ନୂଆଦିଲ୍ଲୀ: ଆଇପିଏଲ୍ ୨୦୨୬ରେ ଦିଲ୍ଲୀ କ୍ୟାପିଟାଲ୍ସର ଦମଦାର ପ୍ରଦର୍ଶନ ଜାରି ରହିଛି। ଅରୁଣ ଜେଟଲୀ ଷ୍ଟାଡିୟମରେ ଖେଳାଯାଇଥିବା ଏକ ହାଇଭୋଲ୍ଟେଜ୍ ମ୍ୟାଚରେ ଦିଲ୍ଲୀ ୫ ଉଇକେଟରେ ରାଜସ୍ଥାନ ରୟାଲ୍ସକୁ ପରାସ୍ତ କରି ଚଳିତ ସିଜନର ଷଷ୍ଠ ବିଜୟ ହାସଲ କରିଛି। ଏହି ବିଜୟ ସହ ଦିଲ୍ଲୀର ପ୍ଲେ-ଅଫ୍ ଆଶା ସଜୀବ ରହିଥିବା ବେଳେ ଟୁର୍ଣ୍ଣାମେଣ୍ଟର ସମୀକରଣ ବେଶ୍ ରୋମାଞ୍ଚକର ହୋଇପଡ଼ିଛି। ପଞ୍ଜାବ କିଙ୍ଗସର ପରାଜୟ ପରେ ରିୟାନ୍ ପରାଗଙ୍କ ରାଜସ୍ଥାନ ଦଳ ପାଖରେ ପଏଣ୍ଟ ଟେବୁଲରେ ଆଗକୁ ଯିବାର ସୁବର୍ଣ୍ଣ ସୁଯୋଗ ଥିଲା, ହେଲେ ଦଳ ଏହାକୁ ହାତଛଡ଼ା କରିଛି।

ରାଜସ୍ଥାନର ବିସ୍ଫୋରକ ଆରମ୍ଭ, ପରେ ଷ୍ଟାର୍କଙ୍କ ଝଟକା

ଟସ୍ ହାରି ପ୍ରଥମେ ବ୍ୟାଟିଂ କରିଥିବା ରାଜସ୍ଥାନ ରୟାଲ୍ସର ଆରମ୍ଭ ନୈରାଶ୍ୟଜନକ ଥିଲା। ଓପନର୍ ଯଶସ୍ୱୀ ଜସୱାଲ ଶୀଘ୍ର ଆଉଟ୍ ହୋଇଯାଇଥିଲେ। କିନ୍ତୁ ଏହାପରେ ଯୁବ ତାରକା ବୈଭବ ସୂର୍ଯ୍ୟବଂଶୀ କ୍ରିଜକୁ ଆସି ଦିଲ୍ଲୀ ବୋଲରଙ୍କ ଉପରେ ରୀତିମତ ଆକ୍ରମଣ କରିଥିଲେ। ଛକା ମାରି ନିଜର ଖାତା ଖୋଲିଥିବା ବୈଭବ ମାତ୍ର ୨୧ ବଲରୁ ୪୬ ରନର ଧୂଆଁଧାର ପାଳି ଖେଳିଥିଲେ। ତାଙ୍କୁ ଧ୍ରୁବ ଜୁରେଲ୍ (୪୦ ବଲ୍, ୫୩ ରନ୍) ସୁନ୍ଦର ସାଥ୍ ଦେଇ ଦ୍ୱିତୀୟ ଉଇକେଟ ପାଇଁ ୭୦ ରନ୍ ଯୋଡ଼ିଥିଲେ।

