କର୍ଣ୍ଣାଟକରେ ଖାଦ୍ୟ ସୁରକ୍ଷା ଓ ଗୁଣବତ୍ତା ବିଭାଗର ଅଧିକାରୀମାନେ ଗତ ତିନି ଦିନ ହେବ ରାଜଧାନୀ ବେଙ୍ଗାଲୁରୁର ହୋଟେଲଗୁଡ଼ିକରେ ଚଢ଼ାଉ କରୁଛନ୍ତି। ସେମାନେ ଏକାସାଙ୍ଗରେ ଅନେକ ଆଲିଶାନ ହୋଟେଲ, ଷ୍ଟାର୍ ହୋଟେଲ ଏବଂ ପ୍ରସିଦ୍ଧ ମଲ୍ଗୁଡ଼ିକରେ ଚଢ଼ାଉ କରି ଏହା ଯାଞ୍ଚ କରିଛନ୍ତି ଯେ ସେମାନେ ଲୋକଙ୍କୁ ଭଲ ଖାଦ୍ୟ ପରଷୁଛନ୍ତି କି ନାହିଁ? ଖାଦ୍ୟ ସୁରକ୍ଷା ବିଭାଗର ଅଧିକାରୀମାନେ ସହରର ଲକ୍ସରୀ ହୋଟେଲଗୁଡ଼ିକ ଉପରେ କାର୍ଯ୍ୟାନୁଷ୍ଠାନ ଆରମ୍ଭ କରିଦେଇଛନ୍ତି। ସେମାନେ ୩-ଷ୍ଟାର୍, ୫-ଷ୍ଟାର୍ ଏବଂ ୭-ଷ୍ଟାର୍ ହୋଟେଲର ରୋଷେଇ ଘରକୁ ଯାଇ ଖାଦ୍ୟ ସାମଗ୍ରୀଗୁଡ଼ିକର ଯାଞ୍ଚ କରୁଛନ୍ତି।

ଅଧିକାରୀମାନେ ସୋମବାର ସ୍କାଏ ୟୁବି ସିଟି, ରୋୟାଲ୍ ଚେନ୍ ହୋଟେଲ, ମଦ୍ରାସ କିଚେନ୍, ଟେସ୍କନ୍ ହୋଟେଲ ଏବଂ ସାଞ୍ଚେଜ୍ ହୋଟେଲରେ ଚଢ଼ଉ କରିଥିଲେ। ଚଢ଼ଉ ସମୟରେ ୟୁବି ସିଟି ହୋଟେଲରୁ ୪୫ କିଲୋ ପଚା ମାଂସ ଏବଂ ୧୫ ଲିଟର ଅନୁପଯୋଗୀ ରୋଷେଇ ତେଲ ଜବତ ହୋଇଛି।

ସୂଚନାଯୋଗ୍ୟ ଯେ, ସପ୍ତାହନ୍ତରେ ବହୁ ସଂଖ୍ୟାରେ ଲୋକ ହୋଟେଲକୁ ଆସିଥାନ୍ତି, ତେଣୁ ଖାଦ୍ୟ ସୁରକ୍ଷା ବିଭାଗର କମିଶନର ଶ୍ରୀନିବାସଙ୍କ ନେତୃତ୍ୱରେ ରାତିରେ ଏକ ଅଭିଯାନ ଚଲାଯାଇଥିଲା, ଯାହାଦ୍ୱାରା ଗ୍ରାହକଙ୍କୁ ଗୁଣାତ୍ମକ ଏବଂ ସୁରକ୍ଷିତ ଖାଦ୍ୟ ଯୋଗାଇଦେବା ନିଶ୍ଚିତ କରାଯାଇପାରିବ। ଏହି ସମୟରେ ଦଶରୁ ଅଧିକ ଅଧିକାରୀଙ୍କ ଏକ ଟିମ୍ ୟୁବି ସିଟି, ବ୍ରିଗେଡ୍ ରୋଡ୍ ଏବଂ ଏମ୍.ଜି. ରୋଡ୍ର ପ୍ରମୁଖ ହୋଟେଲଗୁଡ଼ିକରେ ଚଢ଼ଉ କରି ଯାଞ୍ଚ କରିଥିଲେ।

