ପ୍ରୟାଗରାଜ: ଉତ୍ତର ପ୍ରଦେଶର ପ୍ରୟାଗରାଜ କୁମ୍ଭମେଳାରେ ମୌନି ଅମାବାସ୍ୟା ସ୍ନାନ ପର୍ବରେ ପ୍ରବଳ ଭିଡ଼ ଜମିଥିଲା। ଫଳରେ ଦଳାଚକଟା ପରିସ୍ଥିତି ଉପୁଜିଥିଲା। ଡିଆଇଜି ମହାକୁମ୍ଭ ବୈଭବ କ୍ରିଷ୍ଣା ଗଣମାଧ୍ୟମକୁ ଏହି ସୂଚନା ଦେଇଛନ୍ତି। ଦଳାଚକଟାରେ ସମୁଦାୟ ୬୦ ଜଣ ଆହତ ହୋଇଥିବା ବେଳେ ସେମାନଙ୍କ ମଧ୍ୟରୁ ୩୦ ଜଣଙ୍କର ମୃତ୍ୟୁ ଘଟିଛି। ମୃତକଙ୍କ ମଧ୍ୟରୁ ୨୫ ଜଣଙ୍କ ପରିଚୟ ମିଳିପାରିଛି। 

ମୃତକଙ୍କ ମଧ୍ୟରେ ଉତ୍ତରପ୍ରଦେଶ ବ୍ୟତୀତ ଆସାମ ଓ ଗୁଜରାଟର ଲୋକ ଅଛନ୍ତି। ଆହତମାନଙ୍କୁ ଚିକିତ୍ସା କରାଯାଉଥିବା ବେଳେ ଅନେକ ଗୁରୁତରଙ୍କୁ ଉଚ୍ଚ କେନ୍ଦ୍ରକୁ ସ୍ଥାନାନ୍ତର କରାଯାଇଛି। ମହାକୁମ୍ଭ ମେଳାର ଓଏସ୍‌ଡି ଆକାଂକ୍ଷା ରଣା ଗଣମାଧ୍ୟମକୁ ସମ୍ବୋଧିତ କରି ସୂଚନା ଦେଇଛନ୍ତି। ସଙ୍ଗମରେ ଭିଡ଼ର ଚାପ ବଢ଼ୁଥିବାରୁ ଏହି ଘଟଣା ଘଟିଥିବା ସେ ଉଲ୍ଲେଖ କରିଛନ୍ତି। ତେବେ ଏଥିରେ କେହି ଗୁରୁତର ଆହତ ହୋଇନଥିବା ସେ ଦାବି କରିଛନ୍ତି। କିନ୍ତୁ ଆହତଙ୍କ ଆଗମନ ଜାରି ରହିଛି। ମହାକୁମ୍ଭ ମେଳାର କେନ୍ଦ୍ରୀୟ ଡାକ୍ତରଖାନାକୁ ଅସ୍ଥାୟୀ କେନ୍ଦ୍ରରେ ପରିଣତ କରାଯାଇଛି। 

ଶ୍ରଦ୍ଧାଳୁମାନଙ୍କର ଶୃଙ୍ଖଳିତ ବୁଡ଼ ଓ ଶାନ୍ତି ଶୃଙ୍ଖଳାକୁ ଦୃଷ୍ଟିରେ ରଖି ମହାକୁମ୍ଭ ଅଞ୍ଚଳରେ ଘଟିଥିବା ଦଙ୍ଗା ଘଟଣାର ଗୋଟିଏ ଦିନ ପରେ ରାଜ୍ୟ ସରକାର ଭିଡ଼କୁ ନିୟନ୍ତ୍ରଣ କରିବା ସହ ଶ୍ରଦ୍ଧାଳୁଙ୍କ ସୁରକ୍ଷା ସୁନିଶ୍ଚିତ କରିବା ପାଇଁ ପ୍ରୟାସ ଜୋରଦାର କରିଛନ୍ତି। ସେପଟେ ଗୁରୁବାର ମେଳା ପରିସରରେ ବହୁ ସଂଖ୍ୟାରେ ଶ୍ରଦ୍ଧାଳୁଙ୍କ ସମାଗମ ଜାରି ରହିଛି । ସେପଟେ ମେଳାରେ ଭିଡ଼ ନ କମିବା ପର୍ଯ୍ୟନ୍ତ ଯାନବାହନ ଚଳାଚଳ ଉପରେ କଟକଣା ଲଗାଯିବ ବୋଲି ଟ୍ରାଫିକ ଅଧୀକ୍ଷକ ଅଂଶୁମାନ ମିଶ୍ର କହିଛନ୍ତି। ମୌନି ଅମାବାସ୍ୟା ପରଦିନ ଅର୍ଥାତ୍ ଜାନୁଆରୀ ୩୦ ତାରିଖ ସକାଳ ସୁଦ୍ଧା ୫୫ ଲକ୍ଷରୁ ଅଧିକ ଶ୍ରଦ୍ଧାଳୁ କୁମ୍ଭମେଳାରେ ସ୍ନାନ କରିସାରିଲେଣି। ଜାନୁଆରୀ ୨୯ ସୁଦ୍ଧା ସମୁଦାୟ ୨୭୫.୮ ନିୟୁତ ଶ୍ରଦ୍ଧାଳୁ ପବିତ୍ର ସ୍ନାନ କରିଛନ୍ତି।

