ଭାରତୀୟ ଦ୍ରୁତ ବୋଲର ମହମ୍ମଦ ଶାମି ୨୦୧୯ ରେ ଖେଳାଯାଇଥିବା ଦିନିକିଆ ବିଶ୍ୱକପର ସେମିଫାଇନାଲରେ କାହିଁକି ତାଙ୍କୁ ପ୍ଲେଇଂ ୧୧ ରୁ ବାଦ ଦିଆଯାଇଥିଲା ସେ ନେଇ ପ୍ରଶ୍ନ ଉଠାଇଛନ୍ତି। ସେମିଫାଇନାଲ ପୂର୍ବରୁ ସେ ତିନିଟି ମ୍ୟାଚରେ ୧୩ ଟି ୱିକେଟ୍ ନେଇଥିଲେ ମଧ୍ୟ ନ୍ୟୁଜିଲାଣ୍ଡ ବିପକ୍ଷ ମ୍ୟାଚରେ ତାଙ୍କୁ ଡ୍ରପ କରାଯାଇଥିଲା। ଏହାକୁ ନେଇ ଶାମି ଏକ ପୋଡ଼କାଷ୍ଟରେ ପ୍ରତିକ୍ରିୟା ରଖିଛନ୍ତି ।

ଶୁଭଙ୍କର ମିଶ୍ରାଙ୍କ ସହ ଏକ ପୋଡ଼କାଷ୍ଟରେ ମହମ୍ମଦ ଶାମିଙ୍କୁ ଦେଖିବାକୁ ମିଳିଥିଲା । ଶାମି ନିଜ କ୍ରିକେଟ କ୍ୟାରିଅର ଠାରୁ ଆରମ୍ଭ କରି ବିଭିନ୍ନ ପ୍ରସଙ୍ଗକୁ ନେଇ ଆଲୋଚନା କରୁଥିଲେ । ଏହି ସମୟରେ ୨୦୧୯ ବିଶ୍ୱକପକୁ ନେଇ ଶାମି ପ୍ରତିକ୍ରିୟା ରଖିଥିଲେ । ସେ କହିଥିଲେ ୨୦୧୯ ବିଶ୍ୱକପରେ ୩ ଟି ମ୍ୟାଚରେ ୧୩ ଟି ୱିକେଟ୍ ନେବା ସତ୍ୱେ ତାଙ୍କୁ ସେମିଫାଇନାଲରେ ସୁଯୋଗ ଦିଆଯାଇନଥିଲା । ସେ କହିଥିଲେ କୌଣସି ବି ଦଳ ନିଜ ଖେଳାଳି ଠାରୁ ଭଲ ପ୍ରଦର୍ଶନ ଆଶା କରିଥାଏ, ତେବେ ମୁଁ ଭଲ ପ୍ରଦର୍ଶନ କରିଥିବା ସତ୍ୱେ ମତେ କାହିଁକି ବାଦ ଦିଆଯାଇଥିଲା ।  

ତେବେ ୨୦୧୯ ବିଶ୍ୱକପ ଦଳର ଅଧିନାୟକ ଥିଲେ ବିରାଟ କୋହଲି ଏବଂ ମୁଖ୍ୟ ପ୍ରଶିକ୍ଷକ ଥିଲେ ରବି ଶାସ୍ତ୍ରୀ । ଭାରତ ସେମିଫାଇନାଲରେ ପ୍ରବେଶ କରିଥିଲା ​​କିନ୍ତୁ ନ୍ୟୁଜିଲ୍ୟାଣ୍ଡ ଠାରୁ ପରାସ୍ତ ହୋଇଥିଲା। ଏହି ବିଶ୍ୱକପରେ ଶାମି ମୋଟ ୪ ଟି ମ୍ୟାଚ ଖେଳି ୧୪ ଟି ୱିକେଟ୍ ନେଇଥିଲେ। ଏହାକୁ ନେଇ ଶାମି କହିଥିଲେ ଯେ " ମୋ ମନରେ ଆଜି ମଧ୍ୟ ଏ ପ୍ରଶ୍ନ ଉଙ୍କି ମାରେ, କି କାହିଁକି ମତେ ସେମିଫାଇନାଲରେ ଖେଳିବାକୁ ସୁଯୋଗ ଦିଆଯାଇନଥିଲା । " 

ଏହା ପରେ ଶାମି କହିଥିଲେ ଯେ ସେ ଦଳରେ ଏପରି ପ୍ରଶ୍ନ ସେ କେବେ ପଚାରନ୍ତି ନାହିଁ। ସେ କହିଥିଲେ, "ମୋର ପ୍ରଶ୍ନ ପଚାରିବାର ଆବଶ୍ୟକତା କ’ଣ? ଯଦି ମୋର ସୁଯୋଗ ମିଳେ, ମତେ ମୋ କଳା ଉପରେ ସମ୍ପୂର୍ଣ୍ଣ ବିଶ୍ୱାସ ରହିଛି ଏବଂ ମୁଁ ଜାଣିଚି ମୁଁ କଣ କରିପାରିବି।"

୨୦୧୩ ଦିନିକିଆ ବିଶ୍ୱକପରେ ମଧ୍ୟ ସମାନ ଦୃଶ୍ୟ ଦେଖିବାକୁ ମିଳିଲା । ଶାମି ନିଜ ପ୍ରଦର୍ଶନ ବଳରେ ଭାରତୀୟ ବିଶ୍ୱକପ ଦଳରେ ଥିଲେ ମଧ୍ୟ ପ୍ରଥମ ୪ ଟି ମ୍ୟାଚରେ ଖେଳିବାର ସୁଯୋଗ ମିଳିନଥିଲା । ବାଂଲାଦେଶ ବିପକ୍ଷ ମ୍ୟାଚରେ ହାର୍ଦ୍ଦିକ ଆହତ ହେବା ପରେ ଶାମିଙ୍କୁ ପ୍ଲେଇଂ ୧୧ ରେ ସ୍ଥାନ ମିଳିଲା । ଏହା ପରେ ଶାମି ୭ ଟି ମ୍ୟାଚ ଖେଳି ୨୪ ଟି ୱିକେଟ୍ ନେବା ସହ ଟୁର୍ନାମେଣ୍ଟର ସର୍ବାଧିକ ୱିକେଟ୍ ନେଇଥିବା ବୋଲର ହୋଇଥିଲେ । ଆଗକୁ ଚମ୍ପିଆନ୍ସ ଟ୍ରଫି ରହିଛି, ତେବେ ଏହି ଟୁର୍ନାମେଣ୍ଟରେ କଣ ଶାମିଙ୍କୁ ସୁଯୋଗ ମିଳିବ ନା ପୂର୍ବ ଭଳି ସୁଯୋଗ ପାଇଁ ଅପେକ୍ଷା କରିବାକୁ ପଡିବ ।