ଭୁବନେଶ୍ୱର: ଓଡ଼ିଶା ବିଧାନସଭା ରାତି ତମାମ ଚାଲିଥିଲା । ଅନେକ ତର୍କ ବିତର୍କ ପରେ, ବିରୋଧୀଙ୍କ ସମାଲୋଚନା ସହିତ ଶାସକ ଦଳର କଡ଼ା କାଉଣ୍ଟର ମଧ୍ୟରେ ବିଶ୍ୱ ବିଦ୍ୟାଳୟ ସଂଶୋଧନ ବିଲ୍ ପାରିତ ହୋଇଥିଲା । ପ୍ରଥମ ଥର ଶାସନକୁ ଆସିଥିବା ବିଜେପି ପ୍ରଥମ ପୂର୍ଣ୍ଣାଙ୍ଗ ବଜେଟରେ ଏକ ଇତିହାସ ସୃଷ୍ଟି କରିଛି । ତେବେ ଏହା ଓଡ଼ିଶା ବିଧାନସଭା ଇତିହାସରେ ତୃତୀୟ ଘଟଣା ଅଟେ । ଏହା ପୂର୍ବରୁ ଦୁଇ ଦୁଇ ଥର ସାରି ରାତି ଅଧିବେଶନ ଚାଲିଛି । ୧୯୯୯ ଏବଂ ୨୦୦୩ରେ ମଧ୍ୟ ରାତି ସାରା ଆଗତ ବିଲ ଉପରେ ଆଲୋଚନା ହୋଇ ପାରିତ ହୋଇଥିଲା । ତେବେ ବିଧାନସଭାରେ ଏଭଳି ଆଲୋଚନାକୁ ସମସ୍ତେ ପ୍ରଶଂସା କରିଛନ୍ତି । ନବ ନିର୍ବାଚିତ ବିଧାୟକମାନଙ୍କୁ ଅନେକ କିଛି ଶିଖିବାକୁ ମିଳିଲା ବୋଲି ମତ ରଖିଛନ୍ତି ।  

୨୦୦୩ରେ ବିଜେପି-ବିଜେଡ଼ି ମେଣ୍ଟ ସରକରାବେଳେ ପୋଲିସ ବିଲ୍ ଆଗତ ହୋଇଥିଲା । ନଭେମ୍ବର ୧୦ ତାରିଖ ଅପରାହ୍ନ ୩.୫୬ ମିନିଟରୁ ଆଲୋଚନା ଆରମ୍ଭ ହୋଇ ୧୧ ତାରିଖ ସକାଳ ୮ଟା ୩୨ ମିନିଟରେ ଶେଷ ହୋଇଥିଲା । ଯାହାକି ଏପର୍ଯ୍ୟନ୍ତ ସର୍ବକାଳୀନ ରେକର୍ଡ ରହିଛି । ସେହିପରି ଏହା ପୂର୍ବରୁ ୧୯୯୯ରେ ମଧ୍ୟ ଅନୁରୂପ ପରିସ୍ଥିତି ଦେଖିବାକୁ ମିଳିଥିଲା । ଅଗଷ୍ଟ ୧ ତାରିଖରେ ଉତ୍କଳ ସଂସ୍କୃତି ବିଶ୍ୱ ବିଦ୍ୟାଳୟ ବିଲ୍ ଆଗତ ହୋଇଥିଲା ଓ ୨ ତାରିଖରେ ତାହା ପାରିତ ହୋଇଥିଲା । 

ତେଲେଙ୍ଗାନାରେ ଚାଲିଛି ରାତି ତମାମ ଅଧିବେଶନ 

ତେବେ କେବଳ ଓଡ଼ିଶା ବିଧାନସଭାରେ ଏଭଳି ଓଭର୍ ନାଇଟ୍ ଅଧିବେଶନ ଚାଲିଥିଲା, ତାହା ନୁହେଁ ବରଂ ଦେଶର ଅନ୍ୟ ରାଜ୍ୟରେ ମଧ୍ୟ ଏମିତି ଘଟଣା ଦେଖିବାକୁ ମିଳିଛି । ଗତ ୨୦୨୪ ଜୁଲାଇ ୩୧ରେ ତେଲେଙ୍ଗାନା ସରକାର ଦୀର୍ଘ ୧୭ ଘଣ୍ଟାର ଅଧିବେଶନ କରି ଇତିହାସ ସୃଷ୍ଟି କରିଥିଲେ । ଯେଉଁଥିରେ ୧୯ଟି ପ୍ରସ୍ତାବ ପାରିତ ହୋଇଥିଲା । ୨୦୨୪, ଜୁଲାଇ ୩୦, ସୋମବାର ସକାଳ ୧୦ଟାରୁ ଆରମ୍ଭ ହୋଇଥିଲା ଅଧିବେଶନ ଏବଂ  ୩୧ ଜୁଲାଇ ମଙ୍ଗଳବାର ୩ଟା ୧୫ ମିନିଟରେ ଗୃହ ମୁଲତବୀ ହୋଇଥିଲା । ଏମିତିକି ଏନଟି ରାମା ରାଓ ଯେତେବେଳେ ଆନ୍ଧ୍ର ପ୍ରଦେଶର ମୁଖ୍ୟମନ୍ତ୍ରୀ ଥିଲେ ସେତେବେଳେ ରାତି ୨ଟା ପରଠାରୁ କେବେ ବି ବିଧାନସଭା ଅଧିବେଶନ ଚାଲି ନ ଥିଲା ।