ବଲାଙ୍ଗୀର ରାଜେନ୍ଦ୍ର ବିଶ୍ୱବିଦ୍ୟାଳୟର ପରୀକ୍ଷା ଫଳ ପ୍ରକାଶ ପାଇଛି। ବିଶ୍ୱବିଦ୍ୟାଳୟ କର୍ତ୍ତୃପକ୍ଷଙ୍କ ପକ୍ଷରୁ ଚଳିତ ବର୍ଷର ୟୁଜି (UG), ପିଜି (PG) ଏବଂ ଇଣ୍ଟିଗ୍ରେଟେଡ୍ ବିଇଡି-ଏମଇଡି (Integrated B.Ed-M.Ed) ପରୀକ୍ଷା ଫଳ ଘୋଷଣା କରାଯାଇଛି। ତେବେ ଏଥର ସ୍ନାତକ ବା ୟୁଜି ପରୀକ୍ଷା ଫଳ ସମସ୍ତଙ୍କୁ ଚକିତ କରିବା ସହ ବେଶ୍ ନିରାଶାଜନକ ରହିଛି। ବିଶ୍ୱବିଦ୍ୟାଳୟର ମୋଟ ସ୍ନାତକ ପାସ୍ ହାର ମାତ୍ର ୪୦ ପ୍ରତିଶତ ରେକର୍ଡ କରାଯାଇଛି।

ସୂଚନା ଅନୁଯାୟୀ, ଚଳିତ ବର୍ଷ ୟୁଜି ପରୀକ୍ଷାରେ ମୋଟ ୭,୮୬୪ ଜଣ ଛାତ୍ରଛାତ୍ରୀ ପରୀକ୍ଷା ଦେଇଥିବା ବେଳେ ସେମାନଙ୍କ ମଧ୍ୟରୁ ମାତ୍ର ୩,୧୨୩ ଜଣ କୃତକାର୍ଯ୍ୟ ହୋଇଛନ୍ତି। ୟୁଜି ପରୀକ୍ଷାରେ ଯୁବୋଦୟ କଲେଜ ଅଫ ଆଡଭାନ୍ସ ଟେକ୍ନୋଲୋଜି (ସକମା)ର ଛାତ୍ରୀ ଦେବଜାନି ଖମାରୀ ସାରା ବିଶ୍ୱବିଦ୍ୟାଳୟରେ ଟପ୍ପର ହେବାର ଗୌରବ ଅର୍ଜନ କରିଛନ୍ତି।

ଅପରପକ୍ଷରେ, ପିଜି ବା ସ୍ନାତକୋତ୍ତର ପରୀକ୍ଷା ଫଳ ବେଶ୍ ଉତ୍ସାହଜନକ ରହିଛି। ପିଜିର ୧୮ଟି ବିଭାଗରେ ମୋଟ ପାସ୍ ହାର ୮୪.୮ ପ୍ରତିଶତ ରହିଛି। ପରୀକ୍ଷା ଦେଇଥିବା ୫୦୫ ଜଣ ଛାତ୍ରଛାତ୍ରୀଙ୍କ ମଧ୍ୟରୁ ୪୨୮ ଜଣ ଉତ୍ତୀର୍ଣ୍ଣ ହୋଇଛନ୍ତି। ଜୁଲୋଜି ବିଭାଗର ଛାତ୍ରୀ ରେବତୀ ସ୍ବାଇଁ ୯.୬୭ ସିଜିପିଏ (CGPA) ରଖି ପିଜି ଟପ୍ପର ହୋଇଛନ୍ତି। ସେହିପରି ଇଣ୍ଟିଗ୍ରେଟେଡ ବିଇଡି-ଏମଇଡି ପରୀକ୍ଷାରେ ସର୍ବାଧିକ ୯୭.୭୮ ପ୍ରତିଶତ ପିଲା ସଫଳତା ପାଇଥିବା ବେଳେ ପ୍ରିୟବ୍ରତ ସେନ ବିଶ୍ୱବିଦ୍ୟାଳୟ ଟପ୍ପର ହୋଇଛନ୍ତି। ୟୁଜି ପାସ୍ ହାର ଏତେ କମ୍ ହେବା ପଛର କାରଣକୁ ନେଇ ଏବେ ଶିକ୍ଷାବିତ୍‌ ଓ ଛାତ୍ରଛାତ୍ରୀଙ୍କ ମଧ୍ୟରେ ଚର୍ଚ୍ଚା ଜୋର ଧରିଛି।