ଦେବଗଡ଼: ଜାଳ କାଠ ପାଇଁ ବଡ଼ ଯାଆର ଜୀବନ ନେଲା ସାନ ଯାଆ । କାଠ ଫାଳିଆରେ ପିଟିପିଟି କଲା ହତ୍ୟା । ଘଟଣାଟି ଘଟିଛି ଦେବଗଡ଼ ପୌରାଞ୍ଚଳର ନୀଳାବେର୍ଣ୍ଣି ସାହିରେ । ସାମନ୍ୟ ଜାଳେଣୀ କାଠ ପାଇଁ ଆଜି ସକାଳେ(ଗୁରୁବାର) ଦୁଇ ଯାଆଙ୍କ ଭିତରେ ଗଣ୍ଡଗୋଳ ହୋଇଥିଲା । ପରେ ବଚସା ଏତେ ଉଗ୍ର ରୂପ ନେଇଥିଲା ଯେ, ସାନ ଯାଆ ମାଡ଼ରେ ବଡ଼ ଯାଆଙ୍କ ମୃତ୍ୟୁ ହୋଇଛି । ଘଟଣା ପରେ ପାଖ ପଡୋଶୀ ଜ୍ୟୋତ୍ସ୍ନାଙ୍କୁ ଅଚେତ ଅବସ୍ଥାରେ ଆଣି ଦେବଗଡ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିବାବେଳେ ସେଠାରେ ଡ଼ାକ୍ତର ତାଙ୍କୁ ମୃତ ଘୋଷଣା କରିଥିଲେ। ମୃତକ ହେଉଛନ୍ତି ୫୫ବର୍ଷୀୟ ଜ୍ୟୋତ୍ସା ଭୋଜ ।

ତେବେ ଘଟଣା ପରେ ଅଭିଯୁକ୍ତ ପ୍ରତାପ ଭୋଜଙ୍କ ସ୍ତ୍ରୀ ଗୀତା ଭୋଜଙ୍କୁ ଥାନାରେ ଅଟକ ରଖି ପଚରା ଉଚରା କରୁଛି ଦେବଗଡ଼ ଥାନା ପୋଲିସ । ହତ୍ୟା କାଣ୍ଡ ପରେ ସାହିରେ ଚାପା ଉତ୍ତେଜନା ଲାଗି ରହିଥିବା ବେଳେ ପୋଲିସ ମୃତଦେହ ଜବତ କରି ଜିଲ୍ଲା ମୁଖ୍ୟ ଚିକିତ୍ସାଳୟକୁ ବ୍ୟବଚ୍ଛେଦ ପାଇଁ ପଠାଇଛି।