ମଲ୍ଟି-ମିଲିୟନେୟାର ଟେକ୍ ଉଦ୍ୟୋଗୀ ବ୍ରାୟନ୍ ଜନସନ୍ ନିଜର ଆଣ୍ଟି-ଏଜିଂ (ବୟସ ବୃଦ୍ଧି ରୋକିବା) ପ୍ରୋଜେକ୍ଟ ପାଇଁ ଚର୍ଚ୍ଚାରେ ରହିଆସିଛନ୍ତି, ଯାହାକୁ ସେ ନିଜେ କଡ଼ାକଡ଼ି ଭାବେ  ପାଳନ କରନ୍ତି। ସେ ମୃତ୍ୟୁରୁ ବଞ୍ଚିବା ପାଇଁ ଅନେକ ପ୍ରକାରର ଉଦ୍ୟମ କରୁଛନ୍ତି।

ୱାଶିଂଟନ୍: ବ୍ରାୟନ୍ ଜୋନସନ୍‌ଙ୍କ ଜୀବନର ଅଧିକାଂଶ ଭାଗ ଏପରି କାମରେ ବିତେ, ଯାହା ସାଧାରଣତଃ ଲୋକଙ୍କୁ ବହୁତ ଅଜବ ଲାଗିପାରେ। ସେ ସକାଳ ୪ ଟାରେ ଉଠି ୧୧ ଟା ସୁଦ୍ଧା ଖାଇନିଅନ୍ତି ଏବଂ ତା’ପରେ ରାତି ୮ ଟାରେ ଶୋଇବାକୁ ଚାଲିଯାନ୍ତି। ସେ ପ୍ରତିଦିନ ବିଭିନ୍ନ ପ୍ରକାରର ପ୍ରାୟ ୧୦୦ ଟି ବଟିକା (ଟାବଲେଟ୍) ଖାଆନ୍ତି। ଏହାସହିତ ସେ ନିଜ ଗର୍ଲଫ୍ରେଣ୍ଡଙ୍କ ପିରିୟଡ୍ସର ରକ୍ତ ଫ୍ରିଜରରେ ଜମା କରୁଛନ୍ତି। ଏହି ସବୁ ଚେଷ୍ଟା କିମ୍ବା ଉପାୟ ବୟସ ବଢ଼ିବାର ଗତିକୁ ଧୀମା କରିବା ପାଇଁ। ତାଙ୍କର ଲକ୍ଷ୍ୟ ହେଉଛି ମୃତ୍ୟୁକୁ ଚକମା ଦେବା ଅର୍ଥାତ୍ ଅମର ହେବା।

ଆମେରିକୀୟ ଅର୍ବୁଦପତି(ବିଲିୟନାୟର) ଟେକ୍ ଏଣ୍ଟରପ୍ରେନର ବ୍ରାୟନ୍ ଜୋନସନଙ୍କ  ଜୀବନର ଲକ୍ଷ୍ୟ ହେଉଛି ମୃତ୍ୟୁକୁ ମାତ୍ ଦେବା।  ୪୮ ବର୍ଷୀୟ ଜନସନ୍ ବିଶ୍ୱରେ ସବୁଠାରୁ ନିରୋଗ/ସୁସ୍ଥ ବ୍ୟକ୍ତି ହେବା ପାଇଁ ପାଗଳପ୍ରାୟ, ଏବଂ ନିଜର ବାୟୋଲୋଜିକାଲ୍ ବୟସକୁ ଓଲଟାଇ ସବୁଦିନ ପାଇଁ ଜୀବିତ ରହିବାର ‘ଅଜବ’ ଚେଷ୍ଟାରେ ଲାଗିଛନ୍ତି। ଜନସନ୍ ନିଜର ଖାଦ୍ୟପେୟକୁ ନେଇ ଅତ୍ୟନ୍ତ ଶୃଙ୍ଖଳିତ। ପ୍ରତିଦିନ ସପ୍ଲିମେଣ୍ଟ ନିଅନ୍ତି ଏବଂ ପ୍ରତ୍ୟେକ ସମ୍ଭାବ୍ୟ ବାୟୋମାର୍କରକୁ ମାପନ୍ତି। ସେ ନିଜକୁ ସବୁଠାରୁ ଅଧିକ ବାୟୋଲୋଜିକାଲି ମାପାଯାଇଥିବା ମଣିଷ ବୋଲି ମାନନ୍ତି।

