ନୂଆଦିଲ୍ଲୀ:ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏବଂ ଗଣମାଧ୍ୟମ ମଧ୍ୟରେ ଚାଲିଥିବା ବିବାଦ ଏକ ନୂତନ ମୋଡ଼ ନେଇଛି। ହ୍ୱାଇଟ୍ ହାଉସରେ ପ୍ରବେଶ ଏବଂ କଭରେଜ୍ ଉପରେ କଟକଣା ଲଗାଯିବା ପରେ, ଦେଶର ତିନୋଟି ପ୍ରମୁଖ ଗଣମାଧ୍ୟମ ସଂସ୍ଥା ସିଏନ୍ଏନ୍ (CNN), ଏମ୍‌ଏସ୍ ନାଓ (MS NOW) ଏବଂ ପଲିଟିକୋ (POLITICO) ଆମେରିକା ପ୍ରଶାସନ ବିରୋଧରେ ଆଇନଗତ ଲଢ଼େଇ ଆରମ୍ଭ କରିଛନ୍ତି। ଏହା ସହିତ ଏହିସବୁ ଚ୍ୟାନେଲ୍ସ ଟ୍ରମ୍ପଙ୍କ ପ୍ରଶାସନର ଖବର ପ୍ରସାରଣକୁ ମଧ୍ୟ ବହିଷ୍କାର କରିଛନ୍ତି ।

ସୋମବାର ଦିନ ଏହି ସଂସ୍ଥାଗୁଡ଼ିକ ପକ୍ଷରୁ ୱାସିଂଟନ୍ ଡିସିର ଏକ ଫେଡେରାଲ୍ କୋର୍ଟରେ ଆନୁଷ୍ଠାନିକ ଭାବେ ମାମଲା ଦାୟର କରାଯାଇଛି। ସମ୍ବିଧାନର ପ୍ରଥମ ସଂଶୋଧନ ଏବଂ ଅଧିକାରର ଉଲ୍ଲଂଘନ ଦର୍ଶାଇ ଗଣମାଧ୍ୟମ ସଂସ୍ଥାଗୁଡ଼ିକ ଏହି କଟକଣା ଉପରେ ତୁରନ୍ତ ରୋକ ଲଗାଇବା ସହ ସାମ୍ବାଦିକମାନଙ୍କର ପ୍ରେସ୍ କ୍ରେଡେନ୍ସିଆଲ୍ ଓ ହ୍ୱାଇଟ୍ ହାଉସ୍ ପ୍ରବେଶାଧିକାର ବାହାଲ କରିବାକୁ କୋର୍ଟଙ୍କୁ ନିବେଦନ କରିଛନ୍ତି।

ଗତ ଶନିବାର ଦିନ ଉପରୋକ୍ତ ସଂସ୍ଥାଗୁଡ଼ିକର ସାମ୍ବାଦିକମାନେ ହ୍ୱାଇଟ୍ ହାଉସରେ ପ୍ରବେଶ କରିବାକୁ ଚେଷ୍ଟା କରିଥିବାବେଳେ ସେମାନଙ୍କର ପ୍ରେସ୍ ବ୍ୟାଜ୍ ଜବତ କରାଯାଇଥିଲା। ଗଣମାଧ୍ୟମ ସଂସ୍ଥାଗୁଡ଼ିକର ଅଭିଯୋଗ ଅନୁଯାୟୀ, ଟ୍ରମ୍ପ ପ୍ରଶାସନ ପକ୍ଷରୁ ସେମାନଙ୍କର ପୂର୍ବ ପ୍ରସାରିତ ଖବରକୁ ନେଇ କ୍ଷୁବ୍ଧ ହୋଇ ଏହି ଦଣ୍ଡାତ୍ମକ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି, ଯାହାକି ସ୍ୱାଧୀନ ସାମ୍ବାଦିକତା ତଥା ମତ ପ୍ରକାଶର ଅଧିକାର ଉପରେ ସିଧାସଳଖ ଆକ୍ରମଣ।

ଏହି ସମ୍ପୂର୍ଣ୍ଣ ପ୍ରସଙ୍ଗରେ ତିନୋଟି ଯାକ ଗଣମାଧ୍ୟମ ସଂସ୍ଥା ଏକଜୁଟ ହੋଇ କହିଛନ୍ତି ଯେ ସରକାର କେବେବି ସ୍ଥିର କରିପାରିବେ ନାହିଁ ଯେ ଗଣମାଧ୍ୟମ କ'ଣ ରିପୋର୍ଟ କରିବ ଏବଂ କ'ଣ ପ୍ରକାଶ କରିବ। ସାଧାରଣ ଜନତାଙ୍କୁ ସତ୍ୟ ଜଣାଇବା ଏବଂ ଗଣତନ୍ତ୍ରର ମୂଳଦୁଆକୁ ବଞ୍ଚାଇବା ପାଇଁ ଏହି ଆଇନଗତ ଲଢ଼େଇ ଜରୁରୀ ଥିଲା।