ଲକ୍ଷ୍ନୌ –ଉତ୍ତର ପ୍ରଦେଶର ଫତେହପୁର ଜିଲ୍ଲାରେ ଶନିବାର ଦିନ ଖାଗା ତହସିଲରେ ଆୟୋଜିତ ସମ୍ପୂର୍ଣ୍ଣ ସମାଧାନ ଦିବସରେ ସେହି ସମୟରେ ଏକ ଭାବୁକ ପରିବେଶ ସୃଷ୍ଟି ହୋଇଗଲା, ଯେତେବେଳେ ବାଡ଼ି ସାହାରାରେ ପହଞ୍ଚିଥିବା ଜଣେ ୭୦ ବର୍ଷର ବୃଦ୍ଧ ଜିଲ୍ଲାପାଳଙ୍କ ସାମ୍ନାରେ ଛିଡ଼ା ହୋଇ କହିଲେ, "ଆଜ୍ଞା, ମୁଁ ଜୀବିତ ଅଛି।" ବୃଦ୍ଧଙ୍କ ଗୁହାରି ଶୁଣି ସେଠାରେ ଉପସ୍ଥିତ ଅଧିକାରୀମାନେ ମଧ୍ୟ ଆଶ୍ଚର୍ଯ୍ୟ ହୋଇଗଲେ। ସରକାରୀ ଫାଇଲରେ ମରିଯାଇଥିବା ଏହି ବୃଦ୍ଧଙ୍କ କଥା ଶୁଣି ଜିଲ୍ଲାପାଳ ଯେତିକି ଚକିତ ହୋଇଥିଲେ ସେତିକି ରାଗିଥିଲେ। 

ଜିଲ୍ଲାପାଳ ନିଧି ବତ୍ସ ତହସିଲ କର୍ମଚାରୀମାନଙ୍କୁ ଭର୍ତ୍ସନା କରିବା ସହିତ  ସମ୍ପୂର୍ଣ୍ଣ ମାମଲାର ତଦନ୍ତ ନିର୍ଦ୍ଦେଶ ଦେଇଥିଲେ। ସେ ବୃଦ୍ଧଙ୍କୁ ସବୁ ପ୍ରକାର ସମ୍ଭବ ସାହାଯ୍ୟର ଆଶ୍ୱାସନା ଦେଇଛନ୍ତି।  ଅନ୍ୟପଟେ ତହସିଲରେ ଉପସ୍ଥିତ ଅନ୍ୟ ଅଭିଯୋଗକାରୀମାନେ ମଧ୍ୟ ଚକିତ ହୋଇଗଲେ।

କ’ଣ ଅଟେ ସମ୍ପୂର୍ଣ୍ଣ ମାମଲା?

ସୂଚନା ଅନୁଯାୟୀ, ଖାଗା ତହସିଲ ଅଞ୍ଚଳର ୱାଲିପୁର ଏକଡଲା ଗ୍ରାମର ବାସିନ୍ଦା ଭୂରା ଜିଲ୍ଲାପାଳଙ୍କ ସାମ୍ନାରେ ଛିଡ଼ା ହୋଇ କହିଲେ ଯେ ମୁଁ ମରିନାହିଁ ଜୀବିତ ଅଛି। ଏହା ଶୁଣି ଜିଲ୍ଲାପାଳ କ୍ରୋଧିତ ହୋଇଗଲେ ଏବଂ କର୍ମଚାରୀମାନଙ୍କୁ ପ୍ରବଳ ଗାଳି କଲେ। ବୃଦ୍ଧ ଭୂରା ଜିଲ୍ଲାପାଳ ନିଧି ଗୁପ୍ତା ବତ୍ସଙ୍କୁ ଆବେଦନ ପତ୍ର ଦେଇ ଅଭିଯୋଗ କଲେ ଯେ ଲେଖପାଳ ଏବଂ ତହସିଲର କିଛି କର୍ମଚାରୀ ମିଶିକରି ତାଙ୍କୁ ସରକାରୀ ଦସ୍ତାବିଜ୍ରେ ମୃତ ଘୋଷଣା କରିଛନ୍ତି।  ଏତିକି ନୁହେଁ, ତାଙ୍କର ପ୍ରାୟ ଜମି ଅନ୍ୟ ଜଣେ ବ୍ୟକ୍ତିଙ୍କ ନାମରେ ଉତ୍ତରାଧିକାରୀ ସୂତ୍ରରେ କରିଦିଆଯାଇଛି। 

