ବିଜନୋର: ଉତ୍ତର ପ୍ରଦେଶର ବିଜନୋର ଅଞ୍ଚଳରେ ଏକ ଭୟଙ୍କର ଦୁର୍ଘଟଣା ଘଟିଚି। ତିନିଚକିଆ ଯାନକୁ ବର-କନ୍ୟାଙ୍କ କାର ଧକ୍କା ଦେଇଛି। ଏହି ଦୁର୍ଘଟଣାରେ ୭ ଜଣଙ୍କମୃତ୍ୟୁ ଘଟିଥିବା ବେଳେ ୨ ଜଣ ଆହତ ହୋଇଛନ୍ତି। ମୃତକମାନଙ୍କ ଭିତରେ ଅଛନ୍ତି ଖୁର୍ସିଦ (୬୫), ତାଙ୍କ ପୁଅ ବିଶାଲ (୨୫), ବୋହୂ ଖୁସି (୨୨), ପତ୍ନୀ ମୁମତାଜ (୪୫), ଝିଅ ରୁବି (୩୨) ଓ ବୁଶରା (୧୦)।

ଗୋଟିଏ ପରିବାରର ୬ ଜଣ ଝାଡ଼ଖଣ୍ଡରୁ ବିଶାଲଙ୍କୁ ବିବାହ କରି ନିଜ ଗାଁକୁ ଆସୁଥିବା ବେଳେ ମୁରାଦାବାଦରୁ ଏକ ତିନି ଚକିଆ ଯାନ ଯୋଗେ ମଧ୍ୟରାତ୍ରି ପରେ ପରିବାର ଲୋକେ ତିବ୍ରା ଗାଁକୁ ଫେରୁଥିଲେ। ଧାମପୁର ନଗିନା ରାସ୍ତାରେ ଏକ କ୍ରେଟା କାର୍ ସେମାନଙ୍କୁ ପଛପଟୁ ଧକ୍କା ଦେବାରୁ ଚିକିତ୍ସା ପାଇଁ ଡାକ୍ତରଖାନା ନେବା ବାଟରେ ସମସ୍ତ ୬ ଜଣ ଆହତଙ୍କ ମୃତ୍ୟୁ ଘଟିଥିଲା। ତିନିଚକିଆ ଯାନ ଚାଳକ ଅଜାବ ସିଂହଙ୍କ ମଧ୍ୟ ମୃତ୍ୟୁ ଘଟିଛି। ଆହତ କ୍ରେଟା ଆରୋହୀ ଶେରକୋଟ ନିବାସୀ ସୋହେଲ ଅଲଭି ଓ ଅମନଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି।

ଖୁସି ଘରେ ଏବେ ଶୋକର ଛାୟା ଖେଳିଯାଇଛି। ଯେଉଁଠି ଗତକାଲି ହସିବା ଓ ନୃତ୍ୟ କରିବାର ଶବ୍ଦ ଆସୁଥିଲା, ଏବେ କେବଳ କାନ୍ଦିକାନ୍ଦିଥିବା ଲୋକଙ୍କୁ ଦେଖିବାକୁ ମିଳୁଛି। କନ୍ୟାକୁ ସ୍ୱାଗତ କରିବା ପାଇଁ ପରିବାର ଲୋକେ ପ୍ରସ୍ତୁତି କରିଥିଲେ। ବାପା ମା' ଭାବୁଥିଲେ ପୁଅ ନବବଧୂକୁ ନେଇ ଘରକୁ ଆସିବ, କିନ୍ତୁ ପୁଅ ବୋହୂଙ୍କ ମୃତଦେହ ଫେରିବ ବୋଲି ସେମାନେ ଜାଣି ନଥିଲେ। ଏହି ଖବର କେବଳ ପରିବାର ରେ ନୁହେଁ ବରଂ ସମଗ୍ର ଗାଁରେ ଶୋକର ଛାୟା ଖେଳିଯାଇଛି। 

ଝିଅର ପରିବାର ଲୋକେ ମଧ୍ୟ ଜାଣିଥିଲେ ଯେ ଯେଉଁ ଝିଅକୁ ସେମାନେ ବ୍ୟାଣ୍ଡ-ଓ୍ଵାଗନ୍ ସହ ବ୍ରାଇଡଲ୍ ପୋଷାକ ପିନ୍ଧି ସବୁଦିନ ପାଇଁ ପଠାଉଛନ୍ତି, ତାହା ହେଉଛି ତାଙ୍କର ଶେଷ ବିଦାୟ। 

ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ବିଜନୋର ଜିଲ୍ଲାରେ ଘଟିଥିବା ସଡ଼କ ଦୁର୍ଘଟଣାକୁ ଗୁରୁତ୍ୱ ଦେଇଛନ୍ତି। ମୁଖ୍ୟମନ୍ତ୍ରୀ ଯୋଗୀ ମୃତକଙ୍କ ଶୋକସନ୍ତପ୍ତ ପରିବାରବର୍ଗଙ୍କୁ ସମବେଦନା ଜଣାଇଛନ୍ତି। ଆହତମାନଙ୍କୁ ତୁରନ୍ତ ଡାକ୍ତରଖାନାରେ ଭର୍ତ୍ତି କରିବା ସହ ଉପଯୁକ୍ତ ଚିକିତ୍ସା ଯୋଗାଇ ଦେବାକୁ ଜିଲ୍ଲା ପ୍ରଶାସନର ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି। ଏହା ସହ ଆହତମାନେ ଶୀଘ୍ର ସୁସ୍ଥ ହୁଅନ୍ତୁ ବୋଲି ସେ କାମନା କରିଛନ୍ତି। ଘଟଣାସ୍ଥଳରେ ପହଞ୍ଚି ରିଲିଫ କାର୍ଯ୍ୟକୁ ତ୍ୱରାନ୍ୱିତ କରିବାକୁ ମୁଖ୍ୟମନ୍ତ୍ରୀ ଯୋଗୀ ଜିଲ୍ଲା ପ୍ରଶାସନର ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି।

ଅଧିକ ପଢ଼ନ୍ତୁ: ହସ୍ପିଟାଲରେ ଭୟାବହ ଅଗ୍ନିକାଣ୍ଡ: ୧୦ ନିରୀହ ଶିଶୁଙ୍କ ମୃତ୍ୟୁ