ମେଳା ଅଞ୍ଚଳରେ ଏହି ପାଞ୍ଚଟି ବଡ଼ ପରିବର୍ତ୍ତନ: 

୧. ମେଳା ଅଞ୍ଚଳକୁ ସମ୍ପୂର୍ଣ୍ଣ ନୋ-ଭେଇକିଲ ଜୋନ୍ ଘୋଷଣା କରାଯାଇଛି, ଯେଉଁଥିରେ ମେଳା ଅଞ୍ଚଳକୁ ସମସ୍ତ ପ୍ରକାର ଯାନବାହନ ପ୍ରବେଶ ଉପରେ ପ୍ରତିବନ୍ଧକ ଲଗାଯାଇଛି। 

୨. ନିରପେକ୍ଷ ପ୍ରଶାସନ ପକ୍ଷରୁ ଭିଭିଆଇପି ପାସ୍ ମଧ୍ୟ ବାତିଲ କରାଯାଇଛି। କୌଣସି ସ୍ବତନ୍ତ୍ର ପାସ୍ ଦେଇ ମେଳା ଭିତରକୁ କୌଣସି ଯାନବାହନ ପ୍ରବେଶ କରିପାରିବେ ନାହିଁ। 

୩. ମେଳା ଅଂଚଳରେ ରାସ୍ତାକୁ ଏକତରଫା କରାଯାଇଛି। ଶ୍ରଦ୍ଧାଳୁଙ୍କ ସୁରୁଖୁରୁରେ ଯାତାୟାତ ପାଇଁ ଏକତରଫା ଟ୍ରାଫିକ୍ ବ୍ୟବସ୍ଥା ଲାଗୁ କରାଯାଇଥିବା ବେଳେ ଗୋଟିଏ ରୁଟରୁ ପ୍ରବେଶ ଓ ଅନ୍ୟ ରୁଟରୁ ବାହାରିବା ପାଇଁ ଅନୁମତି ଦିଆଯାଇଛି। 

୪. ଯାନବାହାନ ପ୍ରବେଶ ଉପରେ କଟକଣା ଲଗାଯାଇଛି। ପ୍ରୟାଗରାଜ ନିକଟବର୍ତ୍ତୀ ଜିଲ୍ଲାରୁ ଆସୁଥିବା ଯାନବାହନକୁ ଜିଲ୍ଲା ସୀମାରେ ଅଟକାଯାଉଛି। 

୫. ବସନ୍ତ ପଞ୍ଚମୀ ଅର୍ଥାତ୍ ଫେବ୍ରୁଆରି ୪ ତାରିଖ ସ୍ନାନ ପର୍ଯ୍ୟନ୍ତ କଡ଼ା କଟକଣା ବଳବତ୍ତର ରହିବ ଏବଂ ସହରଭିତରକୁ ଚାରି ଚକିଆ ଯାନ ପ୍ରବେଶ ଉପରେ ସମ୍ପୂର୍ଣ୍ଣ କଟକଣା ଜାରି କରାଯାଇଛି।