ଜମ୍ମୁ: ଜମ୍ମୁ-କଶ୍ମୀର ବିଧାନସଭା ନିର୍ବାଚନ ସରିବା ମାତ୍ରେ ବିଜେପି ସଂଗଠନରେ ନୂଆ ନିଯୁକ୍ତି ଆରମ୍ଭ କରିଛି। ବିଜେପି ପକ୍ଷରୁ ଶତ ଶର୍ମାଙ୍କୁ ଦଳର ରାଜ୍ୟ ସଭାପତି ଭାବେ ନିଯୁକ୍ତ କରାଯାଇଛି। ରାଷ୍ଟ୍ରୀୟ ଅଧ୍ୟକ୍ଷ ଜଗତ ପ୍ରକାଶ ନଡ୍ଡା ସତ ଶର୍ମାଙ୍କୁ ଭାରତୀୟ ଜନତା ପାର୍ଟି ଜମ୍ମୁ-କଶ୍ମୀରର ରାଜ୍ୟ ସଭାପତି ଭାବେ ନିଯୁକ୍ତ କରିଛନ୍ତି। ରବୀନ୍ଦ୍ର ରାଇନାଙ୍କୁ ଦଳର ରାଷ୍ଟ୍ରୀୟ କାର୍ଯ୍ୟକାରିଣୀ ସଦସ୍ୟ ଭାବେ ନିଯୁକ୍ତ କରାଯାଇଛି। ବିଧାନସଭା ନିର୍ବାଚନ ପୂର୍ବରୁ ସତ ଶର୍ମାଙ୍କୁ ଜମ୍ମୁ-କଶ୍ମୀରର କାର୍ଯ୍ୟକାରୀ ସଭାପତି ଭାବେ ନିଯୁକ୍ତ କରାଯାଇଥିଲା। 

ସତ ଶର୍ମା ପୂର୍ବରୁ ଏହି ପଦବୀରେ ରହିସାରିଛନ୍ତି ଏବଂ ଜଣେ ଅଭିଜ୍ଞ ସଂଗଠନ ବ୍ୟକ୍ତି। ଦଳୀୟ ସୂତ୍ରରୁ ପ୍ରକାଶ ଯେ ରବୀନ୍ଦ୍ର ରାଇନା (ଯିଏ କି ୨୦୧୮ରୁ ସଭାପତି ଥିଲେ)ଙ୍କ କାର୍ଯ୍ୟକାଳ ବହୁ ପୂର୍ବରୁ ଶେଷ ହୋଇସାରିଛି ଏବଂ ବିଜେପି ସାଂଗଠନିକ ନିର୍ବାଚନ ପାଇଁ ପ୍ରସ୍ତୁତି ଚଳାଇଛି, ତେଣୁ ନେତୃତ୍ୱ ପରିବର୍ତ୍ତନ ଏକ ସ୍ୱାଭାବିକ ପ୍ରକ୍ରିୟା। ଆଗାମୀ ଦିନ ଓ ସପ୍ତାହରେ ଦଳକୁ ଅନେକ ରାଜ୍ୟରେ ନୂଆ ସଭାପତି ମିଳିବାର ସମ୍ଭାବନା ରହିଛି।

ପୂର୍ବରୁ ସତ ଶର୍ମା ଦଳର ରାଜ୍ୟ ସଭାପତି ଦାୟିତ୍ୱ ମଧ୍ୟ ତୁଲାଇସାରିଛନ୍ତି। ଏହା ପୂର୍ବରୁ ସେ ୨୦୧୪ରୁ ୨୦୧୮ ପର୍ଯ୍ୟନ୍ତ ଜମ୍ମୁ-କଶ୍ମୀର ବିଜେପିର ରାଜ୍ୟ ସଭାପତି ଥିଲେ। ସତ ଶର୍ମା ୨୦୧୪ ବିଧାନସଭା ନିର୍ବାଚନରେ ଜମ୍ମୁ-ପଶ୍ଚିମ ନିର୍ବାଚନ ମଣ୍ଡଳୀରୁ ବିଜୟୀ ହୋଇଥିଲେ।

ତତ୍କାଳୀନ ବିଜେପି-ପିଡିପି ସରକାରରେ ସେ ୪୦ ଦିନ ଗୃହ ନିର୍ମାଣ ଓ ଉନ୍ନୟନ ବିଭାଗର କ୍ୟାବିନେଟ୍ ମନ୍ତ୍ରୀ ଥିଲେ। ସତ ଶର୍ମା ମଧ୍ୟ ସିଏ ଅଛନ୍ତି। ସେ ଜମ୍ମୁର ଏକ ଡୋଗ୍ରା ବ୍ରାହ୍ମଣ ପରିବାରରେ ଜନ୍ମଗ୍ରହଣ କରିଥିଲେ । 

ଜମ୍ମୁ-କଶ୍ମୀର ବିଧାନସଭା ଅଧିବେଶନ ପୂର୍ବରୁ ଆଜି ବିଧାୟକ ଦଳ ନେତା ଚୟନ କରିବ ବିଜେପି। ବିଧାୟକ ଦଳ ନେତା ଜମ୍ମୁ-କଶ୍ମୀର ବିଧାନସଭାରେ ବିରୋଧୀ ଦଳ ନେତା ଭାବେ ମଧ୍ୟ ଗୁରୁତ୍ୱପୂର୍ଣ୍ଣ ଦାୟିତ୍ୱ ତୁଲାଇବେ। ହାଇକମାଣ୍ଡଙ୍କ ଦ୍ୱାରା ନିଯୁକ୍ତ କେନ୍ଦ୍ରୀୟ ପର୍ଯ୍ୟବେକ୍ଷକ, କେନ୍ଦ୍ରମନ୍ତ୍ରୀ ପ୍ରହ୍ଲାଦ ଯୋଶୀ ଏବଂ ରାଷ୍ଟ୍ରୀୟ ସାଧାରଣ ସମ୍ପାଦକ ତରୁଣ ଚୁଗଙ୍କ ତତ୍ତ୍ୱାବଧାନରେ ଶ୍ରୀନଗରରେ ବିରୋଧୀ ଦଳ ନେତା ନିର୍ବାଚନ ହେବାକୁ ଯାଉଛି।