ନୂଆଦିଲ୍ଲୀ: ଆଇପିଏଲ୍ ୨୦୨୬ ଏବେ ତାର ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚିଛି। ପ୍ଲେ-ଅଫ୍ ଦୌଡ଼ରୁ ୩ଟି ଦଳ ନିଜର ସ୍ଥାନ ପକ୍କା କରିସାରିଥିବା ବେଳେ ଲିଗ୍ ପର୍ଯ୍ୟାୟର ଆଉ ମାତ୍ର ୬ଟି ମ୍ୟାଚ୍ ବାକି ଅଛି। ଚତୁର୍ଥ ସ୍ଥାନ ପାଇଁ ଏବେ ବି ୫ଟି ଦଳ ମଧ୍ୟରେ ଜୋରଦାର ଟକ୍କର ଚାଲିଛି। ତେବେ ସବୁଠାରୁ ଆଶ୍ଚର୍ଯ୍ୟର କଥା ହେଉଛି, ପ୍ଲେ-ଅଫ୍ ଦୌଡ଼ରୁ ବାଦ୍ ପଡ଼ିସାରିଥିବା ମୁମ୍ବାଇ ଇଣ୍ଡିଆନ୍ସ (MI) ଏବେ ଅନ୍ୟ ଦଳଗୁଡ଼ିକର ଭାଗ୍ୟ ବିଧାତା ସାଜିଛି। ପଞ୍ଜାବ, କୋଲକାତା ଓ ଚେନ୍ନାଇର ଆଶା ଏବେ ମୁମ୍ବାଇର ପ୍ରଦର୍ଶନ ଉପରେ ଟିକି ରହିଛି।

ମଙ୍ଗଳବାର ଖେଳାଯାଇଥିବା ୬୪ତମ ମ୍ୟାଚ୍‌ରେ ରାଜସ୍ଥାନ ରୟାଲ୍ସ ୭ ଉଇକେଟରେ ଲକ୍ଷ୍ନୌ ସୁପର ଜାଏଣ୍ଟସକୁ ପରାସ୍ତ କରିଛି। ଏହି ମ୍ୟାଚ୍‌ରେ ଯୁବ ବ୍ୟାଟ୍ସମ୍ୟାନ୍ ବୈଭବ ସୂର୍ଯ୍ୟବଂଶୀ ମାତ୍ର ୯୩ ରନର ବିସ୍ଫୋରକ ପାଳି ଖେଳି (୧୦ଟି ଛକା ଓ ୭ଟି ଚୌକା) ଇତିହାସ ରଚିଛନ୍ତି। ଏହି ବିଜୟ ସତ୍ତ୍ୱେ ରାଜସ୍ଥାନର ପ୍ଲେ-ଅଫ୍ ଟିକେଟ୍ ଏପର୍ଯ୍ୟନ୍ତ କନଫର୍ମ ହୋଇନାହିଁ। ଆସନ୍ତୁ ବୁଝିବା ସମସ୍ତ ୫ଟି ଦଳର ପ୍ଲେ-ଅଫ୍ ଗଣିତ:

୧. ରାଜସ୍ଥାନ ରୟାଲ୍ସ 

ପ୍ଲେ-ଅଫ୍ ଦୌଡ଼ରେ ଥିବା ୫ଟି ଦଳ ମଧ୍ୟରୁ କେବଳ ରାଜସ୍ଥାନ ରୟାଲ୍ସ ହିଁ ଅନ୍ୟ କୌଣସି ଦଳର ସମୀକରଣ ଉପରେ ନିର୍ଭରଶୀଳ ନୁହେଁ। RR କୁ କେବଳ ନିଜର ଶେଷ ମ୍ୟାଚ୍ ଜିତିବାକୁ ହେବ। ଜିତିଲେ ଦଳର ୧୬ ପଏଣ୍ଟ ହୋଇଯିବ ଏବଂ ସେମାନେ ସିଧାସଳଖ କ୍ୱାଲିଫାଏ କରିବେ। କିନ୍ତୁ ଯଦି ଦଳ ଶେଷ ମ୍ୟାଚ୍ ହାରିଯାଏ, ତେବେ ୧୪ ପଏଣ୍ଟ ସହ ସେମାନଙ୍କୁ ଅନ୍ୟ ଦଳର ହାର-ଜିତ ଉପରେ ଚାହିଁ ରହିବାକୁ ପଡ଼ିବ।

