ନୂଆଦିଲ୍ଲୀ: କାନାଡ଼ାର ଖଲିସ୍ତାନ ସମର୍ଥକ (ପିକେଇ) କ୍ରମାଗତ ଭାବେ ଭାରତୀୟ ସମ୍ପ୍ରଦାୟର ଲୋକଙ୍କୁ ଟାର୍ଗେଟ କରୁଛନ୍ତି। ସ୍ଥିତି ଦିନକୁ ଦିନ ଖରାପ ହେବାରେ ଲାଗିଛି। ହ୍ଵାଟ୍ସଆପ୍ ଭଳି ସୋସିଆଲ ମିଡିଆ ଆପ୍‌ରେ ଗ୍ରୁପ୍ ତିଆରି କରିବାଠାରୁ ଆରମ୍ଭ କରି ଭାରତୀୟ ସମ୍ପ୍ରଦାୟର ଲୋକଙ୍କୁ ସିଧାସଳଖ ମୁହାଁମୁହିଁ କରିବା, ସେଠାରେ ରହୁଥିବା ଭାରତୀୟମାନଙ୍କୁ ବିରୋଧ କରିବା ଓ ଧମକ ଦେବା ଖଲିସ୍ତାନୀମାନଙ୍କ ପାଇଁ ସାଧାରଣ ଅଭ୍ୟାସରେ ପରିଣତ ହୋଇଛି। ଖବର ଅନୁଯାୟୀ, ବର୍ତ୍ତମାନ କାନାଡାରେ ଥିବା ଭାରତୀୟ ସମ୍ପ୍ରଦାୟ ପାଇଁ ସ୍ଥିତି ଏତେ ଖରାପ ହୋଇଯାଇଛି ଯେ ସେଠାରେ ରହୁଥିବା ଅନେକ ପେସାଦାର ଏବଂ ବ୍ୟବସାୟୀ ସେମାନଙ୍କ ସମ୍ପତ୍ତି ବିକ୍ରି କରିବାରେ ନିୟୋଜିତ ଅଛନ୍ତି। ସେ ଭାରତ ଫେରିବାକୁ ଯୋଜନା କରୁଛନ୍ତି। 

ଭାରତୀୟ ଗୁଇନ୍ଦା ଏଜେନ୍ସି ସହ ଜଡ଼ିତ ସୂତ୍ରକୁ ଉଦ୍ଧୃତ କରି ଜାତୀୟ ଗଣମାଧ୍ୟମ ଲେଖିଛି ଯେ ଖାଲିସ୍ତାନ ସମର୍ଥକମାନେ ପାକିସ୍ତାନ ନେତାଙ୍କ ସହ ବୈଠକ କରିଛନ୍ତି। ଏହି ବୈଠକ ପରେ ଖାଲିସ୍ତାନ ସମର୍ଥକମାନେ ଭାରତୀୟ ବସବାସ କରୁଥିବା ଅଞ୍ଚଳରେ ଆକ୍ରମଣାତ୍ମକ ଓ ହିଂସାତ୍ମକ ବିକ୍ଷୋଭ ବୃଦ୍ଧି କରିଛନ୍ତି।

ରିପୋର୍ଟରେ କୁହାଯାଇଛି ଯେ ନଭେମ୍ବର ପ୍ରଥମ ସପ୍ତାହରେ ଖଲିସ୍ତାନ ସମର୍ଥକ ଏବଂ ପାକିସ୍ତାନୀ ନେତାଙ୍କ ଏକ ବୈଠକ ହୋଇଥିଲା। ସେବେଠାରୁ ଖଲିସ୍ତାନୀ ସମର୍ଥକମାନେ ଭାରତୀୟ ଲୋକଙ୍କୁ ଧମକ ଚମକ ଦେଉଛନ୍ତି। ସେମାନଙ୍କ ବିରୋଧରେ ପ୍ରତିବାଦ କରିବା ସହ ଅନେକ ଥର ହିଂସାତ୍ମକ ସଂଘର୍ଷ ଓ ମାଡ଼ ମଧ୍ୟ କରାଯାଉଛି। ଯାହାକୁ ନେଇ ସ୍ଥାନୀୟ କର୍ତ୍ତୃପକ୍ଷଙ୍କ ତରଫରୁ ଅନେକ ଲୋକ ମାମଲା ମଧ୍ୟ ରୁଜୁ କରୁଛନ୍ତି।

