ଜେରୁସେଲମ: ଲେବାନନ୍ ଇସ୍ରାଏଲ ଉପରେ ବଡ଼ଧରଣର ଆକ୍ରମଣ କରିଛି। ଲେବାନନ୍ ଇସ୍ରାଏଲ ଉପରକୁ ୨୦୦ରୁ ଅଧିକ ରକେଟ୍ ନିକ୍ଷେପ କରିଛି। ତେବେ ଅଧିକାଂଶ ରକେଟ୍ ଖୋଲା ମହାକାଶରେ ଅବତରଣ କରିଥିବା ଇସ୍ରାଏଲ ଦାବି କରିଛି। 

ଇରାନ ଇସ୍ରାଏଲ ଉପରେ ଆକ୍ରମଣ କରି ସମଗ୍ର ମଧ୍ୟପ୍ରାଚ୍ୟକୁ ଏକ ବଡ଼ ଯୁଦ୍ଧର ଦ୍ୱାରକୁ ଆଣିଛି। ସେପଟେ ଇସ୍ରାଏଲ ସେନା ମୁଖ୍ୟ କହିଛନ୍ତି ଯେ ତାଙ୍କ ଦେଶ ମଧ୍ୟପ୍ରାଚ୍ୟର ଯେ କୌଣସି ସ୍ଥାନରେ ଆକ୍ରମଣ କରିପାରିବ। ଅନ୍ୟପକ୍ଷରେ ଇରାନ ଆକ୍ରମଣ ପରେ ଉତ୍ତେଜନା ହ୍ରାସ ପାଇଁ ଜି-୭ ଦେଶମାନେ ଏକ ଜରୁରୀକାଳୀନ ବୈଠକ ଡାକିଥିଲେ। ଇସ୍ରାଏଲ ବିରୋଧରେ ଇରାନର ଆକ୍ରମଣକୁ ଜି-୭ ନେତାମାନେ ତୀବ୍ର ନିନ୍ଦା କରିଛନ୍ତି। ଜି-୭ର ନେତାମାନେ ଇରାନ ଉପରେ ନୂଆ କଟକଣା ଲଗାଇବାକୁ ପ୍ରସ୍ତୁତି ଚଳାଇଛନ୍ତି।

ଇସ୍ରାଏଲ ପ୍ରତିରକ୍ଷା ବାହିନୀ କହିଛି ଯେ ସନ୍ଦିଗ୍ଧ ବିମାନଦେଖିବା ପରେ ବାଟ ୟାମରେ ଆଲର୍ଟ ସାଇରନ୍ ସକ୍ରିୟ କରାଯାଇଛି। ତେଲ ଅବିବର ଦକ୍ଷିଣରେ ଥିବା ଉପକୂଳବର୍ତ୍ତୀ ସହରର ବାସିନ୍ଦାଙ୍କୁ ସୁରକ୍ଷିତ ସ୍ଥାନରେ ଆଶ୍ରୟ ନେବାକୁ ହୋମ୍ ଫ୍ରଣ୍ଟ କମାଣ୍ଡ ନିର୍ଦ୍ଦେଶ ଦେଇଛି।

ଇସ୍ରାଏଲର ସୂଚନା ଅନୁଯାୟୀ, ଇସ୍ରାଏଲ ପ୍ରତିରକ୍ଷା ବାହିନୀ କିଛି ସମୟ ପୂର୍ବରୁ ଲେବାନନର ରାଜଧାନୀ ବେରୁତରେ ଏୟାରଷ୍ଟ୍ରାଇକ୍ କୁ ନିଶ୍ଚିତ କରିଛି। ଆଇଡିଏଫ ଏହି ଆକ୍ରମଣକୁ "ଟାର୍ଗେଟ" ବୋଲି କହିଛି ଏବଂ ପରେ ଅଧିକ ବିବରଣୀ ପ୍ରଦାନ କରାଯିବ ବୋଲି କହିଛି।

ଲେବନାନର ସ୍ୱାସ୍ଥ୍ୟ ମନ୍ତ୍ରଣାଳୟ ଗୁରୁବାର ଏକ ବିବୃତିରେ କହିଛି ଯେ ଗତ ୨୪ ଘଣ୍ଟା ମଧ୍ୟରେ ଲେବାନନର ହିଜବୁଲ୍ଲା ସ୍ଥାନ ଉପରେ ଇସ୍ରାଏଲର ଆକ୍ରମଣରେ ୪୬ ଜଣଙ୍କ ମୃତ୍ୟୁ ଘଟିଛି ଏବଂ ୮୫ ଜଣ ଆହତ ହୋଇଛନ୍ତି।

ଜାତିସଂଘରେ ଅବସ୍ଥାପିତ ଇସ୍ରାଏଲ ରାଷ୍ଟ୍ରଦୂତ କହିଛନ୍ତି ଯେ କେବଳ ଉତ୍ତେଜନା ହ୍ରାସ ପାଇଁ ଆହ୍ୱାନ ଦେବାର ସମୟ ଶେଷ ହୋଇଯାଇଛି। ଜାତିସଂଘ ନିରାପତ୍ତା ପରିଷଦର ଏକ ଜରୁରୀ ବୈଠକରେ ଡାନି ଡାନନ୍ କହିଛନ୍ତି ଯେ ଇରାନର ପ୍ରକୃତ ଚେହେରା ହେଉଛି ଆତଙ୍କ, ମୃତ୍ୟୁ ଏବଂ ବିଶୃଙ୍ଖଳା। "ଏହା ଆଉ ଶବ୍ଦର କଥା ନୁହେଁ। ଇରାନ ବିଶ୍ୱ ପାଇଁ ଏକ ଅତ୍ୟନ୍ତ ବାସ୍ତବ ଏବଂ ବର୍ତ୍ତମାନର ବିପଦ, ଯଦି ଏହାକୁ ବନ୍ଦ କରା ନଯାଏ, ତେବେ କ୍ଷେପଣାସ୍ତ୍ରର ପରବର୍ତ୍ତୀ ଲହର କେବଳ ଇସ୍ରାଏଲ ଉପରେ ପଡ଼ିବ ନାହିଁ। 

ଇସ୍ରାଏଲ ଉପରେ ଇରାନର ଆକ୍ରମଣକୁ ସେ ୧୦ ନିୟୁତ ସାଧାରଣ ନାଗରିକଙ୍କ ବିରୋଧରେ ଏକ ନିଷ୍ଠୁର ଆକ୍ରମଣ ଏବଂ ଏକ ଅଭୂତପୂର୍ବ ଆକ୍ରମଣ ବୋଲି ବର୍ଣ୍ଣନା କରିଛନ୍ତି।  ହାମାସ ଏବଂ ଅନ୍ୟ ଆତଙ୍କବାଦୀଙ୍କ ଦ୍ୱାରା ବନ୍ଧକ ଥିବା ସମସ୍ତ ଲୋକଙ୍କୁ ଇସ୍ରାଏଲକୁ ଫେରାଇ ନଦେବା ପର୍ଯ୍ୟନ୍ତ ଇସ୍ରାଏଲ ବନ୍ଦ ହେବ ନାହିଁ ବୋଲି ଡାନନ କହିଛନ୍ତି। 

ଅଧିକ ପଢ଼ନ୍ତୁ: ଇରାନ ଉପରେ ନୂଆ କଟକଣା ଲଗାଇବା ପ୍ରସ୍ତୁତିରେ G-7