ନୂଆଦିଲ୍ଲୀ: ଇଂଲଣ୍ଡର ଅଲରାଉଣ୍ଡର ମୋଇନ ଅଲ୍ଲୀ ଅନ୍ତର୍ଜାତୀୟ କ୍ରିକେଟରୁ ସନ୍ନ୍ୟାସ ଘୋଷଣା କରିଛନ୍ତି । ମୋଇନ ଅଲ୍ଲୀଙ୍କ ଅବସର ଇଂଲଣ୍ଡ କ୍ରିକେଟ୍ ପାଇଁ ବଡ ଝଟକା । ତେବେ ଦଳରେ ଅଣଦେଖା କାରଣରୁ ମୋଇନ ଅବସର ଘୋଷଣା କରିଥିବା କୁହାଯାଉଛି । କାରଣ ନିକଟରେ ଇଂଲଣ୍ଡ କ୍ରିକେଟ୍ ବୋର୍ଡ ଅଷ୍ଟ୍ରେଲିଆ ବିପକ୍ଷରେ ଦିନିକିଆ ଓ ଟି-୨୦ ସିରିଜ୍ ପାଇଁ ଦଳ ଘୋଷଣା କରିଥିଲା । ଏହି ଦଳରେ ବରିଷ୍ଠ ଅଲରାଉଣ୍ଡର ମୋଇନ ଅଲ୍ଲୀଙ୍କୁ ସ୍ଥାନ ମିଳିନି ।

ଡେଲି ମେଲକୁ ଦେଇଥିବା ସାକ୍ଷାତକାରରେ ମୋଇନ ଅଲ୍ଲୀ କହିଛନ୍ତି, ମୁଁ ୩୭ ବର୍ଷର ହୋଇ ସାରିଛି ଏବଂ ଚଳିତ ମାସରେ ଅଷ୍ଟ୍ରେଲିଆ ବିପକ୍ଷ ସିରିଜ୍ ପାଇଁ ମୋତେ ଦଳରେ ଚୟନ କରାଯାଇ ନାହିଁ । ମୁଁ ଇଂଲଣ୍ଡ ପାଇଁ ବହୁତ କ୍ରିକେଟ୍ ଖେଳିଛି । ଏବେ ଆଗାମୀ ପିଢି ପାଇଁ ସମୟ ଆସି ଯାଇଛି, ଯେଉଁ ବିଷୟରେ ମୋତେ ଅବଗତ କରାଇ ଦିଆଯାଇଛି । ମୋତେ ଲାଗୁଛି କ୍ରିକେଟରୁ ଅବସର ନେବାର ଏହା ପ୍ରକୃଷ୍ଟ ସମୟ । 

ସେ ଏହା ମଧ୍ୟ କହିଛନ୍ତି, ମୁଁ ବହୁତ ଗର୍ବିତ । ଯେବେ ଆପଣ ପ୍ରଥମ ଥର ଇଂଲଣ୍ଡ ପାଇଁ ଖେଳନ୍ତି ଏବଂ ଆପଣଙ୍କୁ ଜଣା ନ ଥାଏ ଯେ, ଆପଣ କେତେ ମ୍ୟାଚ୍ ଦେଶ ପାଇଁ ଖେଳିବାକୁ ଯାଉଛନ୍ତି । ଏଥିପାଇଁ ପାଖାପାଖି ୩୦୦ ମ୍ୟାଚ୍ ଖେଳିବା ଅଦ୍ଭୁତ । ମୋର୍ଗାନ ଯେବେ ଦିନିକିଆ ଦଳର ମଙ୍ଗ ସମ୍ଭାଳିଲେ ମୋତେ ଖେଳିବାକୁ ଅଧିକ ସୁଯୋଗ ମିଳିଥିଲା । ମାତ୍ର ଟେଷ୍ଟ କ୍ରିକେଟ୍ ଅସଲି  କ୍ରିକେଟ୍ ଥିଲା, ଯେଉଁଠି ମୋତେ କମ୍ ସୁଯୋଗ ମିଳିଛି ।

୨୦୧୪ରେ ଅନ୍ତର୍ଜାତୀୟ କ୍ରିକେଟରେ ପଦାର୍ପଣ କରିଥିବା ମୋଇନ ପ୍ରାୟ ଏକ ଦଶନ୍ଧି ଧରି ଜଣେ ଅଲରାଉଣ୍ଡର ଭାବେ ୬୮ ଟେଷ୍ଟ, ୧୩୮ ଦିନିକିଆ ଓ ୯୨ ଟି-୨୦ ଅନ୍ତର୍ଜାତୀୟ ମ୍ୟାଚ୍ ଖେଳିଛନ୍ତି । ସେ ସମସ୍ତ ଫର୍ମାଟରେ ଇଂଲଣ୍ଡ ପାଇଁଛ ୬୬୭୮ ରନ କରିଛନ୍ତି ।ଏଥିରେ ୮ ଶତକ ଓ ୨୮ ଅର୍ଦ୍ଧଶତକ ସାମିଲ । ବୋଲିଂରେ ସେ ୩୬୬ ୱିକେଟ୍ ଅକ୍ତିକାର କରିଛନ୍ତି । ତାଙ୍କର ଶେଷ ଅନ୍ତର୍ଜାତୀୟ ମ୍ୟାଚ୍ ଗୁଏନାରେ ଟି-୨୦ ବିଶ୍ୱକପରେ ଭାରତ ବିପକ୍ଷ ସେମି ଫାଇନାଲ୍ ମ୍ୟାଚ୍ ଥିଲା । ସେମିରେ ଭାରତଠୁ ହାରି ଟି-୨୦ ବିଶ୍ୱକପରୁ ଇଂଲଣ୍ଡ ବିଦାୟ ନେଇଥିଲା ।