ଲଣ୍ଡନ: ସାରା ବିଶ୍ୱରେ ଏବେ ମହିଳା କ୍ରିକେଟ୍‌କୁ ନେଇ କ୍ରେଜ୍ ବଢ଼ିବାରେ ଲାଗିଛି। ଏହି କ୍ରମରେ ଆଗାମୀ ଆଇସିସି ମହିଳା ଟି-୨୦ ବିଶ୍ୱକପ୍  ପାଇଁ ବିଗୁଲ୍ ବାଜି ସାରିଛି। ଇଂଲଣ୍ଡର ପ୍ରସିଦ୍ଧ ଲଣ୍ଡନ ବ୍ରିଜ୍ ମଧ୍ୟରୁ ଅନ୍ୟତମ 'ୱାଟରଲୁ ବ୍ରିଜ୍'  ଠାରେ ଏହି ମେଗା ଟୁର୍ଣ୍ଣାମେଣ୍ଟର ଏକ ଭବ୍ୟ ଏବଂ ରଙ୍ଗାରଙ୍ଗ କାର୍ନିଭାଲ୍ ଆୟୋଜନ କରାଯାଇଛି। ଏହି ସ୍ୱତନ୍ତ୍ର କାର୍ଯ୍ୟକ୍ରମ ସହ ବିଶ୍ୱକପ୍‌ର ଅଫିସିଆଲ୍ ଶୁଭାରମ୍ଭ ହୋଇଛି। ଏହି ଉତ୍ସବରେ ୧୨ଟି ଦଳର ଅଧିନାୟକ ଉପସ୍ଥିତ ଥିଲେ। 

୧୨ଟି ଦଳକୁ ନେଇ ହେବ ମହାଲଢ଼େଇ

ଏଥର ମହିଳା ଟି-୨୦ ବିଶ୍ୱକପ୍‌ରେ ବିଶ୍ୱର ଶ୍ରେଷ୍ଠ ୧୨ଟି ଦଳ ପରସ୍ପର ସହ ମୁହାଁମୁହିଁ ହେବେ। ଲଣ୍ଡନରେ ଆୟୋଜିତ ଏହି ସ୍ୱତନ୍ତ୍ର କାର୍ଯ୍ୟକ୍ରମରେ ଅନ୍ତର୍ଜାତୀୟ କ୍ରିକେଟ୍ ପରିଷଦ (ICC) ର ଅଧ୍ୟକ୍ଷ ସାମିଲ ହୋଇ ସମସ୍ତ ୧୨ଟି ଦଳକୁ ଶୁଭକାମନା ଜଣାଇଛନ୍ତି। ସେ କହିଛନ୍ତି ଯେ, ମହିଳା କ୍ରିକେଟର ସ୍ତର ଏବେ ବହୁତ ଉପରକୁ ଉଠିଛି ଏବଂ ଏହି ବିଶ୍ୱକପ୍‌ରେ ପ୍ରଶଂସକମାନଙ୍କୁ ରୋମାଞ୍ଚକର ମ୍ୟାଚ୍ ଦେଖିବାକୁ ମିଳିବ।

ଆକର୍ଷଣର କେନ୍ଦ୍ରବିନ୍ଦୁ ସାଜିଥିଲା କାର୍ନିଭାଲ୍

ଟୁର୍ଣ୍ଣାମେଣ୍ଟର ପ୍ରଚାର ଏବଂ ମହିଳା କ୍ରିକେଟ୍‌ର ଲୋକପ୍ରିୟତାକୁ ବଢ଼ାଇବା ପାଇଁ ଲଣ୍ଡନର ଏହି ଐତିହାସିକ ବ୍ରିଜ୍ ଉପରେ ଏକ ଭବ୍ୟ ଉତ୍ସବର ଆୟୋଜନ କରାଯାଇଥିଲା। ଏଥିରେ କ୍ରିକେଟ୍ ଦୁନିଆର ଅନେକ ଜଣାଶୁଣା ଚେହେରା ଓ ଅଧିକାରୀମାନେ ଉପସ୍ଥିତ ଥିଲେ। ବିଶ୍ୱକପ୍ ଟ୍ରଫି ସହ ସମସ୍ତ ଦଳର ପ୍ରତିନିଧିତ୍ୱ କରୁଥିବା ଅଧିନାୟକ ଉପସ୍ଥିତ ଥିଲେ। ଆଲୋକମାଳାରେ ପୂରା ପରିବେଶ ଉତ୍ସବମୁଖର ହୋଇଉଠିଥିଲା।

ଟ୍ରଫି ଉପରେ ସମସ୍ତଙ୍କ ନଜର

ଭାରତ ସମେତ ବିଶ୍ୱର ସମସ୍ତ ଶକ୍ତିଶାଳୀ ଦଳ ଏହି ପ୍ରତିଷ୍ଠିତ ଟ୍ରଫି ହାତେଇବା ପାଇଁ ପଡ଼ିଆକୁ ଓହ୍ଲାଇବେ। ବିଗତ କିଛି ବର୍ଷ ହେବ ମହିଳା କ୍ରିକେଟ୍‌ରେ ବଡ଼ ଧରଣର ପରିବର୍ତ୍ତନ ଆସିଛି, ଯେଉଁଥିପାଇଁ ଏଥର କେଉଁ ଦଳ ଚାମ୍ପିୟନ ହେବ, ତାହା ପୂର୍ବାନୁମାନ କରିବା ସହଜ ନୁହେଁ। ଲଣ୍ଡନରୁ ଆରମ୍ଭ ହୋଇଥିବା ଏହି କ୍ରିକେଟ୍‌ର ମହାକୁମ୍ଭ ଆଗାମୀ ଦିନରେ କ୍ରିକେଟ୍ ପ୍ରେମୀଙ୍କୁ ଭରପୂର ମନୋରଞ୍ଜନ ଯୋଗାଇବ ବୋଲି ଆଶା କରାଯାଉଛି।  

ଉଲ୍ଲେଖନୀୟ ଜୁନ ୧୨ରୁ ମହିଳା ଟି-୨୦ ବିଶ୍ଵକପ୍ ୨୦୨୬ ଆରମ୍ଭ ହେବାକୁ ଯାଉଛି। ଏହି ଟୁର୍ଣ୍ଣାମେଣ୍ଟ ଇଂଲଣ୍ଡ ଓ ଓ୍ଵେଲ୍ସରେ ଖେଳା ଯାଉଛି। ଟୁର୍ଣ୍ଣାମେଣ୍ଟ ଆରମ୍ଭ ହେବା ପୂର୍ବରୁ ୨ ଲକ୍ଷ ଟିକେଟ୍ ବିକ୍ରି ହୋଇ ସାରିଛି, ଯାହା ଏକ ରେକର୍ଡ। ଗତ ସଂସ୍କରଣର ସମସ୍ତ ରେକର୍ଡକୁ ଏହା ସହଜରେ ଟପି ଯାଇଛି।