ଇନ୍ଦୋର: ମଧ୍ୟପ୍ରଦେଶ ଇନ୍ଦୋର ଉନ୍ନୟନ ପ୍ରାଧିକରଣ କଂଗ୍ରେସ ଦଳର ହେବାକୁ ଥିବା "ଛାତ୍ରୋଁ କି ଗୁଞ୍ଜ୍" କାର୍ଯ୍ୟକ୍ରମ ପାଇଁ କଂଗ୍ରେସଠାରୁ ଜମା ରାଶି ନେଇଛନ୍ତି । ସେପ୍ଟେମ୍ବର ୧୯ ତାରିଖରେ ହେବାକୁ ଥିବା ରାହୁଲ ଗାନ୍ଧୀଙ୍କ ସଭା ପାଇଁ ଏକ ଅସ୍ଥାୟୀ ଜମି ଲିଜ୍ ବାବଦକୁ ଆଇଡିଏ ପାଖରେ ଅତିରିକ୍ତ ୪.୦୩  ଲକ୍ଷ ଜମା କରିଛି । ଏହା ଦ୍ୱାରା କାର୍ଯ୍ୟକ୍ରମ ସ୍ଥାନର ମୋଟ ଲିଜ୍ ପରିମାଣ ୧୪.୧୧ ଲକ୍ଷକୁ ବୃଦ୍ଧି ପାଇଛି।

ବିଜେପି ରାଜ୍ୟ ମୁଖପାତ୍ର ରାକେଶ ସିଂହ ଯାଦବ ଏକ ଅଭିଯୋଗ ଦାଖଲ କରିଥିଲେ ଯେ କଂଗ୍ରେସ ଅନୁମତିର ସର୍ତ୍ତାବଳୀ ଉଲ୍ଲଂଘନ କରୁଛି । ନିର୍ଦ୍ଧାରିତ ସମୟ ସୀମା ପୂର୍ବରୁ ଜମି ବ୍ୟବହାର କରୁଛି। ଇନ୍ଦୋର ଉନ୍ନୟନ ପ୍ରାଧିକରଣ ନଗର କଂଗ୍ରେସ କମିଟି ସଭାପତି ଚିଣ୍ଟୁ ଚୌକସେଙ୍କୁ ଏକ ଚିଠି ଜାରି କରିଛି । ସେପ୍ଟେମ୍ବର ୧୭ ରୁ ୧୯ ତାରିଖ ପର୍ଯ୍ୟନ୍ତ ୧୨,୦୦୦ ବର୍ଗ ମିଟର ଜମି ଲିଜ୍ ପାଇଁ ଆବଣ୍ଟିତ ହୋଇଥିଲା । କିନ୍ତୁ ଯାଞ୍ଚରୁ ଜଣାପଡ଼ିଛି ଯେ ଦଳ ସେପ୍ଟେମ୍ବର ୧୪ ତାରିଖରୁ ୪,୮୦୦ ବର୍ଗ ମିଟର ଜମି ଦଖଲ କରି ବ୍ୟବହାର କରୁଛି। ଏଥିପାଇଁ ଆଇଡିଏ ତିନି ଦିନ ପାଇଁ ଅତିରିକ୍ତ ଶୁଳ୍କ ଲଗାଇଥିଲା । 

ନଗର କଂଗ୍ରେସ ସଭାପତି ଚିଣ୍ଟୁ ଚୌକସେ ଦୃଢ଼ ପ୍ରତିବାଦ କରି କହିଛନ୍ତି ଯେ ପ୍ରଶାସନ ନିରପେକ୍ଷ ଭାବରେ କାର୍ଯ୍ୟ କରିବା ପରିବର୍ତ୍ତେ କେବଳ ଶାସକ ବିଜେପି ନେତାଙ୍କ ଇଙ୍ଗିତରେ ଏବଂ ରାଜନୈତିକ ଚାପରେ ନିଷ୍ପତ୍ତି ନେଉଛି । ନେହେରୁ ଷ୍ଟାଡିୟମ ପାଇଁ ଅନୁମତି ନ ମିଳିବା ପରେ ସ୍ଥାନ ପରିବର୍ତ୍ତନ କରାଯାଇଥିଲା।

ଉଲ୍ଲେଖନୀୟ, କଂଗ୍ରେସ ପ୍ରଥମେ ସେପ୍ଟେମ୍ବର ୧୨ ତାରିଖରେ ସହରର ଐତିହାସିକ ଜବାହରଲାଲ ନେହେରୁ ଷ୍ଟାଡିୟମରେ ଏହି କାର୍ଯ୍ୟକ୍ରମ ଆୟୋଜନ କରିବାକୁ ଚାହୁଁଥିଲା। କିନ୍ତୁ, ମେୟର ପୁଷ୍ୟମିତ୍ର ଭାର୍ଗବ ମଧ୍ୟପ୍ରଦେଶ ହାଇକୋର୍ଟର ପୂର୍ବ ନିର୍ଦ୍ଦେଶକୁ ଉଦ୍ଧୃତ କରି ଅନୁମତି ପ୍ରଦାନ କରିନଥିଲେ । କୋର୍ଟଙ୍କ ନିର୍ଦ୍ଦେଶ ଅନୁଯାୟୀ, ଷ୍ଟାଡିୟମକୁ କେବଳ କ୍ରୀଡା ଇଭେଣ୍ଟ ଏବଂ ରାଜ୍ୟସ୍ତରୀୟ ସରକାରୀ କାର୍ଯ୍ୟକ୍ରମ ପାଇଁ ବ୍ୟବହାର କରାଯାଇପାରିବ। ଏହା ପରେ, କଂଗ୍ରେସ କାର୍ଯ୍ୟକ୍ରମର ତାରିଖକୁ ସେପ୍ଟେମ୍ବର ୧୯ ପର୍ଯ୍ୟନ୍ତ ବୃଦ୍ଧି କରିଥିଲା ଏବଂ ଆଞ୍ଚଳିକ ଉଦ୍ୟାନ ସମ୍ମୁଖରେ ଥିବା ଆଇଡିଏ ଜମି ପାଇଁ ଆବେଦନ କରିଥିଲା।