ନୂଆଦିଲ୍ଲୀ: ମଣିପୁରରେ ପୁଣିଥରେ ପରିସ୍ଥିତି ଅଶାନ୍ତ ହୋଇପଡ଼ିଛି। ସଦ୍ୟତମ ହିଂସା କାରଣରୁ ରବିବାର ରାତି ଏବଂ ସୋମବାର ସକାଳ ମଧ୍ୟରେ ଘଟିଥିବା ଦୁଇଟି ଭିନ୍ନ ଘଟଣାରେ ମୋଟ ୪ ଜଣଙ୍କର ପ୍ରାଣହାନୀ ଘଟିଛି। ଏହି ମୃତ୍ୟୁକୁ ନେଇ ସ୍ଥାନୀୟ ଅଞ୍ଚଳରେ ତୀବ୍ର ଅସନ୍ତୋଷ ଦେଖାଦେଇଥିବାବେଳେ ଉତ୍ତ୍ୟକ୍ତ ଲୋକମାନେ ମୃତଦେହ ଧରି ସିଧାସଳଖ ମୁଖ୍ୟମନ୍ତ୍ରୀଙ୍କ ବାସଭବନ ସାମ୍ନାରେ ପହଞ୍ଚିଥିଲେ।

ସୋମବାର ସକାଳେ ଇମ୍ଫାଲରେ ଏଭଳି ଏକ ଅଭାବନୀୟ ଦୃଶ୍ୟ ଦେଖିବାକୁ ମିଳିଥିଲା। ଉତ୍ତ୍ୟକ୍ତ ଜନତା ହତ୍ୟାକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରି ଦୁଇଟି ଶବକୁ ମୁଖ୍ୟମନ୍ତ୍ରୀ ୱାଇ. ଖେମଚନ୍ଦ ସିଂହଙ୍କ ସରକାରୀ ବାସଭବନର ମୁଖ୍ୟ ଫାଟକ ସାମ୍ନାରେ ରଖି ପ୍ରଦର୍ଶନ କରିଥିଲେ। ପରିସ୍ଥିତି ଅତି ନିୟନ୍ତ୍ରଣ ବାହାରକୁ ଯିବାରୁ ସୁରକ୍ଷାକର୍ମୀମାନଙ୍କୁ ବାଧ୍ୟ ହୋଇ ଲୁହବୁହା ଗ୍ୟାସ୍ ବ୍ୟବହାର କରିବାକୁ ପଡ଼ିଥିଲା।

ଜଙ୍ଗଲରୁ କାଠ ସଂଗ୍ରହ ବେଳେ ଗୁଳିମାଡ଼

ପିଟିଆଇ (PTI) ସୂତ୍ରରୁ ମିଳିଥିବା ସୂଚନା ଅନୁଯାୟୀ, ଇମ୍ଫାଲ ପୂର୍ବ ଏବଂ କାଙ୍ଗପୋକପି ଜିଲ୍ଲା ସୀମାନ୍ତରେ ଏହି ଗୁଳିମାଡ଼ କାଣ୍ଡ ଘଟିଛି। ଗାଁର କିଛି ଲୋକ ଜଙ୍ଗଲରୁ ଜାଳେଣି କାଠ ସଂଗ୍ରହ କରିବାକୁ ଯାଇଥିବା ସମୟରେ ସନ୍ଦିଗ୍ଧ ଉଗ୍ରବାଦୀମାନେ ହଠାତ୍ ସେମାନଙ୍କୁ ଟାର୍ଗେଟ କରି ଆକ୍ରମଣ କରିଥିଲେ।

