ନୂଆଦିଲ୍ଲୀ: ଟି-୨୦ ବିଶ୍ଵକପ୍ ୨୦୨୬କୁ ନେଇ ଆସିଛି ବଡ଼ ଖବର। ଯାହା ଆଶଙ୍କା କରାଯାଉଥିଲା, ତାହା ହିଁ ଘଟିଛି। ଆଇସିସି ସମସ୍ତ ଦାବି ପ୍ରତ୍ୟାଖ୍ୟାନ କରିବା ପରେ ଟି-୨୦ ବିଶ୍ଵକପରୁ ଓହରିବାକୁ ନିଷ୍ପତ୍ତି ନେଇଛି ବାଂଲାଦେଶ। ଅର୍ଥାତ ଦଳ ଆସନ୍ତା ଟି-୨୦ ବିଶ୍ଵକପ୍ ଖେଳିବ ନାହିଁ। ବାଂଲାଦେଶ ସରକାର ଗୁରୁବାର ଏ ନେଇ ଘୋଷଣା କରିଛନ୍ତି। ବାଂଲାଦେଶ ସରକାର କହିଛନ୍ତି ଯେ ଆଇସିସି ଟି-୨୦ ବିଶ୍ଵକପ ମ୍ୟାଚଗୁଡ଼ିକୁ ସ୍ଥାନାନ୍ତର କରିବା ପାଇଁ ତାଙ୍କର ଦାବିକୁ ପ୍ରତ୍ୟାଖ୍ୟାନ କରିଛି। ସରକାର ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି)କୁ ମଧ୍ୟ ସମାଲୋଚନା କରିଛି। 

ସମ୍ପ୍ରତି, ବାଂଲାଦେଶର କ୍ରୀଡା ପରାମର୍ଶଦାତା ଆସିଫ ନଜରୁଲ କହିଛନ୍ତି ଯେ ବାଂଲାଦେଶୀ ଖେଳାଳିମାନେ ଟି-୨୦ ବିଶ୍ୱକପରେ ଖେଳିବାକୁ ଚାହାଁନ୍ତି, କିନ୍ତୁ ଦଳ କେବଳ ଶ୍ରୀଲଙ୍କାରେ ହିଁ ଏହାର ମ୍ୟାଚ୍ ଖେଳିବ। ବାଂଲାଦେଶ ସରକାର ଏକ ବିବୃତ୍ତି ଜାରି କରି କହିଛନ୍ତି ଯେ ସେମାନେ ବିଶ୍ଵ କ୍ରିକେଟର ଅବସ୍ଥା ବିଷୟରେ ଅନିଶ୍ଚିତ, କିନ୍ତୁ କ୍ରୀଡାର ଲୋକପ୍ରିୟତା ନିଶ୍ଚିତ ଭାବରେ ହ୍ରାସ ପାଉଛି। ସେମାନେ ୨୦୦ ନିୟୁତ ଲୋକଙ୍କୁ ବନ୍ଦୀ କରିଛନ୍ତି। କ୍ରିକେଟ ଅଲିମ୍ପିକ୍ସକୁ ଯାଉଛି, କିନ୍ତୁ ଯଦି ବାଂଲାଦେଶ ଭଳି ଦେଶ ଅଂଶଗ୍ରହଣ ନ କରେ, ତେବେ ଏହା ଆଇସିସିର କ୍ଷତି।

ଏହା ମଧ୍ୟ କୁହାଯାଇଥିଲା ଯେ ବାଂଲାଦେଶ ସରକାର ଆଇସିସି ସହିତ ନିରନ୍ତର ଯୋଗାଯୋଗରେ ରହିବ, କାରଣ ସେମାନଙ୍କ ଦଳ ବିଶ୍ୱକପରେ ଖେଳିବାକୁ ଚାହୁଁଛି କିନ୍ତୁ ଭାରତରେ ଖେଳିବ ନାହିଁ। ଆଇସିସି ଏହାର ବୋର୍ଡ ବୈଠକରେ ଅନେକ ଆଶ୍ଚର୍ଯ୍ୟଜନକ ନିଷ୍ପତ୍ତି ନେଇଥିବାରୁ ମଧ୍ୟ ସମାଲୋଚନାର ଶିକାର ହୋଇଥିଲା।

