ହରାରେ: ଜିମ୍ବାଓ୍ଵେ ବିପକ୍ଷ ତୃତୀୟ ତଥା ଅନ୍ତିମ ଟି-୨୦ ମ୍ୟାଚ୍‌କୁ ୩୫ ରନ୍‌ରେ ଜିତି ସିରିଜ୍‌କୁ ୩-୦ ରେ କ୍ଲିନ୍ ସ୍ୱିପ୍ କରିଛି ଭାରତୀୟ ଦଳ। ଆଇସିସି T20ରେ ପୁଣିଥରେ ଶୀର୍ଷ ସ୍ଥାନ ହାସଲ କରିବା ପରେ ଟିମ୍ ଇଣ୍ଡିଆର ଏହି ଦମଦାର ବିଜୟ ଦଳର ଉତ୍ସାହକୁ ଦ୍ୱିଗୁଣିତ କରିଦେଇଛି। ପ୍ରଥମେ ବ୍ୟାଟିଂ କରିଥିବା ଭାରତ ବୈଭବ ସୂର୍ଯ୍ୟବଂଶୀଙ୍କ ୮୧ ରନ ବଳରେ ୫ ଓ୍ଵିକେଟ୍ ହରାଇ ୧୯୨ ରନ କରିଥିଲା। ଜବାବରେ ଘରୋଇ ଦଳ ୭ ଓ୍ଵିକେଟ୍ ହରାଇ ୧୫୭ ରନ କରି ପାରିଛି। 

ଟସ୍ ଜିତି ପ୍ରଥମେ ବ୍ୟାଟିଂ କରିଥିବା ଭାରତୀୟ ଦଳ ବ୍ୟାଟିଂ କରିଥିଲେ। ଓପନର୍ ଅଭିଷେକ ଶର୍ମା (୨) ଶୀଘ୍ର ଆଉଟ୍ ହୋଇଥିବା ବେଳେ ଇଶାନ କିଷନ ୨୯ ରନ୍ ଏବଂ ଅଧିନାୟକ ଶ୍ରେୟସ ଆୟର ୨୭ ରନ୍‌ର ଯୋଗଦାନ ଦେଇଥିଲେ। ଶେଷ ଆଡ଼କୁ ରିଙ୍କୁ ସିଂ ମାତ୍ର ୧୪ ବଲ୍‌ରୁ ୨୫ ରନ୍‌ର ଦ୍ରୁତ ପାରୀ ଖେଳି ଦଳୀୟ ସ୍କୋରକୁ ୧୯୨ରେ ପହଞ୍ଚାଇଥିଲେ।

ଭାରତର ଏହି ବିଜୟରେ ପ୍ରମୁଖ ନାୟକ ସାଜିଥିଲେ ଯୁବ ବ୍ୟାଟର ବୈଭବ ସୂର୍ଯ୍ୟବଂଶୀ। ସେ ଚମତ୍କାର ବ୍ୟାଟିଂ ପ୍ରଦର୍ଶନ କରି ମାତ୍ର ୪୯ ବଲ୍‌ରୁ ୮୧ ରନ୍‌ର ଏକ ଗୁରୁତ୍ୱପୂର୍ଣ୍ଣ ଓ ଧୂଆଁଧାର ପାରୀ ଖେଳି ଦଳକୁ ଏକ ସୁଦୃଢ଼ ସ୍ଥିତିରେ ପହଞ୍ଚାଇଥିଲେ। ନିର୍ଦ୍ଧାରିତ ୨୦ ଓଭରରେ ୫ ୱିକେଟ୍ ହରାଇ ଭାରତ ୧୯୨ ରନ୍ ସଂଗ୍ରହ କରିଥିଲା।

ବୋଲିଂରେ ମୟଙ୍କଙ୍କ କମାଲ ଓ ଅଶୋକଙ୍କ ପ୍ରଥମ ୱିକେଟ୍

୧୯୩ ରନ୍‌ର ପିଛା କରୁଥିବା ଜିମ୍ବାଓ୍ଵେ ଦଳ ୨୦ ଓଭରରେ ୧୫୭ ରନ୍ ନିକଟରେ ଅଟକି ଯାଇଥିଲା। ଭାରତୀୟ ବୋଲର ମୟଙ୍କ ଯାଦବ ପୁଣିଥରେ ନିଜ ବୋଲିଂର ଯାଦୁ ଦେଖାଇ ୩ଟି ଗୁରୁତ୍ୱପୂର୍ଣ୍ଣ ୱିକେଟ୍ ନେଇଥିଲେ। ସେହିପରି ଯୁବ ବୋଲର ଅଶୋକ ଶର୍ମା ତଡିବନାଶେ ମାରୁମାନୀଙ୍କୁ କ୍ଲିନ୍ ବୋଲ୍ଡ କରି ନିଜ ଅନ୍ତର୍ଜାତୀୟ କ୍ରିକେଟ୍ କ୍ୟାରିୟରର ପ୍ରଥମ ୱିକେଟ୍ ସଫଳତା ପାଇଥିଲେ।

ଇଂଲଣ୍ଡ ଓ ଆୟରଲ୍ୟାଣ୍ଡ ବିପକ୍ଷ ସିରିଜ୍ ହରାଇବା ପରେ ଭାରତୀୟ ଦଳ T20 ଶୀର୍ଷରୁ ତଳକୁ ଖସି ଆସିଥିଲା। ମାତ୍ର ଜିମ୍ବାଓ୍ଵେ  ବିପକ୍ଷରେ ପ୍ରଥମ ଦୁଇଟି ମ୍ୟାଚ୍ ଜିତି ଭାରତ ପୁଣିଥରେ ଇଂଲଣ୍ଡକୁ ପଛରେ ପକାଇ ଏକ ନମ୍ବର ଆସନ ଅକ୍ତିଆର କରିଥିଲା। ଏବେ ୩-୦ ରେ ସିରିଜ୍ କ୍ଲିନ୍ ସ୍ୱିପ୍ କରି ଭାରତୀୟ ଦଳ ନିଜ ଶୀର୍ଷ ସ୍ଥାନକୁ ଆହୁରି ମଜବୁତ୍ କରିପାରିଛି।