ପୁଣେ: ପ୍ରଥମ ଟେଷ୍ଟରେ ଭାରତୀୟ ବ୍ୟାଟରଙ୍କ ଖରାପ ପ୍ରଦର୍ଶନ ଦ୍ୱିତୀୟ ଟେଷ୍ଟରେ ଜାରି ରହିଛି । ଘରୋଇ ମାଟିରେ ଏମିତି ଦୟନୀୟ ପ୍ରଦର୍ଶନ କରିଛି ଯେ, ଦଳ ୨୦୦ ରନ ବି କରି ପାରିନି । ନ୍ୟୁଜିଲାଣ୍ଡର ୨୫୯ ରନ ଜବାବରେ ଭାରତ ମିଚେଲ୍ ସାଣ୍ଟନରଙ୍କ ଘାତକ ବୋଲିଂର ମୁକାବିଲା କରି ନ ପାରି ୧୫୬ ରନରେ ଅଲଆଉଟ୍ ହୋଇଛି । ଫଳରେ ନ୍ୟୁଜିଲାଣ୍ଡକୁ ୧୦୩ ରନର ଅଗ୍ରଣୀ ହାସଲ ହୋଇଛି, ଯାହା ଭାରତକୁ ବ୍ୟାକଫୁଟକୁ ଠେଲିଛି । ଭାରତ ପକ୍ଷରୁ ଜଣେ ହେଲେ ବ୍ୟାଟର ଅର୍ଦ୍ଧଶତକ ବି ହାସଲ କରି ପାରି ନାହାନ୍ତି । ରବୀନ୍ଦ୍ର ଜାଡେଜା ସର୍ବାଧିକ ୩୮ ରନ କରିଥିବା ବେଳେ ଯଶସ୍ୱୀ ଜୟସ୍ୱାଲ ଓ ଶୁଭମନ ଗିଲ ୩୦ ରନ ଲେଖାଏଁ କରିଛନ୍ତି । ନ୍ୟୁଜିଲାଣ୍ଡ ପକ୍ଷରୁ ମିଚେଲ୍ ସାଣ୍ଟନର ନିଜ ଟେଷ୍ଟ କ୍ୟାରିୟରରେ  ଶ୍ରେଷ୍ଠ ପ୍ରଦର୍ଶନ କରି ୭ ୱିକେଟ୍ ଅକ୍ତିକାର କରିଛନ୍ତି । ଗ୍ଲେନ ଫିଲିପ୍ସକୁ ୨ଟି ସଫଳତା ମିଳିଛି ।