ମୁସ୍ତାଫିଜୁର ରେହମାନଙ୍କୁ ଇଣ୍ଡିଆନ୍ ପ୍ରିମିୟର ଲିଗରୁ ବାହାର କରିବା ପରେ ଏହି ସମ୍ପୂର୍ଣ୍ଣ ମାମଲା ସାମ୍ନାକୁ ଆସିଥିଲା।  କୋଲକାତା ନାଇଟ୍ ରାଇଡର୍ସ  ବିସିସିଆଇର ନିର୍ଦ୍ଦେଶରେ ରେହମାନଙ୍କୁ ଦଳରୁ ମୁକ୍ତ କରିଥିଲା। କେକେଆର ମିନି-ନିଲାମରେ ୯.୨୦ କୋଟିରେ ମୁସ୍ତାଫିଜୁରଙ୍କୁ କିଣିଥିଲା। ବାଂଲାଦେଶ ସରକାର କହିଥିଲେ ଯେ ମୁସ୍ତାଫିଜୁରଙ୍କ ପ୍ରସଙ୍ଗ ବ୍ୟକ୍ତିଗତ ନୁହେଁ। ନିଷ୍ପତ୍ତି ନେବା ପାଇଁ କେବଳ ବିସିସିଆଇ ଦାୟୀ ଥିଲା।

ଏହା ପରେ ବାଂଲାଦେଶ  କ୍ରିକେଟ୍ ବୋର୍ଡ ଭାରତରେ ଟି-୨୦ ବିଶ୍ଵକପ୍ ନ ଖେଳିବାକୁ ନିଷ୍ପତ୍ତି ନେଇଥିଲା। ଦଳ ନିଜର ମ୍ୟାଚ୍ ଭାରତରୁ ଶ୍ରୀଲଙ୍କା ସ୍ଥାନାନ୍ତର କରିବାକୁ ଦାବି କରିଥିଲା। ତେବେ ଆଇସିସି ବାଂଲାଦେଶର ଦାବିକୁ ଅଗ୍ରାହ୍ୟ କରିବା ସହ ସ୍ପଷ୍ଟ କରିଥିଲା ଯେ, ଭାରତ ବାହାରକୁ ମ୍ୟାଚ୍ ସ୍ଥାନାନ୍ତର ହେବ ନାହିଁ। ଏହା ସହିତ ଅନେକ ବୈଠକରେ ଆଇସିସି ବାଂଲାଦେଶ କ୍ରିକେଟ୍ ବୋର୍ଡକୁ ନିଜର ଆଭିମୁଖ୍ୟ ବଦଳାଇବାକୁ ଅନୁରୋଧ କରିଥିଲା। ଏହା ସହିତ ଜାନୁଆରୀ ୨୧ ତାରିଖ ଭିତରେ ନିଷ୍ପତ୍ତି ଜଣାଇବାକୁ ବିସିବିକୁ କହିଥିଲା ଆଇସିସି। 

ବାଂଲାଦେଶ ବହିଷ୍କାର କରିବାକୁ ନିଷ୍ପତ୍ତି ନେବା ପରେ ଏବେ ଆଇସିସିର ପରବର୍ତ୍ତୀ ପଦକ୍ଷେପ ଉପରେ ସଭିଙ୍କ ନଜର ରହିଛି। ବାଂଲାଦେଶ ବଦଳରେ ସ୍କଟଲାଣ୍ଡକୁ ବିଶ୍ଵକପରେ ସାମିଲ୍ କରାଯିବାର ସମ୍ଭାବନା ରହିଛି।କାରଣ  ଆଇସିସି ଟି-୨୦ ମାନ୍ୟତାରେ ବାଂଲାଦେଶ ନବମ ସ୍ଥାନରେ ରହିଛି। ଏହା ପରେ ଆଫଗାନିସ୍ତାନ, ଆୟରଲାଣ୍ଡ, ଜିମ୍ବାଓ୍ଵେ ଓ ନେଦରଲାଣ୍ଡର ନାଁ ଅଛି। ମାତ୍ର ଏହି ସବୁ ଦଳ ବିଶ୍ଵକପ୍ ଖେଳିବାକୁ ଯୋଗ୍ୟତା ଅର୍ଜନ କରି ସାରିଛନ୍ତି। ଏହା ପରେ ୧୪ତମ ସ୍ଥାନରେ ସ୍କଟଲାଣ୍ଡର ନାଁ ରହିଛି।  ଏହି ଦୃଷ୍ଟିରୁ ସ୍କଟଲାଣ୍ଡକୁ ଖେଳିବାକୁ ସୁଯୋଗ ମିଳିପାରେ।