ମୁୁମ୍ବାଇ: ବରୁଣ ଧାୱନଙ୍କ ବହୁ ପ୍ରତୀକ୍ଷିତ ଫିଲ୍ମ ବେବି ଜନ ଆଜି ସିନେମାଘରେ ରିଲିଜ ହୋଇଛି । ଫିଲ୍ମ କ୍ରିସମସ ଅବସରରେ ପରଦାକୁ ଆସିଛି । ଆଉ ନିର୍ମାତା ଫିଲ୍ମକୁ ନେଇ ଅନେକ ଆଶା ବାନ୍ଧି ବସିଛନ୍ତି । ମାତ୍ର ବରୁଣ ଧାୱନଙ୍କ ଫିଲ୍ମ ଅଲ୍ଲୁ ଅର୍ଜୁନଙ୍କ ପୁଷ୍ପା ୨: ଦ ରୁଲ ଆଗରେ ଫିକା ପଡି ଯାଉଥିବା ଦେଖିବାକୁ ମିଳିଛି ଏବଂ ବକ୍ସ ଅଫିସରେ ଏହାର ଓପନିଂ ବହୁତ ମନ୍ଥର ରହିଛି ।

ବେବି ଜନର ରିଲିଜର ପ୍ରଥମ ଦିନ ପାଇଁ ଆଡଭାନ୍ସ ବୁକିଂ ଡିସେମ୍ବର ୨୨ରେ ଆରମ୍ଭ ହୋଇଥିଲା । ସାକନିଲକର ରିପୋର୍ଟ ଅନୁଯାୟୀ, ଫିଲ୍ମ ବ୍ଲକ ସିଟ୍ ସହ ୫.୦୯ କୋଟି ବ୍ୟବସାୟ କରିଥିଲା । ଏବେ ବେବି ଜନ ଫିଲ୍ମ ରିଲିଜ ହୋଇ ସାରିଛି ଏବଂ ପ୍ରଥମ ଦିନର ବକ୍ସ ଅଫିସ କଲେକ୍ସନର ପ୍ରାରମ୍ଭିକ ରିପୋର୍ଟ ସାମ୍ନାକୁ ଆସିଛି । ଫିଲ୍ମ ଭାରତରେ ଅପରାହ୍ଣ ୧ଟା ୩୦ ସୁଦ୍ଧା ୨.୮୨ କୋଟି ଟଙ୍କା ଆୟ କରିଛି । 

ବେବି ଜନ ପୂର୍ବରୁ ରିଲିଜ ହୋଇଥିବା ପୁଷ୍ପା ୨ର ବକ୍ସ ଅଫିସରେ ଏବେ ବି ଧମାଲ କରୁଛି । ଫିଲ୍ମ ପ୍ରତି ଦିନ କୋଟି କୋଟି ଟଙ୍କାର କାରବାର କରୁଛି । ଅଲ୍ଲୁ ଅର୍ଜୁନଙ୍କ ଫିଲ୍ମ ୨୧ତମ ଦିନ ଅର୍ଥାତ ଡିସେମ୍ବର ୨୫ରେ ଦମଦାର କଲେକ୍ସନ କରୁଛି ଓ ବେବି ଜନ ଏଥିରେ ବହୁ ପଛରେ ରହିଛି । ପୁଷ୍ପା ୨ ଡିସେମ୍ବର ୨୫ରେ ଏ ପର୍ଯ୍ୟନ୍ତ ୫.୧୪ କୋଟି ଟଙ୍କାର କାରବାର କରି ସାରିଛି । 

ବରୁଣ ଧାୱନ ଅଭିନୀତ ଫିଲ୍ମ ବେବି ଜନ ଥଲାପତି ବିଜୟଙ୍କ ତାମିଲ ଫିଲ୍ମ ଥେରି(୨୦୧୬)ର ରିମେକ । ଫିଲ୍ମର ନିର୍ଦ୍ଦେଶନା ଦେଇଛନ୍ତି ଏଟଲି । ବେବି ଜନ ଜରିଆରେ ଏଟଲି ଓ ବରୁଣ ଧାୱନ ପ୍ରଥମ ଥର ଏକାଠି କାମ କରିଛନ୍ତି । ଆକ୍ସନରେ ଭରପୂର ଏହି ଫିଲ୍ମରେ ବରୁଣଙ୍କ ବ୍ୟତୀତ କୀର୍ତ୍ତି ସୁରେଶ ଓ ଭାମିକା ଗବ୍ୱି ପ୍ରମୁଖ ଚରିତ୍ରରେ ଅଭିନୟ କରୁଛନ୍ତି । ଜ୍ୟାକି ସ୍ରଫ ଭିଲେନ ଭୂମିକାରେ ନଜର ଆସିଛନ୍ତି । ମୋଟ୍ ୮୫ କୋଟି ବଜେଟରେ ଫିଲ୍ମର ନିର୍ମାଣ  ହୋଇଛି ।