ନୂଆଦିଲ୍ଲୀ: ଇଣ୍ଡିଆନ୍ ପ୍ରିମିୟର ଲିଗ୍(ଆଇପିଏଲ) ୨୦୨୬ ସଂସ୍କରଣ ପୂର୍ବରୁ ଆସିଛି ବଡ଼ ଖବର। ଆଇପିଏଲ୍ ୨୦୨୬ ନ ଖେଳିବାକୁ ନିଷ୍ପତ୍ତି ନେଇଛନ୍ତି ଦକ୍ଷିଣ ଆଫ୍ରିକାର ଖେଳାଳି ଫାଫ ଡୁ ପ୍ଲେସିସ୍। ରୟାଲ ଚ୍ୟାଲେଞ୍ଜର୍ସ ଏବଂ ଦିଲ୍ଲୀ କ୍ୟାପିଟାଲ୍ସ ସମେତ ଚାରୋଟି ଦଳ ପାଇଁ ଖେଳିଥିବା ଫାଫ୍ ଡୁ ପ୍ଲେସିସ୍ ଆଇପିଏଲ୍ ୨୦୨୬ ନିଲାମରୁ ଓହରି ଯାଇଛନ୍ତି। ସେ ସୋସିଆଲ ମିଡିଆରେ ଏକ ପୋଷ୍ଟ ମାଧ୍ୟମରେ ଏହାର ସୂଚନା ଦେଇଛନ୍ତି। ସେ କହିଛନ୍ତି, ଡିସେମ୍ବର ୧୬ ତାରିଖରେ ଅନୁଷ୍ଠିତ ହେବାକୁ ଥିବା ମିନି ନିଲାମରେ ସାମିଲ ହେବେ ନାହିଁ। ସେ ଆଇପିଏଲ୍ ଛାଡି ପାକିସ୍ତାନ ସୁପର ଲିଗ୍ (ପିଏସଏଲ ୨୦୨୬) ଖେଳିବାକୁ ନିଷ୍ପତ୍ତି ନେଇଛନ୍ତି।
୪୧ ବର୍ଷୀୟ ଫାଫ୍ ଡୁ ପ୍ଲେସିସ୍ ସୋସିଆଲ ମିଡିଆରେ ଏକ ବିବୃତ୍ତି ଜାରି କରି ଲେଖିଛନ୍ତି, ଆଇପିଏଲରେ ୧୪ ବର୍ଷ ଖେଳିବା ପରେ, ମୁଁ ଏଥର ନିଲାମର ଅଂଶ ନ ହେବାକୁ ନିଷ୍ପତ୍ତି ନେଇଛି। ଏହା ଏକ ବଡ଼ ନିଷ୍ପତ୍ତି। ଡୁ ପ୍ଲେସିସ୍ ଆହୁରି କହିଛନ୍ତି ଯେ ସେ ଭିନ୍ନ ଭିନ୍ନ ଦଳରେ ଭିନ୍ନ ଭିନ୍ନ ଖେଳାଳିଙ୍କ ସହ ଖେଳିବାର ସୌଭାଗ୍ୟ ପାଇଛନ୍ତି।
ଆଇପିଏଲକୁ ଅଲବିଦା କହୁନି
ଫାଫ୍ ଡୁ ପ୍ଲେସିସ୍ ଲେଖିଛନ୍ତି, "୧୪ ବର୍ଷ ବହୁତ ଲମ୍ବା ସମୟ। ଏହି ସମୟ ମଧ୍ୟରେ ମୁଁ ଯାହା ହାସଲ କରିଛି ତାହା ପାଇଁ ମୁଁ ଗର୍ବିତ। ଭାରତ ମୋ ହୃଦୟରେ ଏକ ସ୍ୱତନ୍ତ୍ର ସ୍ଥାନ ରଖିଛି ଏବଂ ଏହା ମୋର ଆଇପିଏଲକୁ ବିଦାୟ ନୁହେଁ। ମୋତେ ପୁଣି ଥରେ ଆଇପିଏଲରେ ଦେଖିବାକୁ ପାଇବେ।" ଡୁ ପ୍ଲେସିସ୍ ଏହା ମଧ୍ୟ ଲେଖିଛନ୍ତି ଯେ ସେ ପାକିସ୍ତାନରେ ତାଙ୍କୁ ମିଳୁଥିବା ଆତିଥ୍ୟ ପାଇଁ ଉତ୍ସାହିତ।
ଫାଫ୍ ଡୁ ପ୍ଲେସିସ୍ ଆରସିବିର ଅଧିନାୟକତ୍ୱ କରିଛନ୍ତି ଏବଂ ଗତ ସିଜନରେ ଦିଲ୍ଲୀ କ୍ୟାପିଟାଲ୍ସ ପାଇଁ ଖେଳିଛନ୍ତି। ସେ ତାଙ୍କ ୧୫୪ ମ୍ୟାଚ୍ ବିଶିଷ୍ଟ ଆଇପିଏଲ କ୍ୟାରିୟରରେ ୪,୭୭୩ ରନ୍ କରିଛନ୍ତି। ଏଥିରେ ୩୯ଟି ଅର୍ଦ୍ଧଶତକ ସାମିଲ୍। ସେ ପିଏସଏଲ ୨୦୨୬ରେ ଖେଳିବାକୁ ଏକ ନୂତନ ଚ୍ୟାଲେଞ୍ଜ ଭାବରେ ବର୍ଣ୍ଣନା କରିଛନ୍ତି। ଉଲ୍ଲେଖଯୋଗ୍ୟ ଯେ ଡୁ ପ୍ଲେସିସ୍ ଏପର୍ଯ୍ୟନ୍ତ ପିଏସଏଲରେ ଦୁଇଟି ଦଳ ପାଇଁ ଖେଳିଛନ୍ତି। ସେ କ୍ଵେଟା ଗ୍ଲାଡିଏଟର୍ସ ଏବଂ ପେଶାୱାର ଜାଲମି ପାଇଁ ମୋଟ ଛଅଟି ମ୍ୟାଚ୍ ଖେଳିଛନ୍ତି।
Also read: ଓପନିଂ ପାଇଁ ୩ ଦାବିଦାର, ତିଳକ-ପନ୍ତଙ୍କ ମଧ୍ୟରୁ କିଏ ? ପ୍ରଥମ ଦିନିକିଆରେ ଏମିତି ହୋଇପାରେ ପ୍ଲେଇଙ୍ଗ ଇଲେଭେନ