ରାଉରକେଲା: ନିଶା କାରବାର ରୋକିବାକୁ ରାଉରକେଲା ପୋଲିସର ବଡ଼ ଧରଣର ଚଢ଼ାଉ । ଶୁକ୍ରବାର ସକାଳୁ ନିଶା ବେପାରୀଙ୍କୁ ଘେରିଛି ପ୍ଲାଣ୍ଟସାଇଟ୍ ଥାନା ପୋଲିସ । ଚଢ଼ାଉ କରି ନିଶା ବେପାର କାରବାର ସମ୍ପୃକ୍ତି ଅଭିଯୋଗରେ ୪ ଜଣଙ୍କୁ ଅଟକ ରଖିଛି ପୋଲିସ । ଏହା ସହିତ ୩୦୦ ଗ୍ରାମ ବ୍ରାଉନ ସୁଗାର ସହିତ ଗଞ୍ଜେଇ ଏବଂ ଅନ୍ୟ ନିଶା ଦ୍ରବ୍ୟ ଜବତ କରାଯାଇଛି । 

ପ୍ଲାଟସାଇଟ୍ ଥାନା ଅନ୍ତର୍ଗତ ମୀନାପଡ଼ାରେ ନିଶାର କାରବାର ଚାଲିଥିବା ନେଇ ପୋଲିସକୁ ଗୁଇନ୍ଦା ସୂଚନା ମିଳିଥିଲା । ଏ ନେଇ ପୋଲିସ ଏକ ଯୋଜନା ପ୍ରସ୍ତୁତ କରିଥିଲା । ଆଜି ଭୋରରୁ ଏସପି ନୀତେଶ ୱାଧୱାନୀଙ୍କ ନିର୍ଦ୍ଦେଶ କ୍ରମେ ସହରର ମହତାବ ରୋଡ଼ର ମିନାପଡାରେ ଚଢ଼ାଉ କରାଯାଇଛି । ପୋଲିସ ଫୋର୍ସ ମହତାବ ରୋଡ ଓ ରିଂ ରୋଡ ଘେରାବନ୍ଦୀ କରିଥିଲେ । ପ୍ରାୟ ଦୁଇ ଘଣ୍ଟା ଧରି ଚାଲିଥିଲା ଖୋଳତାଡ଼ । ଚଢ଼ାଉ ପରେ ୪ ଜଣଙ୍କୁ ଅଟକ ରଖାଯାଇଛି । ସେମାନଙ୍କ ନିକଟରୁ ବ୍ୟାପକ ପରିମାଣରେ ନିଶା ଦ୍ରବ୍ୟ ମଧ୍ୟ ଜବତ କରାଯାଇଛି ।

୨ ଜଣ ଅତିରିକ୍ତ ଏସପି, ୩ ଜଣ ଜୋନାଲ ଡ଼ିଏସପି,  ୬ ପ୍ଲାଟୁନ ପୁଲିସ ଫୋର୍ସ ଓ ୨୦ ରୁ ଅଧିକ ଇନ୍ସପେକ୍ଟରଙ୍କୁ ଏହି ଯୋଜନାରେ ସାମିଲ କରାଯାଇଥିଲା । ଏହା ସହିତ ଡଗ୍ ସ୍କ୍ୱାର୍ଡ ମଧ୍ୟ ନିୟୋଜିତ ହୋଇଥିଲେ ।