ଅନୁଗୁଳ: ଅନୁଗୁଳ ପୋଲିସ ଜଣେ କୁଖ୍ୟାତ ଅପରାଧୀକୁ ଏନକାଉଣ୍ଟର କରିଛି । ପୋଲିସ ଏନକାଉଣ୍ଟରରେ ସୁଶାନ୍ତ ନାୟକ ଗୁରୁତର ହୋଇଛି । ତାକୁ ଅନୁଗୁଳ ସରକାରୀ ମେଡ଼ିକାଲରେ ଭର୍ତ୍ତି କରାଯାଇଛି ।
ଦୁର୍ଦ୍ଦାନ୍ତ ଅପରାଧୀ ସୁଶାନ୍ତ ନାୟକକୁ ପୋଲିସ ଧରିବାକୁ ଅନେକ ଦିନରୁ ଚେଷ୍ଟା କରୁଥିଲା । ତାକୁ ଧରିବାକୁ ଅନୁଗୁଳ ପୋଲିସର ଏକ ସ୍ପେଶାଲ ସ୍କ୍ୱାର୍ଡ ଗଠନ କରାଯାଇଥିଲା । ସୁଶାନ୍ତ ତାଳଚେର ତାଳବେଡ଼ା ଜଙ୍ଗଲ ନିକଟରେ ଥିବା ନେଇ ପୋଲିସ ଜାଣିବାକୁ ପାଇଥିଲା । ଏହା ପରେ ପୋଲିସ ତାର ପିଛା କରିଥିଲା । ସୁଶାନ୍ତ ପୋଲିସକୁ ଦେଖି ଖସି ଯିବାକୁ ଚେଷ୍ଟା କରିଥିଲା । ସେ ପୋଲିସ ଉପରକୁ ତିନି ରାଉଣ୍ଡ ଗୁଳି ଚଳାଇଥିଲା । କିନ୍ତୁ ପୋଲିସର ପାଲଟା ଗୁଳିରେ ସେ ତଳେ ପଡ଼ିଯାଇଥିଲା । ତାର ବାମ ଗୋଡ଼ରେ ଗୋଟିଏ ଗୁଳି ବାଜିଛି । ଏହା ପରେ ତାକୁ ଗୁରୁତର ଅବସ୍ଥାରେ ମେଡ଼ିକାଲରେ ଭର୍ତ୍ତି କରାଯାଇଛି ।
ସୁଶାନ୍ତ ନାଁରେ ଅନେକ ଅପରାଧିକ ମାମଲା ରହିଛି । ସୁସ୍ଥ ହେବା ପରେ ପୋଲିସ ତାକୁ ଗିରଫ କରିବ ବୋଲି ଜଣାପଡ଼ିଛି । ଅନ୍ୟପକ୍ଷରେ ସୁଶାନ୍ତର ଜଣେ ସହଯୋଗୀକୁ ଜଙ୍ଗଲରୁ ଗିରଫ କରିଛି ପୋଲିସ ।