସ ମୁତୟନ ବ୍ୟବସ୍ଥା କରାଯାଇଛି। ଯାତ୍ରା ସମୟରେ ପ୍ରଶାସନ ପକ୍ଷରୁ ସୁରକ୍ଷା ବ୍ୟବସ୍ଥା କଡାକଡ଼ି କରାଯିବାକୁ ବ୍ୟାପକ ପଦକ୍ଷେପ ନିଆଯାଇଛି। ପାଣି, ଆଲୋକର ବ୍ୟବସ୍ଥା କରାଯିବା ସହ ଅଗ୍ନିଶମ ବିଭାଗ ପ୍ରସ୍ତୁତ ରହିଛନ୍ତି। ପରମ୍ପରା ଅନୁସାରେ ପ୍ରତି ଦୁଇ ବର୍ଷରେ ଥରେ ହୋଇଥାଏ ମାଆ ବୁଢ଼ୀ ଠାକୁରାଣୀଙ୍କ ଯାତ୍ରା। ଦୁଇବର୍ଷରେ ଥରେ ମାଆଙ୍କ ଏହି ଯାତ୍ରାକୁ ନେଇ ଅପେକ୍ଷା କରି ରହିଥାନ୍ତି ସହରବାସୀ।