ନୂଆଦିଲ୍ଲୀ: ପଶ୍ଚିମ ଏସିଆ (ମଧ୍ୟ ପ୍ରାଚ୍ୟ)ରେ ବଢ଼ୁଥିବା ଯୁଦ୍ଧ ପରିସ୍ଥିତି ଏବଂ ଏଥିଯୋଗୁଁ ସୃଷ୍ଟି ହୋଇଥିବା ଶକ୍ତି ସଙ୍କଟ ଆଶଙ୍କା ମଧ୍ୟରେ ଭାରତ ପାଇଁ  ଆସିଛି ଆଶ୍ଵସ୍ତିକର ଖବର। କତାରରୁ ୨୦ ହଜାର ଟନ୍ ପେଟ୍ରୋଲିୟମ ଗ୍ୟାସ୍ (LPG) ଧରି ଏକ ବାଣିଜ୍ୟିକ ଜାହାଜ ସୁରକ୍ଷିତ ଭାବେ ଗୁଜରାଟର କାଣ୍ଡଲାସ୍ଥିତ ଦୀନଦୟାଲ୍ ବନ୍ଦରରେ ପହଞ୍ଚିଛି। ଗତ ରବିବାର ଦିନ ବନ୍ଦର ଅଧିକାରୀମାନେ ଏହି ସୂଚନା ଦେଇଛନ୍ତି।

ବିପଦସଙ୍କୁଳ ‘ହୋର୍ମୁଜ୍ ଜଳଡମରୁମଧ୍ୟ’ ପାର୍ କଲା ‘ଏମଭି ସିମି’

ମାର୍ଶଲ ଆଇଲ୍ୟାଣ୍ଡର ପତାକା ଥାଇ ଯାତ୍ରା କରୁଥିବା ଏହି ମାଲବାହୀ ଜାହାଜ ‘ଏମଭି ସିମି’ କତାରରୁ ଭାରତ ଅଭିମୁଖେ ବାହାରିଥିଲା। ଏହି ଜାହାଜଟି ମେ ୧୩ ତାରିଖରେ ବିଶ୍ୱର ସବୁଠାରୁ ସମ୍ବେଦନଶୀଳ ସମୁଦ୍ର ମାର୍ଗ ‘ହୋର୍ମୁଜ୍ ଷ୍ଟ୍ରେଟ୍‌’ ଅତିକ୍ରମ କରି ଶନିବାର ବିଳମ୍ବିତ ରାତି ପ୍ରାୟ ୧୧ଟା ୩୦ ସମୟରେ କାଣ୍ଡଲା ବନ୍ଦରରେ ହଙ୍ଗର ପକାଇଛି। ବର୍ତ୍ତମାନ ପଶ୍ଚିମ ଏସିଆରେ ଚାଲିଥିବା ଉତ୍ତେଜନା ଯୋଗୁଁ ଏହି ସାମୁଦ୍ରିକ ମାର୍ଗ ଅବରୋଧ ରହିଛି। ଏଭଳି ସ୍ଥିତିରେ ଜାହାଜଟି ସୁରକ୍ଷିତ ଭାବେ ପହଞ୍ଚିବା ଭାରତ ପାଇଁ ଏକ ବଡ଼ ସଫଳତା।

ଭାରତ ପାଇଁ କାହିଁକି ଜରୁରୀ ଏହି ସମୁଦ୍ର ପଥ?

ଅଧିକାରୀଙ୍କ ସୂଚନା ଅନୁଯାୟୀ, ମାର୍ଚ୍ଚ ମାସ ଆରମ୍ଭରୁ ଏପର୍ଯ୍ୟନ୍ତ ଭାରତୀୟ ପତାକା ଥିବା ପ୍ରାୟ ୧୩ଟି ବାଣିଜ୍ୟିକ ଜାହାଜ ହୋର୍ମୁଜ୍ ଷ୍ଟ୍ରେଟ୍‌ ସଫଳତାର ସହ ପାର୍ କରିସାରିଛନ୍ତି। ଏଥିମଧ୍ୟରେ ୧୨ଟି ଏଲପିଜି ଟ୍ୟାଙ୍କର୍ ଏବଂ ଗୋଟିଏ ଅଶୋଧିତ ତେଲ  ଜାହାଜ ସାମିଲ ରହିଛି। ଭାରତ ନିଜର ଘରୋଇ ଆବଶ୍ୟକତା ପୂରଣ କରିବା ପାଇଁ ବହୁ ମାତ୍ରାରେ ବିଦେଶୀ ଆମଦାନୀ ଉପରେ ନିର୍ଭର କରେ, ତେଣୁ ଏହି ରୁଟ୍‌ରେ ସାମାନ୍ୟ ବାଧା ସୃଷ୍ଟି ହେଲେ ଦେଶରେ ଗ୍ୟାସ୍ ଓ ତେଲ ଯୋଗାଣ ପ୍ରଭାବିତ ହେବାର ଆଶଙ୍କା ରହିଛି।

ଜାତିସଂଘରେ ସ୍ୱର ଉତ୍ତୋଳନ କଲା ଭାରତ

ଜାତିସଂଘ (UN) ରେ ଭାରତର ସ୍ଥାୟୀ ପ୍ରତିନିଧି ପାର୍ବଥାନେନି ହରିଶ ଏହି ସାମୁଦ୍ରିକ ବିବାଦକୁ ନେଇ ଗଭୀର ଚିନ୍ତା ପ୍ରକଟ କରିଛନ୍ତି। ସେ କହିଛନ୍ତି ଯେ, ହୋର୍ମୁଜରେ ବାଣିଜ୍ୟିକ ଜାହାଜଗୁଡ଼ିକୁ ଟାର୍ଗେଟ୍ କରିବା ଏବଂ ସେମାନଙ୍କ କ୍ରିଉ ସଦସ୍ୟଙ୍କ ଜୀବନକୁ ବିପଦରେ ପକାଇବା ଆଦୌ ଗ୍ରହଣୀୟ ନୁହେଁ। ସମୁଦ୍ର ପଥରେ ସମସ୍ତଙ୍କ ପାଇଁ ମୁକ୍ତ ଯାତାୟାତ ସ୍ୱାଧୀନତା ରହିବା ଉଚିତ ବୋଲି ସେ ଦୃଢ଼ ଭାବେ ଉପସ୍ଥାପନ କରିଛନ୍ତି।

ସୂଚନାଯୋଗ୍ୟ, ଗତ ମେ ୧୩ ରେ ଓମାନ ଉପକୂଳ ନିକଟରେ ଏକ ଭାରତୀୟ ବାଣିଜ୍ୟ ଜାହାଜ ଉପରେ ଆକ୍ରମଣ ହୋଇଥିଲା। ତେବେ ଓମାନ ପ୍ରଶାସନ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରି ଜାହାଜରେ ଥିବା ସମସ୍ତ ୧୪ ଜଣ କର୍ମଚାରୀଙ୍କୁ ସୁରକ୍ଷିତ ଉଦ୍ଧାର କରିଥିଲେ। ସେହି ଆକ୍ରମଣ ପଛରେ କାହାର ହାତ ଥିଲା, ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ।