ଅହମ୍ମଦାବାଦ: ଆଇପିଏଲ୍ ୨୦୨୬ (IPL 2026) ର ପ୍ଲେ-ଅଫ୍ ଦୌଡ଼ ଏବେ ରୋମାଞ୍ଚକର ମୋଡ଼ରେ ପହଞ୍ଚିଛି। ବିଶେଷ କରି ଚେନ୍ନାଇ ସୁପର କିଙ୍ଗସ (CSK) ପାଇଁ ଏବେ ସ୍ଥିତି 'କର ବା ମର' ଭଳି ହୋଇଯାଇଛି। ଆଜି ଅହମ୍ମଦାବାଦର ନରେନ୍ଦ୍ର ମୋଦୀ ଷ୍ଟାଡିୟମରେ ଗୁଜରାଟ ଟାଇଟନ୍ସ (GT) ବିପକ୍ଷରେ ମଇଦାନକୁ ଓହ୍ଲାଇବ ହଳଦିଆ ବାହିନୀ। ଯଦି ଆଜିର ମ୍ୟାଚ୍‌ରେ ଚେନ୍ନାଇ ହାରିଯାଏ, ତେବେ ପ୍ଲେ-ଅଫ୍‌ ସ୍ୱପ୍ନ ଧୂଳିସାତ ହୋଇଯିବ ଏବଂ ଦଳ ଟୁର୍ଣ୍ଣାମେଣ୍ଟରୁ ବିଦାୟ ନେବ। ତେଣୁ ନିଜ ସ୍ଥିତି ବଜାୟ ରଖିବାକୁ ହେଲେ CSK କୁ କେବଳ ଜିତିବାକୁ ହେବ ନାହିଁ, ବରଂ ଏକ ବଡ଼ ବ୍ୟବଧାନରେ ବିଜୟ ହାସଲ କରିବାକୁ ପଡ଼ିବ।

ଦ୍ୱିତୀୟ ଥର ପାଇଁ ମୁହାଁମୁହିଁ ହେବେ CSK ଓ GT

ଚଳିତ ସିଜନରେ ଏହି ଦୁଇ ଦଳ ଦ୍ୱିତୀୟ ଥର ପାଇଁ ପରସ୍ପରର ସାମ୍ନା କରିବାକୁ ଯାଉଛନ୍ତି। ଏହା ପୂର୍ବରୁ ଚେନ୍ନାଇରେ ଖେଳାଯାଇଥିବା ମ୍ୟାଚ୍‌ରେ ଗୁଜରାଟ ଟାଇଟନ୍ସ ୮ ୱିକେଟ୍‌ରେ CSK କୁ ପରାସ୍ତ କରିଥିଲା। ତେଣୁ ଆଜି ଗୁଜରାଟର ଘରୋଇ ଗ୍ରାଉଣ୍ଡରେ ଚେନ୍ନାଇ ପାଇଁ ପ୍ରତିଶୋଧ ନେବା ସହ ଟୁର୍ଣ୍ଣାମେଣ୍ଟରେ ତିଷ୍ଠି ରହିବା ପାଇଁ ଏକ ବଡ଼ ସୁଯୋଗ ରହିଛି। ଗୁଜରାଟକୁ ବଡ଼ ବ୍ୟବଧାନରେ ହରାଇଲେ ହିଁ ଚେନ୍ନାଇର ପ୍ଲେ-ଅଫ୍ ଆଶା ଜୀବିତ ରହିବ।

କାହିଁକି କଷ୍ଟକର ହେବ ଚେନ୍ନାଇର ରାସ୍ତା ?

