ନୂଆଦିଲ୍ଲୀ: ଭାରତୀୟ କ୍ରିକେଟ ଦଳର ଷ୍ଟାର୍ ବ୍ୟାଟର ତଥା ପୂର୍ବତନ ସଫଳ ଅଧିନାୟକ ‘ହିଟମ୍ୟାନ୍’ ରୋହିତ ଶର୍ମାଙ୍କୁ ଦେଶର ଚତୁର୍ଥ ସର୍ବୋଚ୍ଚ ନାଗରିକ ସମ୍ମାନ ‘ପଦ୍ମଶ୍ରୀ’ରେ ସମ୍ମାନିତ କରାଯାଇଛି। ମଙ୍ଗଳବାର ନୂଆଦିଲ୍ଲୀସ୍ଥିତ ରାଷ୍ଟ୍ରପତି ଭବନଠାରେ ଆୟୋଜିତ ଏକ ଗୌରବମୟ ସମାରୋହରେ ମହାମହିମ ରାଷ୍ଟ୍ରପତି ଦ୍ରୌପଦୀ ମୁର୍ମୁ ରୋହିତଙ୍କୁ ଏହି ପ୍ରତିଷ୍ଠିତ ପୁରସ୍କାର ପ୍ରଦାନ କରିଛନ୍ତି। ଦ୍ୱିତୀୟ ପର୍ଯ୍ୟାୟ ପଦ୍ମ ପୁରସ୍କାର ବିତରଣ ଉତ୍ସବରେ ସମ୍ମାନିତ ହୋଇଥିବା ୬୫ ଜଣ ବିଶିଷ୍ଟ ବ୍ୟକ୍ତିତ୍ୱଙ୍କ ମଧ୍ୟରେ ରୋହିତ ଶର୍ମା ଅନ୍ୟତମ ଥିଲେ।

ସୂଚନାଯୋଗ୍ୟ ଯେ, ଗତ ମେ' ମାସରେ ଆୟୋଜିତ ପ୍ରଥମ ପର୍ଯ୍ୟାୟ ପୁରସ୍କାର ସମାରୋହରେ କିଛି ବ୍ୟକ୍ତିଗତ ଏବଂ କ୍ରିକେଟ୍ ପ୍ରତିବଦ୍ଧତା (କ୍ରିକେଟ ବ୍ୟସ୍ତତା) କାରଣରୁ ରୋହିତ ଯୋଗ ଦେଇପାରି ନଥିଲେ। ମଙ୍ଗଳବାର ଆୟୋଜିତ ଏହି ସ୍ୱତନ୍ତ୍ର ଉତ୍ସବରେ ସେ ନିଜ ପତ୍ନୀ ରୀତିକା ସଜଦେହଙ୍କ ସହ ରାଷ୍ଟ୍ରପତି ଭବନରେ ପହଞ୍ଚିଥିଲେ। ପୁରସ୍କାର ଗ୍ରହଣ କରିବା ପୂର୍ବରୁ ରୋହିତ କଳା ରଙ୍ଗର ଆକର୍ଷଣୀୟ ସୁଟ୍‌ରେ ଅତି ନମ୍ରତାର ସହ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଅଭିବାଦନ ଜଣାଇଥିଲେ।

ଅନ୍ୟ କେଉଁ କ୍ରୀଡ଼ାବିତ୍ ପାଇଲେ ସମ୍ମାନ?

ଚଳିତ ସମାରୋହରେ ରୋହିତଙ୍କ ବ୍ୟତୀତ ଭାରତୀୟ ମହିଳା ହକି ଦଳର ଷ୍ଟାର୍ ଗୋଲକିପର ସବିତା ପୁନିଆଙ୍କୁ ମଧ୍ୟ ‘ପଦ୍ମଶ୍ରୀ’ ସମ୍ମାନରେ ସମ୍ମାନିତ କରାଯାଇଛି। ସେହିପରି ଟେନିସ୍ ଜଗତର କିମ୍ବଦନ୍ତୀ ଖେଳାଳି ବିଜୟ ଅମୃତରାଜଙ୍କୁ ଦେଶର ତୃତୀୟ ସର୍ବୋଚ୍ଚ ନାଗରିକ ସମ୍ମାନ ‘ପଦ୍ମଭୂଷଣ’ ପ୍ରଦାନ କରାଯାଇଛି।

ରେକର୍ଡ ଓ ସଫଳତାର ବାଦଶାହା

ରୋହିତ ଶର୍ମା ଭାରତୀୟ କ୍ରିକେଟର ତିନୋଟିଯାକ ଫର୍ମାଟ୍‌ରେ ଦଳର ନେତୃତ୍ୱ ନେଇ ସଫଳତା ସାଉଣ୍ଟିଛନ୍ତି। ତାଙ୍କ ଅଧିନାୟକତ୍ୱରେ ହିଁ ଟିମ୍ ଇଣ୍ଡିଆ ୨୦୨୪ ଟି-୨୦ ବିଶ୍ୱକପ୍ ଏବଂ ଆଇସିସି ଚାମ୍ପିଅନ୍ସ ଟ୍ରଫି  ବିଜେତା ହୋଇଥିଲା। ବର୍ତ୍ତମାନ ସେ ଟେଷ୍ଟ ଏବଂ ଟି-୨୦ ଆନ୍ତର୍ଜାତୀୟ କ୍ରିକେଟରୁ ଅବସର ନେଇସାରିଥିବା ବେଳେ କେବଳ ଦିନିକିଆ ଫର୍ମାଟ୍‌ରେ ଜଣେ ସକ୍ରିୟ ଖେଳାଳି ଭାବେ ଭାରତୀୟ ଦଳର ପ୍ରତିନିଧିତ୍ୱ କରୁଛନ୍ତି।