ମୁମ୍ବାଇ:  ଜୁନିୟର ଏନଟିଆରଙ୍କ ବହୁ ପ୍ରତୀକ୍ଷିତ ଫିଲ୍ମ ‘ଦେବରା’ ସିନେମାଘରେ ରିଲିଜ ହୋଇ ସାରିଛି । ଦର୍ଶକ ଫିଲ୍ମକୁ ବହୁତ ପସନ୍ଦ କରୁଛନ୍ତି । ଯାହାର ପ୍ରଭାବ ବକ୍ସ ଅଫିସରେ ମଧ୍ୟ ଦେଖିବାକୁ ମିଳିଛି । କେବଳ ଘରୋଇ ବକ୍ସ ଅଫିସ ନୁହେଁ ୱାର୍ଲ୍‌ଡୱାଇଡରେ ବି ଫିଲ୍ମ ଦମଦାର କାରବାର କରୁଛି । ରିଲିଜର ପ୍ରଥମ ଦୁଇ ଦିନରେ ‘ଦେବରା’ ୨୦୦ କୋଟି କ୍ଲବରେ ସାମିଲ ହୋଇଛି । 

ସାକନିଲ୍କର ରିପୋର୍ଟ ଅନୁଯାୟୀ, ଜୁନିୟର ଏନଟିଆରଙ୍କ ଫିଲ୍ମ ‘ଦେବରା ପାର୍ଟ-୧’ ସମଗ୍ର ଦୁନିଆରେ ୨୦୦ କୋଟିରୁ ଅଧିକ ଆୟ କରି ସାରିଛି । ଫିଲ୍ମ ପ୍ରଥମ ଦୁଇ ଦିନରେ ୨୦୩ କୋଟି ଟଙ୍କାର ବ୍ୟବସାୟ କରିଛି । ଏହା ସହିତ  ଚଳିତ ବର୍ଷର ସବୁଠୁ ବଡ ଫିଲ୍ମ ସ୍ତ୍ରୀ ୨କକୁ ମଧ୍ୟ ପଛରେ ପକାଇ ଦେଇଛି ।

ସ୍ତ୍ରୀ ୨ ଚଳିତ ବର୍ଷ ଅଗଷ୍ଟ ୧୫ ତାରିଖରେ ରିଲିଜ ହୋଇଥିଲା । ଫିଲ୍ମ ଦମଦାର ଓପନିଂ ପରେ ଦୁଇ ଦିନରେ ସମଗ୍ର ଦୁନିଆରେ ମୋଟ୍ ୧୩୦.୦୫ କୋଟି ଟଙ୍କାର ବକ୍ସ ଅଫିସ କଲେକ୍ସନ କରିଥିଲା । ‘ଦେବରା’ ଏହି ରେକର୍ଡକୁ ପଛରେ ପକାଇ ଦେଇଛି । 

ଘରୋଇ  ବକ୍ସ ଅଫିସରେ ‘ଦେବରା’ର ଜଲୱା ଦେଖିବାକୁ ମିଳିଛି । ୫ ଭାଷା ତେଲୁଗୁ, ହିନ୍ଦୀ, ତାମିଲ, ମାଲାୟଲମ ଓ କନ୍ନଡରେ ରିଲିଜ ଏହି ଫିଲ୍ମ ପ୍ରଥମ ଦିନ ୮୨.୫ କୋଟି ଟଙ୍କା କାରବାର କରି ବର୍ଷର ଦ୍ୱିତୀୟ ବଡ ଓପନର ଫିଲ୍ମ ହୋଇ ପାରିଛି । ଏଥିସହ ଦୁଇ ଦିନରେ ମୋଟ୍ ୧୨୦.୭ କୋଟି ଟଙ୍କାର କଲେକ୍ସନ କରିଛି ‘ଦେବରା’ । 

କୋରାତାଲା ଶିବାଙ୍କ ନିର୍ଦ୍ଦେଶନାରେ ନିର୍ମିତ ‘ଦେବରା ପାର୍ଟ-୧’ରେ ଭରପୁର ଆକ୍ସନ ଦେଖିବାକୁ ମିଳିଛି । ଜୁନିୟର ଏନଟିଆରଙ୍କ ଫିଲ୍ମ କ୍ୟାରିୟରର ଏହା ସବୁଠୁ ବଡ ଫିଲ୍ମ ସାବ୍ୟସ୍ତ ହୋଇଛି । ତାଙ୍କ ସହିତ ଲିଡ ରୋଲରେ ସୈଫ ଅଲ୍ଲୀ ଖାନ ଓ ଜାହ୍ନବୀ କପୁର ରହିଛନ୍ତି । ଏହି ଦୁଇ କଳାକାର ଦେବରା ଜରିଆରେ ସାଉଥ ଫିଲ୍ମରେ ପାଦ ଥାପିଛନ୍ତି ।