ନୂଆଦିଲ୍ଲୀ:  ବେଆଇନ ବେଟିଂ ଆପ୍ 1xBet ସହ ଜଡିତ ମନି ଲଣ୍ଡରିଂ ମାମଲାରେ ଇଡି ଏକ ବଡ଼ କାର୍ଯ୍ୟାନୁଷ୍ଠାନ ଆରମ୍ଭ କରିଛି। ଏହି ମାମଲାରେ ପଚରାଉଚରା ପାଇଁ ଅନେକ ପ୍ରସିଦ୍ଧ ବ୍ୟକ୍ତିଙ୍କୁ ସମନ କରାଯାଇଛି। ସେପ୍ଟେମ୍ବର ୨୩ ରେ ପୂର୍ବତନ ଭାରତୀୟ କ୍ରିକେଟର ଯୁବରାଜ ସିଂହଙ୍କୁ ଦିଲ୍ଲୀ ମୁଖ୍ୟାଳୟରେ ହାଜର ହେବାକୁ ଇଡି ସମନ କରିଛି। ଏହା ସହିତ ଅଭିନେତା ସୋନୁ ସୁଦଙ୍କୁ ସେପ୍ଟେମ୍ବର ୨୪ରେ ପଚରାଉଚରା ପାଇଁ ଡକାଯାଇଛି ଏବଂ ସେପ୍ଟେମ୍ବର ୨୨ରେ କ୍ରିକେଟର ରବିନ ଉଥାପ୍ପାଙ୍କୁ ମଧ୍ୟ ସମନ କରାଯାଇଛି।

ଏହି ମାମଲାରେ ପୂର୍ବରୁ କ୍ରିକେଟର ସୁରେଶ ରାଇନା ଏବଂ ଶିଖର ଧାୱନଙ୍କୁ ମଧ୍ୟ ପଚରାଉଚରା କରାଯାଇଛି। ବଙ୍ଗାଳି ଅଭିନେତା ଅଙ୍କୁଶ ହାଜରା, ପୂର୍ବତନ ଟିଏମସି ସାଂସଦ ମିମି ଚକ୍ରବର୍ତ୍ତୀଙ୍କୁ ମଧ୍ୟ ଇଡି ପଚରାଉଚରା କରୁଛି ।

ସୂଚନା ଅନୁସାରେ, ଅଭିନେତ୍ରୀ ଉର୍ବଶୀ ରାଉତେଲା ଏପର୍ଯ୍ୟନ୍ତ ଇଡିକୁ ସ୍ପଷ୍ଟ କରିନାହାଁନ୍ତି ଯେ ସେ ତଦନ୍ତରେ ଯୋଗଦେବେ କି ନାହିଁ। ଇଡି ବର୍ତ୍ତମାନ ତାଙ୍କ ପକ୍ଷ ଶୁଣିବାକୁ ଅପେକ୍ଷା କରିଛନ୍ତି। ଏହି ମାମଲାରେ, ଇଡି ପୂର୍ବରୁ ଭାରତୀୟ କ୍ରିକେଟର ଶିଖର ଧାୱନ, ସୁରେଶ ରାଇନା ଏବଂ ହରଭଜନ ସିଂହଙ୍କୁ ପଚରାଉଚରା କରିସାରିଛି।

ଏବେ ଯୁବରାଜ ସିଂହ ଏବଂ ରବିନ ଉଥାପ୍ପାଙ୍କୁ ଅନଲାଇନ୍ ବେଟିଂ ଆପ୍ 1xBet ର ପ୍ରଚାର ସହିତ ଜଡିତ ଅଭିଯୋଗରେ ସମନ କରାଯାଇଛି। ରବିନ ଉଥାପ୍ପା ୨୦୦୭ରେ ଖେଳାଯାଇଥିବା ପ୍ରଥମ T20 ବିଶ୍ୱକପର ବିଜେତା ଭାରତୀୟ ଦଳର ଏକ ଗୁରୁତ୍ୱପୂର୍ଣ୍ଣ ଅଂଶ ଥିଲେ। ମହେନ୍ଦ୍ର ସିଂହ ଧୋନିଙ୍କ ଅଧିନାୟକତ୍ୱରେ, ଭାରତ ଏକ ରୋମାଞ୍ଚକର ଫାଇନାଲ୍ ମ୍ୟାଚ୍ ରେ ପାକିସ୍ତାନକୁ ୫ ରନରେ ପରାସ୍ତ କରି ଇତିହାସ ସୃଷ୍ଟି କରିଥିଲା। ସେହି ଫାଇନାଲ୍ ରେ ଉଥାପ୍ପା ୮ ରନ ଯୋଗଦାନ ଦେଇଥିଲେ।

ସମ୍ପୂର୍ଣ୍ଣ ଘଟଣାଟି କ'ଣ

ଏହି ତଦନ୍ତ କଥିତ ଅବୈଧ ଅନଲାଇନ୍ ବେଟିଂ ଆପ୍ ସହିତ ଜଡିତ। ଅଭିଯୋଗ କରାଯାଇଛି ଯେ ଏହି ଆପ୍ ମାଧ୍ୟମରେ ଅନେକ ନିବେଶକ ଏବଂ ସାଧାରଣ ଲୋକଙ୍କଠାରୁ କୋଟି କୋଟି ଟଙ୍କା ଠକେଇ କରାଯାଇଥିଲା, ଏବଂ ବଡ଼ ଧରଣର ଟିକସ ଫାଙ୍କି ଦିଆଯାଇଥିଲା ।

ଅନ୍ୟପକ୍ଷରେ, କମ୍ପାନୀ ଦାବି କରୁଛି ଯେ 1xBet ଏକ ବିଶ୍ୱସ୍ତରୀୟ ପ୍ଲାଟଫର୍ମ ଯାହାର ବେଟିଂ ଶିଳ୍ପରେ ୧୮ ବର୍ଷର ଅଭିଜ୍ଞତା ଅଛି। କମ୍ପାନୀ ଅନୁଯାୟୀ, ସେମାନଙ୍କ ପ୍ଲାଟଫର୍ମ ସହିତ ଜଡିତ ବ୍ୟବହାରକାରୀମାନେ ହଜାର ହଜାର କ୍ରୀଡା ଇଭେଣ୍ଟରେ ବେଟିଂ କରିବାର ସୁବିଧା ପାଆନ୍ତି। ଏହା ସହିତ, ସେମାନଙ୍କର ୱେବସାଇଟ୍ ଏବଂ ମୋବାଇଲ୍ ଆପ୍ ୭୦ରୁ ଅଧିକ ଭାଷାରେ ଉପଲବ୍ଧ।

ଅଧିକା ପଢନ୍ତୁ: ଏହି ଦିନ ଏସିଆ କପରୁ ପାକିସ୍ତାନର ହେବ ଛୁଟି ? ସୁପର-୪ ପୂର୍ବରୁ ବାଦ୍ ପଡିବାର ଦ୍ୱାର ଦେଶରେ ଦଳ