ବର୍ଲିନ, ଅଗଷ୍ଟ ୧୨ (ଖବର ଓଡ଼ିଶା): ଜର୍ମାନୀର ଲେଗୋଲାଣ୍ଡସ୍ଥିତ ଥିମ୍ ପାର୍କରେ ୨ଟି ରୋଲରକୋଷ୍ଟର ଟ୍ରେନ୍ ଦୁର୍ଘଟଣାଗ୍ରସ୍ତ ହୋଇଛି । ଫଳରେ ୩୦ ଜଣ ଆହତ ହୋଇଛନ୍ତି । ଆହତଙ୍କ ମଧ୍ୟରୁ ଜଣଙ୍କର ଅବସ୍ଥା ଗୁରୁତର ଥିବା ଗଣମାଧ୍ୟମର ରିପୋର୍ଟରୁ ଜଣାଯାଇଛି । ପାର୍କ ପକ୍ଷରୁ କୁହାଯାଇଛି ଯେ, ୨ଟି ରୋଲରକୋଷ୍ଟର ଟ୍ରେନ୍ ଧକ୍କା ହେବାରୁ ଦୁର୍ଘଟଣା ଘଟିଛି ।
ରୋଲରକୋଷ୍ଟର ଦୁର୍ଘଟଣା ଲିଜର ରିସର୍ଟରେ ଥିବା ଫାୟର ଡ୍ରାଗନ ରାଇଡ ସମୟରେ ଘଟିଛି । ଏହା ବାଭାରିଆର ଗୁଂଜବର୍ଗ ନିକଟରେ ଅବସ୍ଥିତ । ଲୋଗୋଲାଣ୍ଡ କହିଛି ଯେ, ଘଟଣାର ତଦନ୍ତ ହେବ । କଂପାନୀ ପକ୍ଷରୁ କୁହାଯାଇଛି ଯେ, ଗୋଟିଏ ରୋଲରକୋଷ୍ଟର ଟ୍ରେନ୍ ଯାନ୍ତ୍ରିକ ତ୍ରୁଟି ପାଇଁ ଅଚାନକ ବନ୍ଦ ହୋଇଯିବାର ଅନ୍ୟ ଟ୍ରେନ୍ଟି ହଠାତ ବନ୍ଦ କରିପାରି ନଥିଲା । ଫଳରେ ଦୁଇ ଟ୍ରେନ୍ ମଧ୍ୟରେ ଦୁର୍ଘଟଣା ଘଟିଥିଲା ।
ଉଭୟ ଟ୍ରେନ୍ରେ ମୋଟ ୩୮ ଜଣ ଲୋକ ଥିଲେ । କିନ୍ତୁ ପାର୍କ ପକ୍ଷରୁ କୁହାଯାଇଛି ଯେ, ସେମାନଙ୍କ ମଧ୍ୟରୁ ୩୧ ଜଣ ଛୋଟ ପିଲା ଆହତ ହୋଇଛନ୍ତି । ଆହତମାନଙ୍କ ମଧ୍ୟରୁ ୧୪ ଜଣଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି । ଜଣେ ବ୍ୟକ୍ତି ଗୁରୁତର ଥିବାରୁ ତାଙ୍କୁ ଅଧିକ ଚିକିତ୍ସାର ଆବଶ୍ୟକତା ରହିଛି । ଜର୍ମାନୀ ମିଡିଆ ପକ୍ଷରୁ କୁହାଯାଇଛି ଯେ, ଆହତମାନଙ୍କୁ ହସ୍ପିଟାଲରେ ଭର୍ତ୍ତି କରିବା ପାଇଁ ୩ଟି ହେଲିକପ୍ଟର ନିୟୋଜିତ ହୋଇଥିଲା ।