ପଚା ମାଂସ ସହ ମିଳିଲା ଏକ୍ସପାୟରୀ ଡେଟ୍ ସାମଗ୍ରୀ

ଏହି ସମ୍ବନ୍ଧରେ ବେଙ୍ଗାଲୁରୁ ଖାଦ୍ୟ ସୁରକ୍ଷା ବିଭାଗର କମିଶନର ଶ୍ରୀନିବାସ କହିଛନ୍ତି ଯେ ତିନୋଟି ସ୍ଥାନରେ ଚିକେନ୍, ମଟନ୍ ଏବଂ ମାଛକୁ ସଠିକ୍ ଭାବେ ଫ୍ରିଜ୍ କରାଯାଇ ନଥିଲା। ରୋୟାଲ୍ ଚେନ୍ ହୋଟେଲରେ ୫୦ କିଲୋ ଆମିଷ ଖାଦ୍ୟ ଏବଂ ଟସ୍କନ୍ ହୋଟେଲରେ ପନିପରିବା, ଏବଂ କେତେକ ସ୍ଥାନରେ ଶୁଖିଲା ଫଳ (ଡ୍ରାଇ ଫ୍ରୁଟ୍ସ)ର ଏକ୍ସପାୟରୀ ଡେଟ୍ ଶେଷ ହୋଇସାରିଥିଲା।

ସେ କହିଛନ୍ତି ଯେ ଚିକେନ୍ ଏବଂ ମଟନ୍କୁ ଡିପ୍ ଫ୍ରିଜରରେ ୧ ବର୍ଷ ପର୍ଯ୍ୟନ୍ତ ରଖାଯାଇପାରିବ। ମାଛକୁ କେବଳ ୧ ମାସ ପର୍ଯ୍ୟନ୍ତ ରଖାଯାଇପାରିବ, କିନ୍ତୁ ଏହାକୁ ତା’ଠାରୁ ଅଧିକ ସମୟ ଧରି ରଖାଯାଇଥିଲା। କେତେକ ସ୍ଥାନରେ ଏକ୍ସପାୟରୀ ଡେଟ୍ ବଦଳାଇ ଦିଆଯାଇଥିଲା ଏବଂ ପ୍ୟାକେଟ୍ ଉପରେ ଷ୍ଟିକର୍ ମରାଯାଇଥିଲା। ଆମେ ସମସ୍ତଙ୍କୁ ନୋଟିସ୍ ଜାରି କରି ୧୦-୧୫ଟି ନମୁନା ସଂଗ୍ରହ କରିଛୁ। ହୋଟେଲ ପରିଚାଳକମାନଙ୍କୁ ନିୟମ ବିଷୟରେ ସଠିକ୍ ସୂଚନା ନାହିଁ। ଆମେ ତୁରନ୍ତ ଏକ ଆଡଭାଇଜରୀ ଜାରି କରିବୁ।

ଏପର୍ଯ୍ୟନ୍ତ ୫୯ଟି ହୋଟେଲରେ ହୋଇଛି ରେଡ୍

ସେ କହିଛନ୍ତି ଯେ ଆମେ ହୋଟେଲଗୁଡ଼ିକ ଉପରେ ୫ ଲକ୍ଷ ଟଙ୍କା ପର୍ଯ୍ୟନ୍ତ ଜରିମାନା ଲଗାଇପାରିବୁ। କାଲି ସୁଦ୍ଧା ୫୯ଟି ହୋଟେଲର ଯାଞ୍ଚ ସରିଛି। ୩୦ ଜଣଙ୍କୁ ନୋଟିସ୍ ଜାରି କରାଯାଇଛି ଏବଂ ୬୫ଟି ନମୁନା FSL (ଫୋରେନ୍ସିକ୍ ସାଇନ୍ସ ଲାବୋରେଟୋରୀ) କୁ ପଠାଯାଇଛି। ଆମକୁ ରବିବାର ୟୁବି ସିଟି ଫୁଡ୍ ବିଷୟରେ ସୂଚନା ମିଳିଥିଲା।

