ଭୁବନେଶ୍ୱର:  ଭୁବନେଶ୍ୱର ପାଣ୍ଡରା ଛକରେ ଏକ  ଅଭାବନୀୟ ଘଟଣା ଘଟିଛି । ଜଣେ ଆଇନଜୀବୀ ସନ୍ଦେହ ଜନକ ମୃତ୍ୟୁ ହୋଇଛି । ନିଜ ବାସଭବନର ଛାତ ଉପରେ ଜୀବନ ଦଗ୍ଧ ହୋଇଯାଇଛନ୍ତି । ମୃତକ ହେଲେ ଆଇନଜୀବୀ ଦୀପକ କୁମାର ସାହୁ । ଏହା ହତ୍ୟା ନା ଆତ୍ମାହୁତି ତାହା ସ୍ପଷ୍ଟ ହୋଇ ନ ଥିବାବେଳେ ମଞ୍ଚେଶ୍ୱର ଥାନା ପୋଲିସ ତଦନ୍ତ ଆରମ୍ଭ କରିଛି । 

ଆଇନଜୀବୀ ଦୀପକ କୁମାର ସାହୁଙ୍କର ପାଣ୍ଡରା ଛକ ନିକଟସ୍ଥ ଜଗନ୍ନାଥ ମନ୍ଦିର ପାର୍ଶ୍ୱରେ ଘର ରହିଛି । ସେ  ବିବାହିତ ହୋଇଥିବାବେଳେ ତାଙ୍କର ଦୁଇଟି ଝିଅ  ମଧ୍ୟ ଅଛନ୍ତି । ପରିବାର ଲୋକଙ୍କ କହିବା ମୁତାବକ ଛାତ ଉପରେ ଥିବା ଏକ କୋଠରୀରେ ସେ ନିଜର ଅଫିସ କାମ କରନ୍ତି । ଗତକାଲି ରାତି ପ୍ରାୟ ୮ଟାରେ ଦୀପକ ଗରମ ହେଉଛି କହି ଛାତ ଉପରକୁ ଯାଇଥିଲେ । କିନ୍ତୁ ବହୁତ ସମୟ ପର୍ଯ୍ୟନ୍ତ ସେ ତଳକୁ ଫେରି ନ ଥିଲେ । ଏହା ପରେ ସ୍ତ୍ରୀ ଦୀପକଙ୍କୁ ଡାକିବାକୁ ଉପରକୁ ଯାଇଥିଲେ । କିନ୍ତୁ ଦେଖିଲେ ଛାତ କବାଟ ବାହାର ପାର୍ଶ୍ୱରୁ ବନ୍ଦ ହୋଇଛି । ଏହା ପରେ ସ୍ତ୍ରୀ ପଡ଼ୋଶୀଙ୍କ ଛାତକୁ ଯାଇ ଯାହା ଦେଖିଥିଲେ , ତାଙ୍କ ପାଦ ତଳୁ ମାଟି ଖସି ଯାଇଥିଲା । ଦୀପକ ପୋଡ଼ି ହୋଇ ତଳେ ପଡ଼ିଥିବା ଦେଖିବାକୁ ପାଇଥିଲେ । ଏହା ପରେ ପଡ଼ୋଶୀ ମଞ୍ଚେଶ୍ୱର ଥାନା ପୋଲିସକୁ ଖବର ଦେଇଥିଲେ । ପୋଲିସ ଏବଂ ସାଇଣ୍ଟିଫିକ୍ ଟିମ୍ ପହଁଚି ମୃତ ଦେହକୁ ଜବତ କରିବା ସହିତ ଶବ ବ୍ୟବଚ୍ଛେଦ ପାଇଁ ପଠାଇ ଦେଇଛି । 

ତେବେ ଏଠାରେ ପ୍ରଶ୍ନ ଉଠୁଛି ଦୀପକ କାହିଁକି ଉପରକୁ ଯାଇଥିଲେ ଏବଂ ତାଙ୍କର ମୃତ୍ୟୁ ହେଲା । ପ୍ରାଥମିକ ପର୍ଯ୍ୟାୟରେ ଏହା ଏକ ଆତ୍ମହତ୍ୟା ବୋଲି ସନ୍ଦେହ କରାଯାଉଛି । ତଥାପି ସେହି ସ୍ଥାନରୁ ପେଟ୍ରୋଲ ଗନ୍ଧ ଆସୁଛି । କିନ୍ତୁ ସେ କାହିଁକି ଆତ୍ମହତ୍ୟା କରିଛନ୍ତି ତାହା ମଧ୍ୟ ବଡ଼ ପ୍ରଶ୍ନ । ପରିବାର ଲୋକଙ୍କ ମୁତାବକ ସେ କିଛି ଦିନ ହେବ କୌଣସି କଥାକୁ ନେଇ ସେ ଦୁଶ୍ଚିନ୍ତାରେ ରହୁଥିଲେ । ଏମିତିକି ଡାକ୍ତରଙ୍କ ପରାମର୍ଶ ମଧ୍ୟ ନେଇଥିଲେ । କିନ୍ତୁ ସେ ମେଡ଼ିସିନ୍ ଖାଇ ନଥିଲେ । ପରିବାର ପକ୍ଷରୁ ଏହା ଏକ ହତ୍ୟାକାଣ୍ଡ ବୋଲି ଅଭିଯୋଗ କରାଯାଇଛି । 

ଶବବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର କାରଣ ସ୍ପଷ୍ଟ ହେବ ବୋଲି ପୋଲିସ କହିଛି ।