ଫ୍ରିଜରରେ ପିରିୟଡ୍ ରକ୍ତ

ବ୍ରାୟନ୍‌ଙ୍କ ଫ୍ରିଜରରେ ଆଇସକ୍ରିମ୍ ନଥାଏ, ବରଂ ତାଙ୍କ ଗର୍ଲଫ୍ରେଣ୍ଡଙ୍କ ପିରିୟଡର ରକ୍ତ ଥାଏ। ଜନସନ୍ ନିକଟରେ ସୋସିଆଲ ମିଡିଆରେ ନିଜର ୩୦ ବର୍ଷୀୟା ଗର୍ଲଫ୍ରେଣ୍ଡ କେଟ୍ ଟୋଲୋଙ୍କର ଏକ ଫଟୋ ପୋଷ୍ଟ କରି ଲେଖିଛନ୍ତି ଯେ, କେଟ୍‌ଙ୍କ ପିରିୟଡ୍ସର ରକ୍ତ ମୋର -୮୦°C ଫ୍ରିଜରରେ ଅଛି। ଏହା ପ୍ରଥମ ଥର ନୁହେଁ, ଯେତେବେଳେ ଜନସନ୍ କୌଣସି ଆତ୍ମୀୟଙ୍କ ଶରୀରର ଫ୍ଲୁଇଡ୍ସ (ତରଳ ପଦାର୍ଥ) ସଂଗ୍ରହ କରିଛନ୍ତି। କିଛି ବର୍ଷ ପୂର୍ବରୁ ସେ ନିଜ ‘ବ୍ଲଡ୍ ବୟ’ ର ପ୍ଲାଜ୍‌ମାରୁ ଏକ ଲିଟର ନିଜ ଶରୀରରେ ଚଢ଼ାଇବା ବିଷୟରେ ସୂଚନା ଦେଇଥିଲେ।

ତେବେ ଜନସନ୍ ଫ୍ରିଜରରେ ରଖାଯାଇଥିବା ପିରିୟଡ୍ସ ରକ୍ତ (Menstrual blood) ର କ’ଣ କରିବାକୁ ଯାଉଛନ୍ତି? ଜନସନ୍ 'X' (ଟ୍ୱିଟର) ରେ ଜଣାଇଛନ୍ତି ଯେ ପିରିୟଡ୍ସ ରକ୍ତ ମୂଲ୍ୟବାନ୍ ଏବଂ ଏହାର ସମ୍ପୂର୍ଣ୍ଣ ବ୍ୟବହାର ହୋଇପାରୁନାହିଁ। ଏହା ଜରାୟୁକୁ କୌଣସି ସର୍ଜରୀ ବିନା ଦେଖିବାର/ପରଖିବାର ଏକ ଉପାୟ। ଟୋଲୋ ଏବଂ ଜନସନ୍ ଏହି ରକ୍ତର ଯାଞ୍ଚ ଏଣ୍ଡୋକ୍ରାଇନ୍ ସିଷ୍ଟମ୍ ଉପରେ ପ୍ରଭାବ ପକାଉଥିବା ଉପାଦାନଠାରୁ ଆରମ୍ଭ କରି ମାଇକ୍ରୋପ୍ଲାଷ୍ଟିକ୍ସ ପର୍ଯ୍ୟନ୍ତ ପରୀକ୍ଷା କରିବାକୁ ଚାହୁଁଛନ୍ତି। ସେ କହିଛନ୍ତି ଯେ, ମୋତେ ଭଲ ଲାଗୁଛି ଯେ କେଟ୍ ମୋ ସହ ଏହି ପରୀକ୍ଷଣର ଅଂଶବିଶେଷ ପାଲଟିଛନ୍ତି।