ରାତି ପାର୍ଟି ଯୋଗୁଁ ଅଧିକ ଲୋକ ଆସିବାର ସମ୍ଭାବନା ଥିଲା, ତେଣୁ ଆମେ ୧୦ଟି ପବ୍ ଏବଂ ରେଷ୍ଟୋରାଣ୍ଟରେ ଚଢ଼ଉ କରିଥିଲୁ। ୪ଟି ପବ୍ ଏବଂ ରେଷ୍ଟୋରାଣ୍ଟକୁ ନୋଟିସ୍ ଜାରି କରାଯାଇଛି। ସରକାରୀ ଏବଂ ବେସରକାରୀ ଲାବୋରେଟୋରୀରେ ଯାଞ୍ଚ କରାଯାଇବ। ଆମେ କେନ୍ଦ୍ର ସରକାରଙ୍କ ନିର୍ଦ୍ଦେଶ ଅନୁଯାୟୀ ରମ୍ ଜବତ କରିଛୁ। ଟସ୍କନ୍ରେ ରମ୍ର ୩ଟି ବୋତଲ ଜବତ କରାଯାଇଛି।

ଦୋଷୀଙ୍କ ବିରୋଧରେ ହେବ କାର୍ଯ୍ୟାନୁଷ୍ଠାନ… କହିଲେ ମନ୍ତ୍ରୀ

ମନ୍ତ୍ରୀ ୟୁ.ଟି. ଖାଦର କହିଛନ୍ତି ଯେ ସେ ଭୁଲ୍ କରୁଥିବା କୌଣସି ବ୍ୟକ୍ତିଙ୍କୁ କ୍ଷମା କରିବେ ନାହିଁ। ବେଙ୍ଗାଲୁରୁ ହୋଟେଲଗୁଡ଼ିକରେ ସ୍ୱାସ୍ଥ୍ୟ ବିଭାଗର ଚଢ଼ଉ ସମ୍ବନ୍ଧରେ ଗଣମାଧ୍ୟମ ସହ କଥା ହୋଇ ସ୍ୱାସ୍ଥ୍ୟମନ୍ତ୍ରୀ ୟୁ.ଟି. ଖାଦର କହିଛନ୍ତି, “ଯାଞ୍ଚ କରିବା ଆମର ଦାୟିତ୍ୱ ଏବଂ ଏହା ଜାରି ରହିବ। ଅନେକ ସ୍ଥାନରେ ଚଢ଼ଉ କରାଯାଇ ନମୁନା ସଂଗ୍ରହ କରାଯାଇଛି। ଏହି ଚଢ଼ଉ କୌଣସି ନିର୍ଦ୍ଦିଷ୍ଟ ଅଞ୍ଚଳ ମଧ୍ୟରେ ସୀମିତ ନୁହେଁ।

ସେ ଚେତାବନୀ ଦେଇଛନ୍ତି ଯେ କିଡ୍ନୀ ସମସ୍ୟା ଏବଂ କ୍ୟାନ୍ସର ଭଳି ରୋଗ ସାମ୍ନାକୁ ଆସୁଛି। ଆମର ଲକ୍ଷ୍ୟ କେବଳ ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ନୁହେଁ, ବରଂ ଫାଇଭ୍ ଷ୍ଟାର୍ ହୋଟେଲଗୁଡ଼ିକୁ ନିଜର ଭୁଲ୍ ସୁଧାରିବାକୁ ପଡ଼ିବ। ଯଦି ସେମାନେ ଭୁଲ୍ କରନ୍ତି, ତେବେ ସେମାନଙ୍କୁ କ୍ଷମା କରାଯିବ ନାହିଁ।