ବଡ଼ଗାମ୍-ଦିଲ୍ଲୀ କାର୍ଗୋ ପାର୍ସଲ୍ ଟ୍ରେନ୍ ସେବା ବନ୍ଦ ହୋଇଯାଇଥିବା ଦାବିକୁ ରେଳବାଇ ଖାରଜ କରିଛି। ରେଳବାଇ କହିଛି ଯେ ଏହି ସେବା ସେପ୍ଟେମ୍ବର ୨୦୨୫ ରୁ ନିରନ୍ତର ଜାରି ରହିଛି ଏବଂ ଏହାଦ୍ୱାରା କୃଷକ ଓ ବ୍ୟବସାୟୀମାନେ ଲାଭବାନ ହେଉଛନ୍ତି।

ବଡ଼ଗାମ୍ ରୁ ଦିଲ୍ଲୀର ଆଦର୍ଶ ନଗର ମଧ୍ୟରେ ଚାଲୁଥିବା କାର୍ଗୋ ପାର୍ସଲ୍ ଟ୍ରେନ୍ ସେବା ବନ୍ଦ ହୋଇଯାଇଥିବା ଖବରକୁ ରେଳବାଇ ସମ୍ପୂର୍ଣ୍ଣ ରୂପେ ଖାରଜ କରିଦେଇଛି। ରେଳବାଇ ସ୍ପଷ୍ଟ କରିଛି ଯେ ଏହି ଟ୍ରେନ୍ ସେବା କ୍ରମାଗତ ଭାବେ ଚାଲୁରହିଛି ଏବଂ ଏହାକୁ କେବେବି ବନ୍ଦ (discontinue) କରାଯାଇନାହିଁ। ଏହି ଟ୍ରେନ୍ କଶ୍ମୀର ଉପତ୍ୟକାର କୃଷକ ଏବଂ ବ୍ୟବସାୟୀମାନଙ୍କ ପାଇଁ ବହୁତ ଲାଭଦାୟକ ପ୍ରମାଣିତ ହେଉଛି।

ଏହା ପୂର୍ବରୁ କଂଗ୍ରେସର ବରିଷ୍ଠ ନେତା ପବନ ଖେଡ଼ା ସୋସିଆଲ ମିଡିଆ ପ୍ଲାଟଫର୍ମ 'ଏକ୍ସ' (X) ରେ ଏକ ପୋଷ୍ଟ ସେୟାର କରି ରେଳମନ୍ତ୍ରୀ ଅଶ୍ୱିନୀ ବୈଷ୍ଣବଙ୍କୁ ଟାର୍ଗେଟ କରିଥିଲେ। ସେ ଅଭିଯୋଗ କରିଥିଲେ ଯେ ବଡ଼ଗାମ୍ ଏବଂ ଦିଲ୍ଲୀର ଆଦର୍ଶ ନଗର ମଧ୍ୟରେ ଆରମ୍ଭ କରାଯାଇଥିବା ପାର୍ସଲ୍ ଟ୍ରେନ୍ ସେବା କେବଳ ଗୋଟିଏ 'ପିଆର୍ ଷ୍ଟଣ୍ଟ' (PR Stunt) ହୋଇ ରହିଯାଇଛି ଏବଂ ଏହାକୁ ବନ୍ଦ କରିଦିଆଯାଇଛି, ଯାହାଫଳରେ କଶ୍ମୀରର ଫଳ ଚାଷୀମାନେ କ୍ଷତିସହିଛନ୍ତି।

ରେଳବାଇର ପଲଟୱାର୍ ଏବଂ ସ୍ପଷ୍ଟୀକରଣ

କଂଗ୍ରେସ ନେତାଙ୍କ ଅଭିଯୋଗର ତୁରନ୍ତ ଜବାବ ଦେଇ ଉତ୍ତର ରେଳବାଇ ନିଜର ଅଫିସିଆଲ୍ ହ୍ୟାଣ୍ଡେଲରୁ ସ୍ପଷ୍ଟୀକରଣ ଜାରି କରିଛି। ରେଳବାଇ ଜଣାଇଛି, "ବଡ଼ଗାମ୍ରୁ ଆଦର୍ଶ ନଗର, ଦିଲ୍ଲୀ ମଧ୍ୟରେ ଚାଲୁଥିବା କାର୍ଗୋ ପାର୍ସଲ୍ ଟ୍ରେନ୍ ସେବା ସମ୍ପୂର୍ଣ୍ଣ ଭାବେ କାର୍ଯ୍ୟକ୍ଷମ (Operational) ଅଛି ଏବଂ ଏହାକୁ ବନ୍ଦ କରାଯାଇନାହିଁ। ସେପ୍ଟେମ୍ବର ୨୦୨୫ ରୁ ଏହି ସେବା ନିରନ୍ତର ଜାରି ରହିଛି ଏବଂ କଶ୍ମୀର ଉପତ୍ୟକାର କୃଷକ ଓ ବ୍ୟବସାୟୀମାନଙ୍କ ପାଇଁ ଏହା ଏକ ବରଦାନ ସାବ୍ୟସ୍ତ ହୋଇଛି।"

ରେଳବାଇ ଆହୁରି ମଧ୍ୟ କହିଛି ଯେ ଏହି ପାର୍ସଲ୍ ଟ୍ରେନ୍ ଫଳ, ପନିପରିବା ଏବଂ ଅନ୍ୟାନ୍ୟ କୃଷିଜାତ ଦ୍ରବ୍ୟକୁ ଦ୍ରୁତ ଏବଂ ସୁରକ୍ଷିତ ଭାବରେ ଦେଶର ବଡ଼ ବଡ଼ ବଜାର ପର୍ଯ୍ୟନ୍ତ ପହଞ୍ଚାଉଛି। ରାଜପଥଗୁଡ଼ିକରେ ଭୂସ୍ଖଳନ ଏବଂ ଟ୍ରାଫିକ୍ ଜାମ୍ ସ୍ଥିତିରେ ଏହି ସେବା ଉପତ୍ୟକାର ଚାଷୀ ଏବଂ ବ୍ୟବସାୟୀମାନଙ୍କ ପାଇଁ ଏକ ମଜବୁତ ବିକଳ୍ପ ଭାବେ ଉଭା ହୋଇଛି।

ଜାଣନ୍ତୁ ଏପର୍ଯ୍ୟନ୍ତ ଟ୍ରେନ୍ରେ କେତେ ପରିବହନ ହୋଇଛି

ଆକଳନ ଅନୁଯାୟୀ, ଟ୍ରେନ୍ ନମ୍ବର ୦୦୪୬୨ ବଡ଼ଗାମ୍ - ଆଦର୍ଶନଗର ଦିଲ୍ଲୀ ମୋଟ ୩୩୨ VPs (SLRs ସମେତ) – ୭୩୮୯ ଟନ୍ ସାମଗ୍ରୀ ପରିବହନ ହୋଇଛି। ସେହିପରି ଟ୍ରେନ୍ ନମ୍ବର ୦୦୪୬୧ ଆଦର୍ଶନଗର ଦିଲ୍ଲୀ - ବଡ଼ଗାମ୍ ମୋଟ ୭୮୬ VPs (SLRs ସମେତ) – ୧୭୪୫୦ ଟନ୍ ସାମଗ୍ରୀ ପରିବହନ କରାଯାଇଛି।