ଏହି ଗୁଳିକାଣ୍ଡରେ ପ୍ରାଣ ହରାଇଥିବା ବ୍ୟକ୍ତିମାନଙ୍କ ମଧ୍ୟରୁ ଦୁଇ ଜଣଙ୍କ ପରିଚୟ ମିଳିଛି। ସେମାନେ ହେଲେ ୩୫ ବର୍ଷୀୟ ଅରୁବମ ରୋନିଲ ଏବଂ ୫୧ ବର୍ଷୀୟ ଲୈରେନଲାକପମ ଇନୋବି। ସୋମବାର ସକାଳ ପ୍ରାୟ ୭ଟା ସମୟରେ ପ୍ରାୟ ୧୬ ଜଣିଆ ଗ୍ରାମବାସୀଙ୍କ ଏକ ଦଳ ନିକଟସ୍ଥ ପାହାଡ଼କୁ କାଠ ଆଣିବାକୁ ଯାଇଥିବାବେଳେ ଏହି ଅଘଟଣ ଘଟିଥିଲା। ଗୁଳିମାଡ଼ରେ ଆହତ ହୋଇଥିବା ଲୋକଙ୍କୁ ତୁରନ୍ତ ଡାକ୍ତରଖାନା ନିଆଯାଇଥିଲା। ଘଟଣା ପରେ ଆଉ କିଛି ଲୋକଙ୍କ ସନ୍ଧାନ ପାଇଁ ତଲାସୀ ଅଭିଯାନ ଜାରି ରହିଛି।

ପୋଲିସର କାର୍ଯ୍ୟାନୁଷ୍ଠାନ ଓ ସୁରକ୍ଷା ବ୍ୟବସ୍ଥା କଡ଼ାକଡ଼ି

ମୃତ୍ୟୁ ଖବର ପ୍ରଚାରିତ ହେବାମାତ୍ରେ ଇମ୍ଫାଲର ବିଭିନ୍ନ ସ୍ଥାନରୁ ଶହ ଶହ ଲୋକ ଏକାଠି ହୋଇ ପ୍ରତିବାଦ କରିଥିଲେ। ପରିସ୍ଥିତିକୁ ନିୟନ୍ତ୍ରଣକୁ ଆଣିବା ପାଇଁ ପୋଲିସ ଏବଂ ସୁରକ୍ଷାକର୍ମୀମାନେ ବଳ ପ୍ରୟୋଗ କରି ଲୁହବୁହା ଗ୍ୟାସ୍ ପ୍ରୟୋଗ କରିଥିଲେ ଏବଂ ପରେ ସେଠାରୁ ମୃତଦେହଗୁଡ଼ିକୁ ଉଦ୍ଧାର କରି ଜବାହରଲାଲ ନେହେରୁ ଇନଷ୍ଟିଚ୍ୟୁଟ୍ ଅଫ୍ ମେଡିକାଲ ସାଇନ୍ସେସ୍ (JNIMS) କୁ ପଠାଇ ଦେଇଥିଲେ।

ରାଜ୍ୟର ପାହାଡ଼ି ଜିଲ୍ଲାଗୁଡ଼ିକରେ କିଛି ଦିନ ହେବ ଲଗାତାର ହିଂସାତ୍ମକ ଘଟଣା ସାମ୍ନାକୁ ଆସୁଛି। ଏହା ପୂର୍ବରୁ କାମଜୋଙ୍ଗ ଜିଲ୍ଲାର ଚସ୍ସାଦ ଗାଁରେ ମଧ୍ୟ କୁକି ଓ ନାଗା ସମାଜର ସଶସ୍ତ୍ର ଗୋଷ୍ଠୀଙ୍କ ମଧ୍ୟରେ ଗୁଳିବିନିମୟ ଘଟି ଜଣଙ୍କର ମୃତ୍ୟୁ ହୋଇଥିଲା। ବାରମ୍ବାର ଏପରି ଗୋଷ୍ଠୀଗତ ହିଂସା ଘଟୁଥିବାରୁ ସାଧାରଣ ଜନତାଙ୍କ ମଧ୍ୟରେ ଭୟ ଏବଂ ଅସନ୍ତୋଷ ବୃଦ୍ଧି ପାଇଛି।