ଆଇପିଏଲ୍ ଇତିହାସରେ ଦୁଇ ଦଳ ମଧ୍ୟରେ ଏପର୍ଯ୍ୟନ୍ତ ୯ଟି ମ୍ୟାଚ୍ ଖେଳାଯାଇଛି। ସେଥିମଧ୍ୟରୁ ଗୁଜରାଟ ୫ଟି ଜିତିଥିବା ବେଳେ ଚେନ୍ନାଇ ୪ଟିରେ ବିଜୟୀ ହୋଇଛି। ରେକର୍ଡ ଦୃଷ୍ଟିରୁ ଗୁଜରାଟ ସାମାନ୍ୟ ଆଗରେ ଅଛି।ଶୁଭମନ ଗିଲ୍‌ଙ୍କ ନେତୃତ୍ୱାଧୀନ ଗୁଜରାଟ ଟାଇଟନ୍ସ ଦଳ ପୂର୍ବରୁ ହିଁ ପ୍ଲେ-ଅଫ୍‌ କ୍ୱାଲିଫାଇ କରିସାରିଛି। କୌଣସି ଚାପ ନଥିବାରୁ ସେମାନେ ଆଜି ଭୟଶୂନ୍ୟ କ୍ରିକେଟ୍ ଖେଳିବେ, ଯାହା ଚେନ୍ନାଇ ପାଇଁ ଅଡ଼ୁଆ ସାଜିପାରେ।

ବଡ଼ ବିଜୟ ପରେ ବି ଚେନ୍ନାଇକୁ ଅପେକ୍ଷା କରିବାକୁ ପଡ଼ିବ!

ଧରିନିଅନ୍ତୁ, ଚେନ୍ନାଇ ଆଜି ଗୁଜରାଟକୁ ବଡ଼ ବ୍ୟବଧାନରେ ହରାଇ ଦେଲା ଏବଂ ନିଜର ରନ୍ ରେଟ୍‌ରେ ସୁଧାର ଆଣି ୨ ପଏଣ୍ଟ ପାଇଗଲା। କିନ୍ତୁ ଏତିକିରେ ଦଳର ପ୍ଲେ-ଅଫ୍ ଟିକେଟ୍ ପକ୍କା ହେବ ନାହିଁ। CSK କୁ ନିଜର ଦମଦାର ପ୍ରଦର୍ଶନ ସହିତ ଅନ୍ୟ ଦଳଗୁଡ଼ିକର ଭାଗ୍ୟ ଉପରେ ନିର୍ଭର କରିବାକୁ ପଡ଼ିବ।ପ୍ଲେ-ଅଫ୍ ରେସ୍‌ରେ ଥିବା ପଞ୍ଜାବ, ରାଜସ୍ଥାନ ଏବଂ କୋଲକାତା (KKR) ଭଳି ଦଳଗୁଡ଼ିକ ସେମାନଙ୍କର ଆଗାମୀ ମ୍ୟାଚ୍ ହାରିବା ଚେନ୍ନାଇ ପାଇଁ ନିହାତି ଜରୁରୀ।

ସମୀକରଣ କଣ କହୁଛି?

ପଞ୍ଜାବ ବନାମ ଲକ୍ଷ୍ନୌ (LSG): ଲକ୍ଷ୍ନୌ ପୂର୍ବରୁ ବାଦ୍ ପଡ଼ିସାରିଛି, ତେଣୁ LSG ପଞ୍ଜାବକୁ ହରାଇଲେ ଚେନ୍ନାଇର ଫାଇଦା ହେବ।

ରାଜସ୍ଥାନ ବନାମ ମୁମ୍ବାଇ (MI): ମୁମ୍ବାଇ ମଧ୍ୟ ପ୍ଲେ-ଅଫ୍ ଦୌଡ଼ରୁ ବାହାରେ ଅଛି, ଯଦି ମୁମ୍ବାଇ ରାଜସ୍ଥାନକୁ ହରାଏ ତେବେ ଚେନ୍ନାଇ ଆଶ୍ୱସ୍ତି ପାଇବ।

କୋଲକାତା (KKR) ବନାମ ଦିଲ୍ଲୀ (DC): ଦିଲ୍ଲୀ ଏହି ମ୍ୟାଚ୍ ଜିତିବା ଉଚିତ୍, କିନ୍ତୁ DC ବିଜୟର ବ୍ୟବଧାନ କମ୍ ରହିବା ଦରକାର, ଯଦ୍ୱାରା ଚେନ୍ନାଇର ରନ୍-ରେଟ୍ ଉପରେ ପ୍ରଭାବ ପଡ଼ିବ ନାହିଁ।