ନୂଆଦିଲ୍ଲୀ: ଭାରତୀୟ ଘରୋଇ କ୍ରିକେଟ୍‌ର ସବୁଠାରୁ ପ୍ରତିଷ୍ଠିତ ପ୍ରତିଯୋଗିତା ‘ରଣଜୀ ଟ୍ରଫି’ରେ ଏକ ଅଭୂତପୂର୍ବ ଐତିହାସିକ ରେକର୍ଡ ସୃଷ୍ଟି ହୋଇଛି। ମିଜୋରାମ୍‌ର ଯୁବ ବ୍ୟାଟର ଚିନ୍ମୟ ସୁତାର ରଣଜୀ ଟ୍ରଫି ଇତିହାସରେ ଚୌଶତକ (୪୦୦ ରନ୍‌) ହାସଲ କରିବାରେ ଦ୍ୱିତୀୟ ଭାରତୀୟ ଖେଳାଳି ହେବାର ଗୌରବ ଅର୍ଜନ କରିଛନ୍ତି। ସୋମବାର ସୋଭିମାଠାରେ ନାଗାଲାଣ୍ଡ ବିପକ୍ଷ ପ୍ଲେଟ୍ ଗ୍ରୁପ୍ ମ୍ୟାଚ୍‌ରେ ସେ ଏହି କୀର୍ତ୍ତିମାନ ସ୍ଥାପନ କରିଛନ୍ତି।

୭୭ ବର୍ଷର ରେକର୍ଡ ଭାଙ୍ଗି ସ୍ୱର୍ଣ୍ଣିମ ଅଧ୍ୟାୟ

ରଣଜୀ ଟ୍ରଫି ଇତିହାସରେ ଶେଷ ଥର ପାଇଁ ୧୯୪୮-୪୯ ସିଜନ୍‌ରେ ବି.ବି. ନିମ୍ବାଳକର ୪୪୩ ରନ୍‌ର ଅପରାଜିତ ଇନିଂସ ଖେଳିଥିଲେ। ତାଙ୍କ ପରେ ଦୀର୍ଘ ୭୭ ବର୍ଷ ଧରି କୌଣସି ବି ବ୍ୟାଟର ଏହି ୪୦୦ ରନ୍‌ର ମାଇଲଖୁଣ୍ଟ ଛୁଇଁପାରି ନଥିଲେ। ୨୯ ବର୍ଷୀୟ ଚିନ୍ମୟ ସୁତାର ମାତ୍ର ୫୧୭ଟି ବଲ୍‌ର ସାମ୍ନା କରି ୪୬ଟି ଚୌକା ଓ ୭ଟି ଛକା ସହାୟତାରେ ଅପରାଜିତ ୪୦୦ ରନ୍ ସଂଗ୍ରହ କରି କ୍ରିକେଟ୍ ଜଗତକୁ ସ୍ତବ୍ଧ କରିଦେଇଛନ୍ତି। ତାଙ୍କର ଏହି ବିସ୍ଫୋରକ ବ୍ୟାଟିଂ ବଳରେ ମିଜୋରାମ୍ ୫୮୧/୯ ରନ୍‌ରେ ଇନିଂସ ଘୋଷଣା କରିଥିଲା।

୧୧ ନମ୍ବର ବ୍ୟାଟରଙ୍କ ଅଭୂତପୂର୍ବ ସହଯୋଗ

ଏହି ସ୍ମରଣୀୟ ଇନିଂସରେ ୧୧ ନମ୍ବର ବ୍ୟାଟର ଲାଲରେମ୍ପୁଇଆ ଛକଛୁଆକ୍ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଯୋଗଦାନ ଦେଇଥିଲେ। ଦଳର ୯ମ ୱିକେଟ୍ ୩୯୨ ରନ୍‌ରେ ପଡ଼ିବା ପରେ ଛକଛୁଆକ୍ ଗୋଟିଏ ପଟେ ୭୬ଟି ବଲ୍ ଖେଳି ୧୪ ରନ୍‌ରେ ଅପରାଜିତ ରହିଥିଲେ। ଫଳରେ ଶେଷ ୱିକେଟ୍‌ରେ ଉଭୟଙ୍କ ମଧ୍ୟରେ ୧୮୯ ରନ୍‌ର ଦାୟିତ୍ୱପୂର୍ଣ୍ଣ ଭାଗିଦାରୀ ଗଢ଼ିଉଠିଥିଲା, ଯାହା ଚିନ୍ମୟଙ୍କୁ ୪୦୦ ରନ୍ ଛୁଇଁବାରେ ସାହାଯ୍ୟ କରିଥିଲା।

ରଣଜୀ ଟ୍ରଫିର ସର୍ବୋଚ୍ଚ ବ୍ୟକ୍ତିଗତ ସ୍କୋର:

୧. ବି.ବି. ନିମ୍ବାଳକ – ୪୪୩* (୧୯୪୮-୪୯)

୨. ଚିନ୍ମୟ ସୁତାର – ୪୦୦* (୨୦୨୬-୨୭)

୩. ପୃଥ୍ୱୀ ଶ' – ୩୭୯

୪. ସଞ୍ଜୟ ମାଞ୍ଜରେକର – ୩୭୭