ସୂଚନା ଅନୁଯାୟୀ, ସ୍ଥାନୀୟ ପୁଲିସ ପ୍ରଶାସନ ତଥା କାନାଡ଼ାର ଅନ୍ୟାନ୍ୟ ପ୍ରଶାସନିକ ଏଜେନ୍ସିଙ୍କ ସହଯୋଗରେ ଖଲିସ୍ତାନ ସମର୍ଥକମାନେ ଖଲିସ୍ତାନକୁ ବିରୋଧ କରୁଥିବା ଭାରତୀୟ ଲୋକଙ୍କ ସମ୍ପର୍କରେ ତଥ୍ୟ ସଂଗ୍ରହ କରୁଛନ୍ତି। ସୋସିଆଲ ମିଡିଆ ଗ୍ରୁପରେ ଭାରତୀୟଙ୍କ କଣ୍ଟାକ୍ଟ ଡିଟେଲ୍ସ ସହ ସେମାନଙ୍କ ଠିକଣା ମଧ୍ୟ ସେୟାର କରାଯାଉଛି । ଯେଉଁକାରଣରୁ ଏହା ଏବେ ଭାରତୀୟଙ୍କ ପାଇଁ ବଡ଼ ବିପଦ ପାଲଟିଛି।

କାନାଡାରେ ଭାରତୀୟଙ୍କ ଉପରେ ବଢ଼ୁଥିବା ଆକ୍ରମଣ ମଧ୍ୟରେ ଖଲିସ୍ତାନୀଙ୍କ ଷଡ଼ଯନ୍ତ୍ର ପଦାକୁ ଆସିଛି। ଏହି ହିଂସାତ୍ମକ ଖଲିସ୍ତାନ ସମର୍ଥକ ତତ୍ତ୍ୱମାନେ ଭାରତୀୟ ବ୍ୟବସାୟୀ, ରେସ୍ତୋରାଁ ମାଲିକ ଏବଂ ସେଠାରେ ରହୁଥିବା ଛାତ୍ରଛାତ୍ରୀଙ୍କୁ ଟାର୍ଗେଟ କରୁଥିବା ଜଣାପଡ଼ିଛି। ଏଥିସହିତ ମନ୍ଦିର ବାହାରେ ଭାରତୀୟଙ୍କ ଉପରେ ଆକ୍ରମଣ ଆଶଙ୍କା ରହୁଛି।

କାନାଡାରେ ଥିବା ଭାରତୀୟ ସମ୍ପ୍ରଦାୟର ବିଭିନ୍ନ ସୋସିଆଲ ମିଡିଆ ଗ୍ରୁପରେ ଖଲିସ୍ତାନ ସମର୍ଥକମାନେ ଅନୁପ୍ରବେଶ କରୁଛନ୍ତି, ଯେଉଁମାନେ ଖଲିସ୍ତାନ ସମର୍ଥକଙ୍କୁ ଉତ୍ତେଜିତ କରିବା ପାଇଁ ଚାଟ୍ ଏବଂ ବାର୍ତ୍ତା ବ୍ୟବହାର କରୁଛନ୍ତି। ଏହାବ୍ୟତୀତ ଭାରତୀୟମାନେ ଖଲିସ୍ତାନକୁ ସମର୍ଥନ କରନ୍ତୁ କିମ୍ବା ତୁରନ୍ତ କାନାଡା ଛାଡ଼ିଯିବାକୁ ଦାବି କରୁଛନ୍ତି।

ଅଧିକ ପଢ଼ନ୍ତୁ:  ଅଭିଯୁକ୍ତଙ୍କ ବିରୋଧରେ ଅଭିଯୋଗ ଆସିଲେ ଘର ଭାଙ୍ଗି ହେବ ନାହିଁ