ନୂଆଦିଲ୍ଲୀ: ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଆଜି ଗୁଜରାଟର ଭୁଜ ଗସ୍ତ କରିବାକୁ ଯାଉଛନ୍ତି। ତାଙ୍କର ଗସ୍ତ ଦୁଇ ଦିନିଆ ହେବ ଏବଂ ଏହି ସମୟରେ ପ୍ରତିରକ୍ଷା ମନ୍ତ୍ରୀ ଭାରତ-ପାକିସ୍ତାନ ସୀମାବର୍ତ୍ତୀ ଅଞ୍ଚଳ ମଧ୍ୟ ଗସ୍ତ କରିବେ। ଗସ୍ତ ସମୟରେ ରାଜନାଥ ସିଂହ ଏହି ଅଞ୍ଚଳରେ ଭାରତୀୟ ସଶସ୍ତ୍ର ବାହିନୀର କାର୍ଯ୍ୟକ୍ଷମ ପ୍ରସ୍ତୁତିର ମୂଲ୍ୟାଙ୍କନ କରିବେ ଏବଂ ପାକିସ୍ତାନର ସମ୍ପ୍ରତି ବିଫଳ ଡ୍ରୋନ୍ ଅନୁପ୍ରବେଶ ପରେ ନିଆଯାଇଥିବା ଦୃଢ଼ ସୁରକ୍ଷା ପଦକ୍ଷେପର ପ୍ରଭାବଶାଳୀତା ଯାଞ୍ଚ କରିବେ ବୋଲି ଆଶା କରାଯାଉଛି।

ଭାରତ ଏବଂ ପାକିସ୍ତାନ ମଧ୍ୟରେ ସମ୍ପ୍ରତି ସାମରିକ ଉତ୍ତେଜନା ସମୟରେ ପାକିସ୍ତାନୀ ସେନା ଡ୍ରୋନ୍ ବ୍ୟବହାର କରି ଭାରତର ଭୁଜକୁ ଟାର୍ଗେଟ କରିବାକୁ ଚେଷ୍ଟା କରିଥିଲା। ତଥାପି ଭାରତର ସୁରକ୍ଷା ବାହିନୀ ବାୟୁ ପ୍ରତିରକ୍ଷା ପ୍ରଣାଳୀ ସାହାଯ୍ୟରେ ପାକିସ୍ତାନର ବାରମ୍ବାର ଆକ୍ରମଣକୁ ସଫଳତାର ସହ ପଣ୍ଡ କରିଥିଲେ।

ବାରମ୍ବାର ସାମରିକ ବିଫଳତାର ସମ୍ମୁଖୀନ ହେବା ଏବଂ କୌଣସି ସଫଳତା ନ ପାଇବା ପରେ ପାକିସ୍ତାନ ଯୁଦ୍ଧବିରତି ପାଇଁ ଡାକ ପକାଇଲା। ରୁଦ୍ର ମାତା ବାୟୁସେନା ଷ୍ଟେସନ ହେଉଛି ଭୁଜରେ ଅବସ୍ଥିତ ଭାରତୀୟ ବାୟୁସେନାର ଏକ ପ୍ରମୁଖ ପ୍ରତିଷ୍ଠାନ।

ଏହି ଷ୍ଟେସନଟି ବେସାମରିକ ଭୁଜ ବିମାନବନ୍ଦର ସହିତ ଏହାର ରନୱେ ସେୟାର କରେ ଏବଂ ଦକ୍ଷିଣ ପଶ୍ଚିମ ବାୟୁ କମାଣ୍ଡ ଅଧୀନରେ କାର୍ଯ୍ୟ କରେ। ଭୁଜ ବାୟୁସେନା ଷ୍ଟେସନ, ଯେଉଁଠାରେ ୨୭ ୱିଙ୍ଗ ରହିଛି, ଭାରତ-ପାକିସ୍ତାନ ସୀମା ନିକଟରେ ଥିବାରୁ ଏହା ବାୟୁ ପ୍ରତିରକ୍ଷା ଏବଂ ନିରୀକ୍ଷଣ ପାଇଁ ଏକ ଗୁରୁତ୍ୱପୂର୍ଣ୍ଣ ଘାଟି।

ସୂଚନାଯୋଗ୍ୟ ଯେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଙ୍ଗଳବାର ସକାଳେ ପଞ୍ଜାବର ଆଦମପୁର ବାୟୁସେନା ଘାଟି ପରିଦର୍ଶନ କରିଥିଲେ। ଆଦମପୁର ବାୟୁସେନା ଘାଟି ଗସ୍ତ ସମୟରେ, ପ୍ରଧାନମନ୍ତ୍ରୀଙ୍କୁ ବାୟୁସେନା ଅଧିକାରୀମାନେ ସୂଚନା ଦେଇଥିଲେ ଏବଂ ଅପରେସନ ସିନ୍ଦୂରରେ ସାମିଲ ଥିବା କର୍ମଚାରୀମାନଙ୍କ ସହିତ ଆଲୋଚନା କରିଥିଲେ।

ଅଧିକ ପଢ଼ନ୍ତୁ: ରାଜନାଥ ସିଂହଙ୍କ ବୟାନରେ ବିଚଳିତ ହେଲା ପାକିସ୍ତାନ