୨. ପଞ୍ଜାବ ଓ କୋଲକାତା 

ପଞ୍ଜାବ କିଙ୍ଗସ ଏବଂ କୋଲକାତା ନାଇଟ୍ ରାଇଡର୍ସ ସର୍ବାଧିକ ୧୫ ପଏଣ୍ଟ ପର୍ଯ୍ୟନ୍ତ ପହଞ୍ଚିପାରିବେ। ପଞ୍ଜାବ ୧୩ଟି ମ୍ୟାଚ୍‌ରୁ ୧୩ ପଏଣ୍ଟ ପାଇଛି, ଶେଷ ମ୍ୟାଚ୍ ଲକ୍ଷ୍ନୌ ବିପକ୍ଷରେ ଅଛି। କୋଲକାତାର ଆଉ ୨ଟି ମ୍ୟାଚ୍ ବାକି ଅଛି, ଆଜି ମୁମ୍ବାଇ (MI) ବିପକ୍ଷରେ ମୁକାବିଲା ହେବ।

ପଞ୍ଜାବ ଓ କୋଲକାତା ପ୍ଲେ-ଅଫ୍‌କୁ ଯିବାକୁ ହେଲେ ନିଜ ମ୍ୟାଚ୍ ଜିତିବା ସହ ମୁମ୍ବାଇ ଇଣ୍ଡିଆନ୍ସ ଯେମିତି ହେଲେ ରାଜସ୍ଥାନ ରୟାଲ୍ସକୁ ହରାଉ ବୋଲି ପ୍ରାର୍ଥନା କରିବାକୁ ହେବ। ଯଦି ଉଭୟ ଦଳ ୧୫ ପଏଣ୍ଟରେ ରହନ୍ତି, ତେବେ ନେଟ୍ ରନରେଟ୍ (NRR) ଆଧାରରେ ଚତୁର୍ଥ ଦଳ ସ୍ଥିର ହେବ।

୩. ଚେନ୍ନାଇ ସୁପର କିଙ୍ଗସ 

ଚେନ୍ନାଇ ପାଇଁ ପ୍ଲେ-ଅଫ୍ ରାସ୍ତା ବେଶ୍ ଜଟିଳ। CSK କୁ ପ୍ରଥମେ ଗୁଜରାଟ ଟାଇଟନ୍ସକୁ ଏକ ବଡ଼ ବ୍ୟବଧାନରେ ହରାଇବାକୁ ପଡ଼ିବ, ଯେପରି ସେମାନଙ୍କ ନେଟ୍ ରନରେଟ୍ (-୦.୦୧୬) ରାଜସ୍ଥାନ (+୦.୦୮୩) ଠାରୁ ଭଲ ହୋଇପାରିବ। ଏହାସହ ଚେନ୍ନାଇ ଚାହିଁବ କୋଲକାତା ଅତିକମରେ ଗୋଟିଏ ମ୍ୟାଚ୍ ହାରୁ ଏବଂ ପଞ୍ଜାବ ଓ ରାଜସ୍ଥାନ ନିଜ ନିଜର ଶେଷ ମ୍ୟାଚ୍‌ରେ ପରାସ୍ତ ହୁଅନ୍ତୁ।

୪. ଦିଲ୍ଲୀ କ୍ୟାପିଟାଲ୍ସ 

ଦିଲ୍ଲୀ କ୍ୟାପିଟାଲ୍ସ ପାଇଁ କେବଳ କୌଣସି ଅଲୌକିକ ଚମତ୍କାର ହିଁ ପ୍ଲେ-ଅଫ୍ ଦ୍ୱାର ଖୋଲିପାରିବ। ଦିଲ୍ଲୀକୁ ଶେଷ ମ୍ୟାଚ୍‌ରେ କୋଲକାତାକୁ ବଡ଼ ବ୍ୟବଧାନରେ ହରାଇବାକୁ ହେବ। ଏହାସହ ପଞ୍ଜାବ ଓ ଚେନ୍ନାଇ ନିଜ ଶେଷ ମ୍ୟାଚ୍ ହାରିବା ଜରୁରୀ। ଏଭଳି ସ୍ଥିତିରେ RR ଓ DC ଉଭୟଙ୍କର ୧୪ ପଏଣ୍ଟ ଲେଖାଏଁ ହେବ। କିନ୍ତୁ ଦିଲ୍ଲୀର ରନରେଟ୍ (-୦.୮୭୧) ରାଜସ୍ଥାନ (+୦.୦୮୩) ତୁଳନାରେ ବହୁତ ଖରାପ ଥିବାରୁ ସେମାନଙ୍କୁ ବିଶାଳ ବିଜୟ ହାସଲ କରିବାକୁ ପଡ଼ିବ।