ଭୁବନେଶ୍ୱର: ମୁଖ୍ୟମନ୍ତ୍ରୀଙ୍କୁ ଭେଟିଲେ ଟାଟା ଷ୍ଟିଲ ପରିଚାଳନା ନିର୍ଦ୍ଦେଶକ । ଲୋକସେବା ଭବନରେ ମୁଖ୍ୟମନ୍ତ୍ରୀ ମୋହନ ମାଝୀଙ୍କୁ ଭେଟି ଆଲୋଚନା କରିଛନ୍ତି ଟାଟା ଷ୍ଟିଲ ଏମଡି ଟିଭି ନରେନ୍ଦ୍ରନ । ପାରସ୍ପରିକ ସହଯୋଗ, ଶିଳ୍ପୋଦ୍ୟୋଗ ଗତିବିଧିର ସଂପ୍ରସାରଣ ନେଇ ଆଲୋଚନା କରିଛନ୍ତି । ଏହା ସହ ଓଡ଼ିଶାରେ ନୂତନ ଶିଳ୍ପ ପାଇଁ ସମ୍ଭାବନା ଉପରେ ମଧ୍ୟ ମୁଖ୍ୟମନ୍ତ୍ରୀଙ୍କ ସହ ଆଲୋଚନା କରିଛନ୍ତି ଟାଟା ଷ୍ଟିଲ ଏମଡି। ରାଜ୍ୟରେ ଷ୍ଟିଲ ଶିଳ୍ପର ଅଭିବୃଦ୍ଧି ଉପରେ ଆଲୋଚନା ହୋଇଥିବା ଜଣାପଡିଛି । ଶିଳ୍ପର ବିକାଶ ପାଇଁ ରାଜ୍ୟ ସରକାର ସମସ୍ତ ସହଯୋଗ ଯୋଗାଇ ଦେବେ ବୋଲି ମୁଖ୍ୟମନ୍ତ୍ରୀ ଆଶ୍ବାସନା ଦେଇଛନ୍ତି ।
ଟାଟା ଷ୍ଟିଲ ସବୁବେଳେ ଓଡିଶା ପ୍ରତି ନିଜର ପ୍ରତିବଦ୍ଧତାକୁ ଦର୍ଶାଇ ଆସିଛି । ସର୍ବାଧିକ ଷ୍ଟିଲ ଉତ୍ପାଦନ ସହ ସର୍ବନିମ୍ନ କାର୍ବନ ନିର୍ଗମନକୁ ଗୁରୁତ୍ବ ଦେଇଆସିଛି । କଳିଙ୍ଗ ନଗର ପ୍ଲାଣ୍ଟ ଅନ୍ୟତମ ଗ୍ରୀନ ଫିଲଡ ଷ୍ଟିଲ ପ୍ଲାଣ୍ଟ ମଧ୍ୟରେ ଅନ୍ୟତମ । ଏହାସହ ପ୍ଲାଣ୍ଟ ସ୍ଥାପନ ସ୍ଥାନରେ ସ୍ଥାନୀୟ ଅଧିବାସୀଙ୍କୁ ନିଯୁକ୍ତି ବୃଦ୍ଧି ପାରିପାର୍ଶ୍ବିକ ସ୍ଥିତିର ବିକାଶ ଆଦିକୁ ପ୍ରାଧାନ୍ୟ ଦେଇଆସିଛି ।
ଓଡ଼ିଶାରେ ଟାଟା ଷ୍ଟିଲର ଦୁଇଟି ବୃହତ ପ୍ରକଳ୍ପ କାର୍ଯ୍ୟ କରୁଛି । ଯାଜପୁର କଳିଙ୍ଗ ନଗର ଠାରେ ଷ୍ଟିଲ ଉତ୍ପାଦନ କରୁଛି ଟାଟାର ପ୍ଲାଣ୍ଟ । ୨୦୧୬ରେ ଏଠାରୁ ଷ୍ଟିଲ ଉତ୍ପାଦନ ଆରମ୍ଭ ହୋଇଛି । ପ୍ରଥମେ ଏହାର ବାର୍ଷିକ ଉତ୍ପାଦନ କ୍ଷମତା ୩ ମିଲିୟନ ଟନ ରହିଥିଲା । ପରେ ଦ୍ବିତୀୟ ପର୍ଯ୍ୟାୟରେ ସଂପ୍ରସାରଣ ଚଳିତ ବର୍ଷ ମେ ମାସରୁ ଆରମ୍ଭ ହୋଇଛି । ସଂପ୍ରସାରିତ ପ୍ଲାଣ୍ଟରୁ ବାର୍ଷିକ ୮ ମିଲିୟନ ଟନ ଷ୍ଟିଲ ଉତ୍ପାଦନ ଲକ୍ଷ୍ୟ ରଖାଯାଇଛି। ଢେଙ୍କାନାଳ ଜିଲ୍ଲା ମେରାମୁଣ୍ଡଳୀ ଠାରେ ରହିଛି ଟାଟାର ଦ୍ବିତୀୟ ପ୍ଲାଣ୍ଟ । ୨୦୧୮ରେ ଏହି ପ୍ଲାଣ୍ଟକୁ ଭୂଷଣ ଠାରୁ ଅଧିଗ୍ରହଣ କରିଥିଲା ଟାଟା ଷ୍ଟିଲ । ଏହାର ବାର୍ଷିକ ଉତ୍ପାଦନ କ୍ଷମତା ପ୍ରାୟ ୫ମିଲିୟନ ଟନ ରହିଛି ।