ଛତିଶଗଡ଼: ଇନ୍ଦୋରର ରାଜା ରଘୁବଂଶୀ ମାମଲା ସାରା ଭାରତରେ ଚାଞ୍ଚଲ୍ୟ ଖେଳାଇ ଦେଇଛି । ସେ ତାଙ୍କ ପତ୍ନୀଙ୍କ ସହିତ ହନିମୁନ୍ କରିବାକୁ ଯାଇଥିଲେ, ତା’ପରେ ହଠାତ୍ ନିଖୋଜ ହୋଇଗଲେ । ଏହା ପରେ, ରାଜାଙ୍କ ମୃତଦେହ ମିଳିଲା ଏବଂ ଜଣାପଡିଲା ଯେ ତାଙ୍କ ପତ୍ନୀ ସୋନମ ତାଙ୍କୁ ହତ୍ୟା କରିଛନ୍ତି। ଏହି ସମୟରେ, ଛତିଶଗଡ଼ର ଆଉ ଏକ ଦମ୍ପତି ନିଖୋଜ ହୋଇଛନ୍ତି। ୬ ଦିନ ପରେ ମଧ୍ୟ ଉଭୟଙ୍କର ପତ୍ତା ମିଳୁନି।

ପରିବାର ଉଭୟଙ୍କ ନିଖୋଜ ସମ୍ପର୍କରେ ଅଭିଯୋଗ କରିଛନ୍ତି, ଯାହା ପରେ ପୋଲିସ ପ୍ରତ୍ୟେକ ଦୃଷ୍ଟିକୋଣରୁ ଘଟଣାର ତଦନ୍ତ ଆରମ୍ଭ କରିଛି। ମାମଲାଟି ଖଇରାଗଡ଼ ଜିଲ୍ଲାର ଛୁଇଖାଦାନ ଅଞ୍ଚଳର। ଏଠାରେ ରହୁଥିବା ନରେନ୍ଦ୍ର ବର୍ମା ତାଙ୍କ ପତ୍ନୀ ଟ୍ୱିଙ୍କଲ ବର୍ମାଙ୍କ ସହିତ ଜୁନ୍ ୧୪ ତାରିଖରେ ତାଙ୍କ ବାପଘରକୁ ଛାଡିବାକୁ ଯାଉଥିଲେ। ଏହି ସମୟରେ, ଦମ୍ପତିଙ୍କ ଫୋନ୍ ମଝି ରାସ୍ତାରେ ବନ୍ଦ ହୋଇଗଲା। ଏହା ସହିତ ଉଭୟ ଟ୍ୱିଙ୍କଲଙ୍କ ବାପଘରେରେ ମଧ୍ୟ ପହଞ୍ଚି ନଥିଲେ।

ଉଭୟ ଦୁଇ ମାସ ପୂର୍ବରୁ ଅକ୍ଷୟ ତୃତୀୟାରେ ବିବାହ କରିଥିଲେ। ବିବାହ ପରେ ଟ୍ୱିଙ୍କଲ ତାଙ୍କ ଶ୍ୱଶୁର ଘରେ ଥିଲେ। ପରେ ଜୁନ୍ ୧୪ ତାରିଖରେ, ସ୍ୱାମୀ ଟ୍ୱିଙ୍କଲଙ୍କୁ ତାଙ୍କ ବାପଘରକୁ ନେବା ପାଇଁ ଘରୁ ବାହାରିଥିଲେ, ହେଲେ ଅଧା ରାସ୍ତାରେ ଉଭୟ ନିଖୋଜ ହୋଇଗଲେ ।

ନିଖୋଜ ଦମ୍ପତିଙ୍କ ପରିବାର ସଦସ୍ୟ ଜୁନ୍ ୧୭ ତାରିଖରେ ଛୁଇଖାଦାନ ଥାନାରେ ଦମ୍ପତିଙ୍କ ନିଖୋଜ ରିପୋର୍ଟ ଦାଖଲ କରିଛନ୍ତି। ଅଭିଯୋଗ ପରେ, ଛୁଇଖାଦାନ ପୋଲିସ ଦମ୍ପତିଙ୍କ ମୋବାଇଲ୍ ଲୋକେସନ୍ ଟ୍ରାସ୍ କରୁଛି। ଏହା ସହିତ, ଇନ୍ଦୋର ଦମ୍ପତି ରାଜା ଏବଂ ସୋନମ ରଘୁବଂଶୀ ମାମଲା ସାମ୍ନାକୁ ଆସିବା ପରେ, ପୋଲିସ ପ୍ରତ୍ୟେକ ଦୃଷ୍ଟିକୋଣରୁ ଏହି ମାମଲାର ତଦନ୍ତ କରୁଛି।