ତିରୁଅନନ୍ତପୁରମ: ଆଜି ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ପାଞ୍ଚ ମ୍ୟାଚ୍ ବିଶିଷ୍ଟ ଟି-୨୦ ସିରିଜର ପଞ୍ଚମ ତଥା ଶେଷ ଟି-୨୦ ମ୍ୟାଚ୍ ଖେଳାଯିବ । ଏହି ମୁକାବିଲା କେରଳର ରାଜଧାନୀ ତିରୁଅନନ୍ତପୁରମରେ ଖେଳାଯିବ । ଭାରତ ପ୍ରଥମ ତିନୋଟି ମ୍ୟାଚ୍ ଜିତି ସିରିଜ୍ ନିଜ ନାଁରେ କରି ସାରିଥିବା ବେଳେ ଚତୁର୍ଥ ମ୍ୟାଚ୍ ଜିତିଛି ନ୍ୟୁଜିଲାଣ୍ଡ । ଦୁଇ ଦଳ ପାଇଁ ଟି-୨୦ ବିଶ୍ୱକପର ପ୍ରସ୍ତୁତି ପାଇଁ ଆଜି ହେଉଛି ଶେଷ ମୁକାବିଲା।

ଭାରତ ପାଇଁ ଏହି ମ୍ୟାଚରେ ତିଳକ ବର୍ମା ଓ ୱାଶିଂଟନ ସୁନ୍ଦର ଉପଲବ୍ଧ ନାହାନ୍ତି । ତିରୁଅନନ୍ତପୁରମରେ ଖେଳା ଯିବାକୁ ଥିବା ମ୍ୟାଚରେ ଭାରତ ସେହି ଏକାଦଶ ସହ ପଡିଆକୁ ଓହ୍ଲାଇପାରେ ଯିଏ ବିଶ୍ୱକପରେ ଖେଳିବ । କିନ୍ତୁ ଏଥିରେ ତିଳକ ବର୍ମା ଫିଟ୍ ହେଲେ ଚୂଡାନ୍ତ ଏକାଦଶରେ ପରିବର୍ତ୍ତନ ହେବ । ନ୍ୟୁଜିଲାଣ୍ଡ ମଧ୍ୟ ନିଜର ବିଶ୍ୱକପ୍ ଟିମ ସହ ମଇଦାନକୁ ଆଜି ଓହ୍ଲାଇପାରେ ।

ବିଶ୍ୱକପ୍ ପୂର୍ବରୁ ନିଜକୁ ପ୍ରମାଣିତ କରିବାର ଏହା ସଞ୍ଜୁ ସାମସନଙ୍କ ପାଇଁ ଶେଷ ସୁଯୋଗ। ସେ ତାଙ୍କ ଘରୋଇ ଗ୍ରାଉଣ୍ଡରେ ପଞ୍ଚମ ଟି-୨୦ ଖେଳିବେ। ଏହି ସିରିଜରେ ସାମସନ ଏ ପର୍ଯ୍ୟନ୍ତ ପ୍ରଭାବଶାଳୀ ପ୍ରଦର୍ଶନ କରି ପାରି ନାହାନ୍ତି। ଏହି ମ୍ୟାଚରେ ନ୍ୟୁଜିଲ୍ୟାଣ୍ଡ ଦଳରେ ଏକ ବଡ଼ ପରିବର୍ତ୍ତନ ହେବ। ବିସ୍ଫୋରକ ବ୍ୟାଟ୍ସମ୍ୟାନ୍ ଫିନ୍ ଆଲେନ୍ ଦଳରେ ସାମିଲ ହୋଇଛନ୍ତି। ସେ ପଞ୍ଚମ ଟି-୨୦ରେ ଇନିଂସ ଓପନ କରିବେ।

ପ୍ରଭାବ ପକାଇବ କାକର

ପଞ୍ଚମ ଟି-୨୦ରେ ଟସ୍ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ, କାରଣ ଦ୍ୱିତୀୟ ଇନିଂସରେ ବୋଲିଂ କରିବା ଚ୍ୟାଲେଞ୍ଜପୂର୍ଣ୍ଣ ହେବ। କାକର ପଡ଼ିବା ସମ୍ଭବତଃ ଏକ ଗୁରୁତ୍ୱପୂର୍ଣ୍ଣ ପ୍ରଭାବ ପକାଇବ। ପିଚ୍ ବ୍ୟାଟରଙ୍କୁ ସୁହାଇବ । ଫଳରେ ତିରୁଅନନ୍ତପୁରମର ଗ୍ରୀନଫିଲ୍ଡ ଷ୍ଟାଡିୟମରେ ଏକ ହାଇସ୍କୋରିଂ ମ୍ୟାଚ୍ ଦେଖିବାକୁ ମିଳିପାରେ । 

ଭାରତର ସମ୍ଭାବିତ ଏକାଦଶ

ସଞ୍ଜୁ ସାମସନ(ୱିକେଟ୍ କିପର), ଅଭିଷେକ ଶର୍ମା, ଇଶାନ କିଶନ, ସୂର୍ଯ୍ୟକୁମାର ଯାଦବ(ଅଧିନାୟକ), ଶିବମ ଦୁବେ, ରିଙ୍କୁ ସିଂ, ଅକ୍ଷର ପଟେଲ୍‌, ବରୁଣ ଚକ୍ରବର୍ତ୍ତୀ, କୁଲଦୀପ ଯାଦବ, ଯଶପ୍ରୀତ ବୁମରା ଓ ଅର୍ଶଦୀପ ସିଂ । 

ନ୍ୟୁଜିଲାଣ୍ଡର ସମ୍ଭାବିତ ଏକାଦଶ

ଟିମ ସେଇଫର୍ଟ( ୱିକେଟ୍ କିପର), ଫିନ ଆଲେନ, ରଚିନ ରବୀନ୍ଦ୍ରନ, ଗ୍ଲେନ ଫିଲିପ୍ସ, ମାର୍କ ଚପମ୍ୟାନ, ଡାରିଲ ମିଚେଲ୍‌, ମିଚେଲ୍ ସାଣ୍ଟନର(ଅଧିନାୟକ), ଜକାରି ଫାଉଲକ୍ସ, ମ୍ୟାଟ୍ ହେନରୀ, ଇଶ ସୋଢି ଓ ଜ୍ୟାକବ ଡଫି ।