ରାଜୌରୀ: ଜମ୍ମୁ-କଶ୍ମୀରର ରାଜୌରୀ ଜିଲ୍ଲାରେ ସରକାରୀ ଓ ବେସରକାରୀ ସ୍କୁଲର ପିକନିକ୍ ଉପରେ କଟକଣା ଲଗାଯାଇଛି। ବୁଧବାର ସଂଧ୍ୟାରେ ଏ ସଂକ୍ରାନ୍ତରେ ଜାରି ହୋଇଥିବା ନିର୍ଦ୍ଦେଶନାମାରେ କୌଣସି କାରଣ ଉଲ୍ଲେଖ କରାଯାଇ ନଥିଲେ ମଧ୍ୟ ସୁରକ୍ଷା ଦୃଷ୍ଟିରୁ ସତର୍କତାମୂଳକ ପଦକ୍ଷେପ ସ୍ୱରୂପ ପ୍ରଶାସନ ଏଭଳି ନିଷ୍ପତ୍ତି ନେଇଥିବା ସନ୍ଦେହ କରାଯାଉଛି। ମୁଖ୍ୟ ଶିକ୍ଷା ଅଧିକାରୀ ବିଶମ୍ଭର ଦାସଙ୍କ ପକ୍ଷରୁ ଜାରି ନିର୍ଦ୍ଦେଶନାମାରେ କୁହାଯାଇଛି ଯେ ଯଦି କୌଣସି ସ୍କୁଲ ଛାତ୍ରଛାତ୍ରୀଙ୍କୁ ପିକନିକ୍‌ରେ ନେବେ, ତାଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଯଦି କୌଣସି ଅଘଟଣ ଘଟେ ତେବେ ଏଥିପାଇଁ ସ୍କୁଲ୍ ମ୍ୟାନେଜମେଣ୍ଟ ମଧ୍ୟ ଦାୟୀ ରହିବ।

ଗତ କିଛି ଦିନ ମଧ୍ୟରେ ରାଜୌରୀର ବିଭିନ୍ନ ସ୍ଥାନରେ ସନ୍ଦେହଜନକ ଦୃଶ୍ୟ ଦେଖିବାକୁ ମିଳିଛି। ଅନେକ ଅଞ୍ଚଳରେ ବିଭିନ୍ନ ସମୟରେ ସର୍ଚ୍ଚ ଅପରେସନ ମଧ୍ୟ ଜାରି ରହିଛି। ପିଲାଙ୍କ ସୁରକ୍ଷାକୁ ଦୃଷ୍ଟିରେ ରଖି ଏଭଳି ଆଦେଶ ଜାରି କରାଯାଇଥାଇପାରେ। ଏ ନେଇ ମୁଖ୍ୟ ଶିକ୍ଷା ଧିକାରୀଙ୍କୁ ପଚାରିବାରୁ ସେ କହିଛନ୍ତି ଯେ ନିର୍ଦ୍ଦେଶ ନ ମାନିଲେ ସ୍କୁଲ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।

ଜମ୍ମୁ-କଶ୍ମୀରର ସିନ୍ଧୁ ଜଳ ଚୁକ୍ତିକୁ ନେଇ ପୁଣି ରାଜନୀତି ଆରମ୍ଭ ହୋଇଛି। ପିଡିପି ସଭାପତି ମେହବୁବା ମୁଫତି ବୁଧବାର କହିଛନ୍ତି ଯେ ନିର୍ଦ୍ଧାରିତ ପ୍ରସଙ୍ଗଗୁଡ଼ିକୁ ପୁନରୁଦ୍ଧାର କରି କେବଳ ଭାରତ ଏବଂ ପାକିସ୍ତାନ ମଧ୍ୟରେ ଉତ୍ତେଜନା ବୃଦ୍ଧି ପାଇବ। ମୁଖ୍ୟମନ୍ତ୍ରୀ ଓମାର ଅବଦୁଲ୍ଲା କେବଳ ଏହି ଚୁକ୍ତି ଉପରେ ପ୍ରଶ୍ନ ଉଠାଇ ବିଜେପିର ଏଜେଣ୍ଡାକୁ ଆଗକୁ ବଢ଼ାଇବା ପାଇଁ କାମ କରୁଛନ୍ତି। ଜମ୍ମୁ-କଶ୍ମୀରକୁ ଅତି କମରେ ଦୁଇଟି ଜଳବିଦ୍ୟୁତ ପ୍ରକଳ୍ପର ସମ୍ପୂର୍ଣ୍ଣ ଅଧିକାର ହସ୍ତାନ୍ତର କରିବାକୁ ସେ କେନ୍ଦ୍ର ସରକାରଙ୍କୁ କହିଲେ ଭଲ।

ମୁଖ୍ୟମନ୍ତ୍ରୀ ଓମାର ଅବଦୁଲ୍ଲା ମଙ୍ଗଳବାର ଦିଲ୍ଲୀରେ କହିଥିଲେ ଯେ ସିନ୍ଧୁ ଜଳ ଚୁକ୍ତି ଯୋଗୁଁ ଜମ୍ମୁ-କଶ୍ମୀର ଏହାର ନଦୀଗୁଡ଼ିକୁ ଭଲ ଭାବରେ ବ୍ୟବହାର କରିବାରେ ସକ୍ଷମ ହୋଇନାହିଁ। ଫଳରେ ଜଳବିଦ୍ୟୁତ୍ ଉତ୍ପାଦନର ବିପୁଳ ସମ୍ଭାବନାକୁ ମଧ୍ୟ ଉପଯୋଗ କରାଯାଉନାହିଁ। ଏହା ଦ୍ୱାରା ଆର୍ଥିକ କ୍ଷତି ହେଉଛି ଏବଂ କେନ୍ଦ୍ର ସରକାର ଏହାର ଭରଣା କରିବା ଉଚିତ୍।

ଅଧିକ ପଢ଼ନ୍ତୁ: ସୁପ୍ରିମକୋର୍ଟ ତିଆରି କଲେ ୧୦ ନିୟମ