ନୂଆଦିଲ୍ଲୀ: ଭାରତୀୟ କ୍ରିକେଟ୍ ଟିମ୍‌ର ପୂର୍ବତନ ମୁଖ୍ୟ କୋଚ୍ ରବି ଶାସ୍ତ୍ରୀ ନୂଆଦିଲ୍ଲୀରେ ଅନୁଷ୍ଠିତ ହେଉଥିବା ବ୍ରିକ୍ସ  ଶିଖର ସମ୍ମିଳନୀକୁ ନେଇ ଏକ ବଡ଼ ପ୍ରତିକ୍ରିୟା ଦେଇଛନ୍ତି। ବିଶ୍ୱସ୍ତରରେ ଭାରତର ବୃଦ୍ଧି ପାଉଥିବା ପ୍ରଭାବ ଓ କୂଟନୈତିକ ସଫଳତା ପାଇଁ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଖୋଲାଖୋଲି ପ୍ରଶଂସା କରିଛନ୍ତି।

ଶାସ୍ତ୍ରୀଙ୍କ ଖାସ୍ ପୋଷ୍ଟ ଓ ପ୍ରଶଂସା

ରବି ଶାସ୍ତ୍ରୀ ସୋସିଆଲ ମିଡିଆରେ ଏକ ସ୍ୱତନ୍ତ୍ର ଫଟୋ ସେୟାର କରିଛନ୍ତି, ଯେଉଁଥିରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସହ ଋଷ ରାଷ୍ଟ୍ରପତି ଭ୍ଲାଦିମିର ପୁଟିନ୍ ଏବଂ ଚୀନ୍ ରାଷ୍ଟ୍ରପତି ସି ଜିନପିଙ୍ଗ୍ ବୃକ୍ଷରୋପଣ କରୁଥିବାର ଦେଖିବାକୁ ମିଳିଛି।

ଏହି ଫଟୋ ସେୟାର କରି ଶାସ୍ତ୍ରୀ ଲେଖିଛନ୍ତି, ଜଣେ ଭାରତୀୟ ଭାବେ ଏତେ ଗର୍ବ ପୂର୍ବରୁ କେବେ ଅନୁଭବ ହୋଇନଥିଲା। ରାଷ୍ଟ୍ରପତି ପୁଟିନ୍, ରାଷ୍ଟ୍ରପତି ସି ଜିନପିଙ୍ଗ ଏବଂ ଆମର ସାମର୍ଥ୍ୟବାନ୍ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଭାରତ ମାଟିରେ ଏକାଠି। ଏଭଳି ଆନ୍ତର୍ଜାତୀୟ କୂଟନୀତି ପୂର୍ବରୁ କେବେ ଦେଖିବାକୁ ମିଳିନଥିଲା। ମୋଦୀଜୀ, ଆପଣଙ୍କୁ ମୋର ସଲାମ୍।

ଐତିହାସିକ ବୃକ୍ଷରୋପଣ କାର୍ଯ୍ୟକ୍ରମ

ଏହି ବୃକ୍ଷରୋପଣ ଅଭିଯାନରେ ପ୍ରଧାନମନ୍ତ୍ରୀ ମୋଦୀଙ୍କ ସହ ଋଷ ଓ ଚୀନ୍‌ର ରାଷ୍ଟ୍ରପତିଙ୍କ ବ୍ୟତୀତ ଇଣ୍ଡୋନେସିଆ ରାଷ୍ଟ୍ରପତି ପ୍ରବୋବୋ ସୁବିଆନ୍ତୋ, ଦକ୍ଷିଣ ଆଫ୍ରିକା ରାଷ୍ଟ୍ରପତି ସିରିଲ୍ ରାମଫୋସା, ମିଶର ରାଷ୍ଟ୍ରପତି ଅବଦେଲ ଫତାହ ଅଲ-ସିସି, ଆବୁଧାବିର କ୍ରାଉନ୍ ପ୍ରିନ୍ସ ଶେଖ ଖାଲିଦ, ଇରାନ୍ ରାଷ୍ଟ୍ରପତି ମସୁଦ ପେଜେସ୍କିଆନ୍, ଇଥିଓପିଆ ପ୍ରଧାନମନ୍ତ୍ରୀ ଅବିୟ ଅହମ୍ମଦ ଅଲ୍ଲୀ ଏବଂ ବ୍ରାଜିଲ ବୈଦେଶିକ ମନ୍ତ୍ରୀ ମାଉରୋ ଭିଏରା ପ୍ରମୁଖ ସାମିଲ ହୋଇଥିଲେ।

'ନୂଆଦିଲ୍ଲୀ ଘୋଷଣା'କୁ ନେଇ ପ୍ରଧାନମନ୍ତ୍ରୀଙ୍କ ପ୍ରତିକ୍ରିୟା

ସେପଟେ ବ୍ରିକ୍ସ ସମ୍ମିଳନୀରେ 'ନୂଆଦିଲ୍ଲୀ ଘୋଷଣା' ସର୍ବସମ୍ମତିକ୍ରମେ ଗ୍ରହଣ କରାଯିବା ପରେ ପ୍ରଧାନମନ୍ତ୍ରୀ ମୋଦୀ ନିଜର ଖୁସି ପ୍ରକାଶ କରିଛନ୍ତି। ସେ କହିଛନ୍ତି ଯେ, ଏହି ନୂତନ ସଙ୍କଳ୍ପ ବ୍ରିକ୍ସର ଆତ୍ମବିଶ୍ୱାସ ଓ ସୁଦୂରପ୍ରସାରୀ ଲକ୍ଷ୍ୟକୁ ଦର୍ଶାଉଛି। ନବସୃଜନ, ସ୍ଥାୟୀ ବିକାଶ ଏବଂ ଜନସାଧାରଣଙ୍କ ମଧ୍ୟରେ ସମ୍ପର୍କ ବୃଦ୍ଧି ଉପରେ ଏହା ଗୁରୁତ୍ୱ ଦେବ। ଏହି ନିଷ୍ପତ୍ତି ପାଇଁ ସେ ସମସ୍ତ ସହଯୋଗୀ ଦେଶର ନେତାମାନଙ୍କୁ ଧନ୍ୟବାଦ ଜଣାଇଛନ୍ତି।