ଏହାପରେ ଅଧିନାୟକ ରିୟାନ୍ ପରାଗ ମଧ୍ୟ ବିସ୍ଫୋରକ ଅର୍ଦ୍ଧଶତକ ହାସଲ କରିବାରୁ ରାଜସ୍ଥାନ ୧୪ ଓଭର ସୁଦ୍ଧା ୧୬୦ ରନରେ ପହଞ୍ଚି ଯାଇଥିଲା। ଲାଗୁଥିଲା ଦଳ ଏକ ବିଶାଳ ସ୍କୋର ଆଡ଼କୁ ଗତି କରୁଛି। କିନ୍ତୁ ଏହି ସମୟରେ ଦିଲ୍ଲୀର ଅଭିଜ୍ଞ ବୋଲର ମିଚେଲ ଷ୍ଟାର୍କ ଘାତକ ବୋଲିଂ କରି ରାଜସ୍ଥାନର ବ୍ୟାଟିଂ ମେରୁଦଣ୍ଡ ଭାଙ୍ଗି ଦେଇଥିଲେ। ଷ୍ଟାର୍କ ୪୦ ରନ୍ ଦେଇ ୪ଟି ଗୁରୁତ୍ୱପୂର୍ଣ୍ଣ ଉଇକେଟ ଅକ୍ତିଆର କରିଥିଲେ। ତାଙ୍କ ବ୍ୟତୀତ ମାଧବ ତିୱାରୀ ଓ ଲୁଙ୍ଗି ଏନଗିଡି ୨ଟି ଲେଖାଏଁ ଉଇକେଟ ନେଇ ରାଜସ୍ଥାନକୁ ୨୦ ଓଭରରେ ୧୯୩ ରନରେ ସୀମିତ ରଖିବାରେ ପ୍ରମୁଖ ଭୂମିକା ଗ୍ରହଣ କରିଥିଲେ।

ରାହୁଲ-ପୋରେଲଙ୍କ ଓପନିଂ ପାର୍ଟନରସିପ୍‌

୧୯୪ ରନର ବିଜୟ ଲକ୍ଷ୍ୟ ନେଇ ପଡ଼ିଆକୁ ଓହ୍ଲାଇଥିବା ଦିଲ୍ଲୀ କ୍ୟାପିଟାଲ୍ସକୁ ଚଳିତ ସିଜନର ସବୁଠାରୁ ଶ୍ରେଷ୍ଠ ଆରମ୍ଭ ମିଳିଥିଲା। କେଏଲ୍ ରାହୁଲ ଓ ଅଭିଷେକ ପୋରେଲଙ୍କ ଓପନିଂ ଯୋଡ଼ି ରାଜସ୍ଥାନ ବୋଲରଙ୍କୁ ନିର୍ଧୁମ ପ୍ରହାର କରିଥିଲେ। ସୀମିତ ସୁଯୋଗ ପାଇଥିବା ପୋରେଲ ମାତ୍ର ୨୯ ବଲରେ ନିଜର ଅର୍ଦ୍ଧଶତକ ପୂରଣ କରିଥିବା ବେଳେ ଅନ୍ୟପଟେ ରାହୁଲ ମଧ୍ୟ ଆକର୍ଷଣୀୟ ଅର୍ଦ୍ଧଶତକୀୟ ପାଳି ଖେଳିଥିଲେ। ଦୁହେଁ ମିଶି ମାତ୍ର ୧୦ ଓଭରରେ ୧୦୫ ରନର ଏକ ମଜଭୁତ ଭାଗିଦାରୀ କରି ଦିଲ୍ଲୀର ବିଜୟ ପଥ ସହଜ କରିଦେଇଥିଲେ।

ମ୍ୟାଚ୍‌ର ଟର୍ଣ୍ଣିଂ ପଏଣ୍ଟ

ଯଦିଓ ମଝି ଓଭରଗୁଡ଼ିକରେ ଜୋଫ୍ରା ଆର୍ଚ୍ଚର ୨ଟି ଉଇକେଟ ନେଇ ରାଜସ୍ଥାନକୁ ମ୍ୟାଚକୁ ଫେରାଇବାକୁ ଚେଷ୍ଟା କରିଥିଲେ ଏବଂ ଦିଲ୍ଲୀର ରନ୍ ଗତି କମିଯାଇଥିଲା, କିନ୍ତୁ ଶେଷ ଆଡ଼କୁ ଅକ୍ଷର ପଟେଲ ଓ ଆଶୁତୋଷ ଶର୍ମାଙ୍କ ପରିପକ୍ୱ ବ୍ୟାଟିଂ ଦିଲ୍ଲୀକୁ ଶେଷ ଓଭରରେ ବିଜୟୀ କରାଇଥିଲା। ଏହି ରୋମାଞ୍ଚକର ବିଜୟ ସହ ଦିଲ୍ଲୀ ଏବେ ପ୍ଲେ-ଅଫ୍ ରେସକୁ ଆହୁରି ରୋଚକ କରିଦେଇଛି।