ବୃଦ୍ଧ ଜଣକ କହିଥିଲେ ଯେ ଯେତେବେଳେ ତାଙ୍କୁ ଏହି ଜାଲିଆତି ବିଷୟରେ ସୂଚନା ମିଳିଲା, ସେତେବେଳେ ସେ ନ୍ୟାୟ ପାଇଁ ଅଧିକାରୀମାନଙ୍କ ପାଖକୁ ଦୌଡ଼ିବାକୁ ବାଧ୍ୟ ହେଲେ। ଅନେକ ଦିନ ଧରି ଦୌଡିବା ପରେ ମଧ୍ୟ ତାଙ୍କୁ ନ୍ୟାୟ ମିଳିନଥିଲା। ତେଣୁ ସେ ଆଜି ଖାଗା ତହସିଲରେ ଆୟୋଜିତ ସମ୍ପୂର୍ଣ୍ଣ ସମାଧାନ ଦିବସରେ ସେ ଜିଲ୍ଲାପାଳଙ୍କ ସାମ୍ନାରେ ନିଜର ଦୁଃଖ ଜଣାଇବାକୁ ଆସିଛନ୍ତି  ।

ଜିଲ୍ଲାପାଳ ଦେଲେ କାର୍ଯ୍ୟାନୁଷ୍ଠାନ ନିର୍ଦ୍ଦେଶ

ବୃଦ୍ଧଙ୍କ କଥା ଶୁଣି ଜିଲ୍ଲାପାଳ ନିଧି ଗୁପ୍ତା ବତ୍ସ ମଧ୍ୟ ଆଶ୍ଚର୍ଯ୍ୟ ହୋଇଗଲେ। ସେ ମାମଲାକୁ ଗମ୍ଭୀରତାର ସହ ନେଇ ତୁରନ୍ତ ତଦନ୍ତ କରିବାକୁ ନିର୍ଦ୍ଦେଶ ଦେଲେ ଏବଂ ଦୋଷୀମାନଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନର ଆଶ୍ୱାସନା ଦେଲେ। ଏହା ସହିତ ବୃଦ୍ଧଙ୍କୁ ସବୁ ପ୍ରକାର ସମ୍ଭବ ନ୍ୟାୟ ପ୍ରଦାନ କରିବାକୁ କହିଲେ।

ଏହି ଘଟଣା ତହସିଲ ପ୍ରଶାସନର କାର୍ଯ୍ୟଶୈଳୀ ଉପରେ ଗମ୍ଭୀର ପ୍ରଶ୍ନବାଚୀ ସୃଷ୍ଟି କରିଛି। ଗ୍ରାମବାସୀଙ୍କ ମଧ୍ୟରେ ମଧ୍ୟ ଏହି ମାମଲାକୁ ନେଇ ଅସନ୍ତୋଷ ଦେଖିବାକୁ ମିଳୁଛି। ଲୋକଙ୍କ କହିବା କଥା ହେଉଛି ଯେ ଯଦି ସମୟ ଥାଉ ଥାଉ ଏହି ମାମଲାର ପର୍ଦ୍ଦାଫାଶ ହୋଇନଥାନ୍ତା, ତେବେ ବୃଦ୍ଧ ଜଣକ ନିଜ ଜମିରୁ ସବୁଦିନ ପାଇଁ ବେଦଖଲ ହୋଇଯାଇଥାନ୍ତେ।