ମସ୍କୋ/କ୍ରେମଲିନ୍: ଚୀନର ତିଆନଜିନ୍ରେ ଅନୁଷ୍ଠିତ ସାଂଘାଇ ସହଯୋଗ ସଂଗଠନ (SCO) ଶିଖର ସମ୍ମିଳନୀ ଅବସରରେ ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ମଧ୍ୟରେ ଦ୍ୱିପାକ୍ଷିକ ବୈଠକର କାର୍ଯ୍ୟସୂଚୀ ପ୍ରକାଶ ପାଇଛି। ସୋମବାର ଚୀନର ତିଆନଜିନ୍ରେ ଅନୁଷ୍ଠିତ SCO ଶିଖର ସମ୍ମିଳନୀ ସମୟରେ ଦୁଇ ନେତା ସାକ୍ଷାତ କରିବେ। ପ୍ରଧାନମନ୍ତ୍ରୀ ମୋଦୀ ଏବଂ ରାଷ୍ଟ୍ରପତି ପୁଟିନଙ୍କ ମଧ୍ୟରେ ହେବାକୁ ଥିବା ଏହି ସାକ୍ଷାତ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ବହୁତ ଟେନସନ ଦେଇପାରେ।
କ୍ରେମଲିନ୍ ବୈଦେଶିକ ନୀତି ପରାମର୍ଶଦାତା ୟୁରି ଉଷାକୋଭ୍ ଶୁକ୍ରବାର କହିଛନ୍ତି, ଦୁଇ ନେତାଙ୍କ ମଧ୍ୟରେ ଏହି ବୈଠକ ସେପ୍ଟେମ୍ବର ୧ ରେ ତିଆନଜିନ୍ରେ ହେବ। ଆମେରିକା ଭାରତ ଉପରେ ୫୦ ପ୍ରତିଶତ ଶୁଳ୍କ ଲାଗୁ କରିବା ପରେ ଏହା ପ୍ରଧାନମନ୍ତ୍ରୀ ମୋଦୀ ଏବଂ ପୁଟିନ୍ଙ୍କ ମଧ୍ୟରେ ପ୍ରଥମ ବୈଠକ। ଆମେରିକା ବାରମ୍ବାର କହି ଆସିଛି ଯେ ସେ ରୁଷଠୁ ଅଶୋଧିତ ତେଲ କିଣିବା କାରଣରୁ ଭାରତ ଉପରେ ଏହି ଶୁଳ୍କ ଲାଗୁ ହୋଇଛି। ଏପରି ସ୍ଥିତିରେ, ଦୁଇ ନେତାଙ୍କ ମଧ୍ୟରେ ଏହି ବୈଠକକୁ ବେଶ ଗୁରୁତ୍ୱପୂର୍ଣ୍ଣ ବୋଲି କୁହାଯାଉଚି। ଏହି ବୈଠକ ସମୟରେ, ଉଭୟ ନେତା ଟ୍ରମ୍ପଙ୍କ ଶୁଳ୍କର ଜବାବ ଦେବା ପାଇଁ ଏକ ନୂତନ ବିକଳ୍ପ ବିଷୟରେ ଆଲୋଚନା କରି ପାରନ୍ତି। ଦୁଇ ନେତାଙ୍କ ଏହି ବୈଠକ ଆମେରିକା ପାଇଁ ଚିନ୍ତାର କାରଣ ପାଲଟିପାରେ।
ଉଷାକୋଭ କହିଛନ୍ତି ଯେ ପ୍ରଧାନମନ୍ତ୍ରୀ ମୋଦୀ ଏବଂ ରାଷ୍ଟ୍ରପତି ପୁଟିନ ଉଭୟ ଅଗଷ୍ଟ ୩୧ରୁ ସେପ୍ଟେମ୍ବର ୧ ପର୍ଯ୍ୟନ୍ତ ଚୀନ ଗସ୍ତରେ ରହିବେ। ଏଠାରେ SCO ସମ୍ମିଳନୀରେ ଦୁଇ ନେତା ଯୋଗଦେବେ। ସେପ୍ଟେମ୍ବର ୧ରେ SCO ବୈଠକ ପରେ, ଆମର ରାଷ୍ଟ୍ରପତି ପ୍ରଧାନମନ୍ତ୍ରୀ ମୋଦୀଙ୍କୁ ଭେଟିବେ।୨୦୨୫ ମସିହାରେ ଦୁଇ ନେତାଙ୍କ ଏହା ପ୍ରଥମ ସିଧାସଳଖ ବୈଠକ ହେବ। ଉଷାକୋଭ ସ୍ପଷ୍ଟ କରିଛନ୍ତି ଯେ ଦୁଇ ନେତା ନିୟମିତ ଟେଲିଫୋନରେ ଯୋଗାଯୋଗରେ ଅଛନ୍ତି। ଦୁଇ ନେତାଙ୍କ ମଧ୍ୟରେ ଏହି ବୈଠକ ଏପରି ଏକ ସମୟରେ ହେଉଛି ଯେତେବେଳେ ଭାରତ ଏବଂ ରୁଷ ମଧ୍ୟରେ ରଣନୈତିକ ସଂପର୍କ ୧୫ ବର୍ଷ ପୂରଣ ହେଉଛି।
ଉଷାକୋଭ କହିଛନ୍ତି ଯେ ମୋଦୀ-ପୁଟିନ ବୈଠକ ସମୟରେ ରାଷ୍ଟ୍ରପତି ପୁଟିନଙ୍କ ଡିସେମ୍ବରରେ ପ୍ରସ୍ତାବିତ ଭାରତ ଗସ୍ତର ପ୍ରସ୍ତୁତି ଉପରେ ମଧ୍ୟ ବିସ୍ତୃତ ଆଲୋଚନା କରାଯିବ। ସେ କହିଛନ୍ତି, "ଆମ ଦୁଇ ଦେଶ ମଧ୍ୟରେ ସମ୍ପର୍କ ବହୁମୁଖୀ ଏବଂ ଆଗାମୀ ମାସଗୁଡ଼ିକରେ ଏହା ଆହୁରି ମଜବୁତ ହେବ।"
Also read: ବିଦେଶୀ ସନ୍ଦେହରେ ୩ ଲକ୍ଷ ଭୋଟରଙ୍କୁ ନିର୍ବାଚନ କମିଶନଙ୍କ ନୋଟିସ: ନାଗରିକତା ପ୍ରମାଣ ଦେଇ ନ ପାରିଲେ କଟିବ ଭୋଟର ଲିଷ୍ଟରୁ ନାଁ