ପରଲୋକରେ ଲୋକପ୍ରିୟ ଧାରାବାହିକ ମହାଭାରତର ଶକୁନି ମାମାଙ୍କ ଭୂମିକାରେ ଅଭିନୟ କରିଥିବା ଗୁଫି ପେଣ୍ଟଲ । ଦୀର୍ଘଦିନର ଅସୁସ୍ଥତା ପରେ ଶେଷରେ ଆଜି ଆଖିବୁଜିଛନ୍ତି ଏହି ଅଭିନେତା । ଏହି ଖବର ପରେ ଟିଭି ଓ ସିନେମା ଜଗତରେ ଶୋକର ଛାୟା ଖେଳିଯାଇଛି । ରୋଗାଗ୍ରାସ୍ତ ଯୋଗୁଁ ଦୀର୍ଘଦିନ ହେବ ହସ୍ପିଟାଲରେ ଚିକିତ୍ସିତ ହେଉଥିଲେ ଗୁଫି ପେଣ୍ଟଲ । ମୃତ୍ୟୁ ବେଳକୁ ତାଙ୍କୁ ୭୮ ବର୍ଷ ବୟସ ହୋଇଥିଲା । 

ଗୁଫି ପେଣ୍ଟଲ ମହାଭାରତର ଶକୁନି ମାମୁ ଭାବେ ବେଶ ଲୋକପ୍ରିୟତା ହାସଲ କରିଥିଲେ । ସେ ଅଭିନେତା ହେବା ପୂର୍ବରୁ ପ୍ରଥମେ ସେନାରେ ଥିଲେ । ନିଜ ଭାଇଙ୍କଠାରୁ ଅନୁପ୍ରାଣିତ ହୋଇ ସେ ମୁମ୍ବାଇ ଆସି ଅଭିନୟ ଦୁନିଆରେ ପ୍ରବେଶ କରିଥିଲେ । ଗୁଫି ପେଣ୍ଟଲ ମହାଭାରତ ବ୍ୟତୀତ ଆକବର ବୀରବଲ, ସିଆଇଡି ଓ ରାଧାକୃଷ୍ଣ ଭଳି ସିରିୟଲରେ ମଧ୍ୟ ଅଭିନୟ କରିଛନ୍ତି । ସେହିପରି ଦାବା, ସୁହାଗ, ଦେଶପରଦେଶ ଓ ଧୁମରେ ମଧ୍ୟ ନଜର ଆସିଛନ୍ତି । ଅଭିନୟ କରିବା ସହ ସେ କାଷ୍ଟିଂ ଡାଇରେକ୍ଟର ଭାବେ ମଧ୍ୟ କାମ କରିସାରିଛନ୍ତି ।