ଗର୍ଲଫ୍ରେଣ୍ଡ ମଧ୍ୟ ଦେଉଛନ୍ତି ସାଥ୍

ଜନସନ୍‌ଙ୍କ କହିବା କଥା ହେଉଛି ଯେ, ତାଙ୍କ ଗର୍ଲଫ୍ରେଣ୍ଡ ନିଜ ପିରିୟଡ୍ସ ସାଇକେଲ୍ ସହ ଜଡ଼ିତ ୧୪ ମିଲିୟନ୍ ଡାଟା ପଏଣ୍ଟ ସଂଗ୍ରହ କରୁଛନ୍ତି, ଯାହାକୁ ସେ ମହିଳାଙ୍କ ସ୍ୱାସ୍ଥ୍ୟ ପାଇଁ ବିଶ୍ୱର ନିଜ ପ୍ରକାରର ପ୍ରଥମ ପ୍ରୟାସ ବୋଲି ଦର୍ଶାଉଛନ୍ତି। ଏହି ସବୁର ତଦାରଖ ୧୨ ଜଣିଆ ମେଡିକାଲ୍ ଟିମ୍ କରୁଛନ୍ତି। ଜନସନ୍ କହିଛନ୍ତି ଯେ ସେ ଖୁବ୍ ଶୀଘ୍ର ଏହି ବିଷୟରେ ଅଧିକ ସୂଚନା ସେୟାର କରିବେ।

ଟୋଲୋ ଏବଂ ଜନସନ୍‌ଙ୍କର 'ଇମ୍ମୋର୍ଟାଲ୍ସ' (ଅମର) ନାମକ ଏକ କମ୍ପାନୀ ମଧ୍ୟ ଅଛି, ଯାହା ସପ୍ଲିମେଣ୍ଟ ବିକ୍ରି କରେ। ଏହି କମ୍ପାନୀ ଏହିପରି ଉତ୍ପାଦ ବିକ୍ରି କରେ, ଯାହା ବିଷୟରେ ଦାବି କରାଯାଏ ଯେ ଏଗୁଡ଼ିକ ବୟସ କମାନ୍ତି/ଆୟୁ ବୃଦ୍ଧି କରନ୍ତି। ଜୋନସନ୍‌ଙ୍କ ଦାବି ଯେ ସେ ନିଜ ଉପରେ ଲମ୍ବା ପରୀକ୍ଷଣ ପରେ ଏହି ସପ୍ଲିମେଣ୍ଟଗୁଡ଼ିକ ତିଆରି କରନ୍ତି ଏବଂ ଏଗୁଡ଼ିକ ବେଶ୍ ଫଳପ୍ରଦ ମଧ୍ୟ।

ବିଶେଷଜ୍ଞଙ୍କ ମତ: 'ବୃଥା ପାଗଳାମି'

ବ୍ରାୟନ୍ ଜନସନ୍‌ଙ୍କ ବଢ଼ୁଥିବା ବୟସ ରୋକିବା ଏବଂ ମୃତ୍ୟୁକୁ ଏଡ଼ାଇବାର ଚେଷ୍ଟାକୁ ଅନେକ ବିଶେଷଜ୍ଞ ସମ୍ପୂର୍ଣ୍ଣ ଅବାନ୍ତର ବୋଲି ମାନନ୍ତି। ଫିଜିସିଷ୍ଟ ଜିମ୍ ଅଲ୍-ଖଲିଲୀଙ୍କ କହିବା କଥା ଯେ, ସବୁଦିନ ପାଇଁ ଜୀବିତ ରହିବାର ତାଙ୍କର ଏହି ଇଚ୍ଛା ସମସ୍ତ ଚେଷ୍ଟା ସତ୍ତ୍ୱେ ପୂରଣ ହେବା ଅସମ୍ଭବ। ଏହି ଚେଷ୍ଟାରେ ସେ କେବଳ ନିଜର ସମୟ ନଷ୍ଟ କରୁଛନ୍ତି।