ନୂଆଦିଲ୍ଲୀ: ବୁଧବାର ରାତିରେ ବ୍ରିଟିଶ କଲମ୍ବିଆର ସରେରେ ପ୍ରସିଦ୍ଧ ହାସ୍ୟ ଅଭିନେତା କପିଲ ଶର୍ମାଙ୍କ କାନାଡା ସ୍ଥିତ KAP'S CAFE ଉପରେ ଗୁଳିମାଡ଼ ହୋଇଛି। କପିଲ ଏହି କାଫେ ଖୋଲିଛନ୍ତି। କାଫେରେ ଅନେକ ରାଉଣ୍ଡ ଗୁଳିଚାଳନା କରାଯାଇଛି। ଏଥିରେ ମୃତାହତର କୌଣସି ଖବର ନାହିଁ। ବର୍ତ୍ତମାନ ପୋଲିସ ଘଟଣାର ତଦନ୍ତ ଆରମ୍ଭ କରିଛି।

ଏହି ଆକ୍ରମଣର ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି ଯେଉଁଥିରେ ସ୍ପଷ୍ଟ ଭାବରେ ଦେଖାଯାଉଛି ଯେ ଜଣେ ବ୍ୟକ୍ତି ରାତିର ଅନ୍ଧାରରେ କାଫେରେ ଗୁଳିଚାଳନା କରୁଛନ୍ତି। ଏହି ବ୍ୟକ୍ତି ଜଣକ ଏକ କାରରେ ବସି ଆଖିବୁଜା ଗୁଳିଚାଳନା କରୁଥିବା ଦେଖାଯାଉଛି।

ଏବେ ଏହି ମାମଲାରେ ମୋଷ୍ଟ ୱାଣ୍ଟେଡ୍ ଖଲିସ୍ତାନି ଆତଙ୍କବାଦୀର ନାମ ସାମ୍ନାକୁ ଆସିଛି। ଏହି ଆକ୍ରମଣ ପାଇଁ ଖଲିସ୍ତାନି ଆତଙ୍କବାଦୀ ହରଜିତ ସିଂହ ଲଡ୍ଡି ନିଜକୁ ଦାୟୀ କରିଛନ୍ତି। NDTV ସୂତ୍ର ଅନୁଯାୟୀ,  କପିଲ ଶର୍ମାଙ୍କ କିଛି ପୁରୁଣା ବୟାନ ଯୋଗୁଁ ହରଜିତ ସିଂହ ଲଡ୍ଡି ଏହି ଆକ୍ରମଣ କରିଛନ୍ତି। ହରଜିତ ସିଂହ ଲଡ୍ଡି NIAର ମୋଷ୍ଟ ୱାଣ୍ଟେଡ୍ ଆତଙ୍କବାଦୀଙ୍କ ତାଲିକାରେ ଅଛନ୍ତି। ସେ ବବର ଖାଲସା ଇଣ୍ଟରନ୍ୟାସନାଲ ସହିତ ଜଡିତ।

ବର୍ତ୍ତମାନ ଏହି ମାମଲାରେ କପିଲ ଶର୍ମା କିମ୍ବା ତାଙ୍କ ଦଳ ପକ୍ଷରୁ କୌଣସି ବୟାନ ଆସିନାହିଁ। ତଥାପି, ପୋଲିସ ଏବଂ ଫୋରେନସିକ୍ ଟିମ୍ ଏହି ଘଟଣାର ତଦନ୍ତ କରୁଛନ୍ତି। ପୋଲିସ ଅନୁଯାୟୀ, କପିଲଙ୍କ କାଫେରେ ଅନେକ ରାଉଣ୍ଡ ଗୁଳିଚାଳନା ହୋଇଛି। କାଫେରେ ଗୁଳି ଚିହ୍ନ ଅଛି। ଅଞ୍ଚଳକୁ ସିଲ୍ କରାଯାଇଛି ଏବଂ ସିସିଟିଭି ଫୁଟେଜ୍ ଯାଞ୍ଚ କରାଯାଉଛି।