ଭୁବନେଶ୍ୱର: ଆଜିଠାରୁ ଭୁବନେଶ୍ୱରରେ ଦୁଇ ଦିନିଆ ଅନୁସୂଚିତ ଜାତି ଏବଂ ଜନଜାତୀ ଜାତୀୟ ସଂସଦୀୟ କମିଟି ସମ୍ମିଳନୀ ଆରମ୍ଭ ହୋଇଛି । ଲୋକସେବା ଭବନରେ ଆୟୋଜିତ ସମ୍ମିଳନୀକୁ ଲୋକସଭା ବାଚସ୍ପତି ଓମ୍ ବିର୍ଲା ଏହାକୁ ଉଦଘାଟନ କରିଛନ୍ତି । ଏସସି/ଏସଟିଙ୍କ ଉତ୍ଥାନ ନ ହେବା ଯାଏଁ ରାଜ୍ୟର ବିକାଶ ହୋଇପାରିବ ନାହିଁ ବୋଲି ନିଜ ସମ୍ବୋଧନରେ କହିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ।
ମୁଖ୍ୟମନ୍ତ୍ରୀ ଚରଣ ମାଝୀ ଏଥିରେ ଅଭିଭାଷଣ ରଖି ଦିଲ୍ଲୀରୁ ପ୍ରଥମ ଥର ବାହାରେ ଏବଂ ପ୍ରଥମ ଥରରେ ଓଡ଼ିଶାକୁ ବାଛିଥିବାରୁ ଲୋକସଭା ବାଚସ୍ପତିଙ୍କୁ ଧନ୍ୟବାଦ ଜଣାଇଛନ୍ତି । ଜଣେ ଆଦିବାସୀ ଭାବରେ ଏହି ସଭାକୁ ସମ୍ବୋଧନ କରୁଥିବାରୁ ସେ ଗର୍ବିତ । ଦେଶର ବିକାଶ ପାଇଁ ଜନଜାତିଙ୍କ ବିକାଶ ନିତ୍ୟାନ୍ତ ଜରୁରୀ । ଓଡ଼ିଶା ଜନସଂଖ୍ୟାର ୪୦% ହେଉଛନ୍ତି ଆଦିବାସୀ ଓ ଦଳିତ । ଏଥିରୁ ୨୩% ଆଦିବାସୀ ଓ ୧୭ ପ୍ରତିଶତ ହେଉଛନ୍ତି ପଛୁଆ ବର୍ଗ । ଓଡ଼ିଶା ବିକାଶର କେନ୍ଦ୍ର ହେଉଛି ଜନଜାତି ସମ୍ପ୍ରଦାୟର ବିକାଶ । ମୁଖ୍ୟମନ୍ତ୍ରୀ ନିକଟରେ ନିଟ୍ ପାସ କରିଥିବା ଦିଦାୟୀ ଆଦିବାସୀ ଝିଅଙ୍କ ସମ୍ପର୍କରେ ମଧ୍ୟ କହିଛନ୍ତି । ଆମର ବର୍ତ୍ତମାନ ଭଲ ଅଛି, ଭବିଷ୍ୟତ ଆହୁରି ଭଲ ରହିବ, ସେ ଆଶାବ୍ୟକ୍ତ କରିଛନ୍ତି । ଦେଶ ସମସ୍ତ ଦିଗରୁ ଆଗକୁ ବଢ଼ୁଛି ।
ଓଡିଶାର ୪୦ ପ୍ରତିଶତ ଜନସାଧାରଣ ଦଳିତ ଓ ଜନଜାତି ବର୍ଗର ପ୍ରତିନିଧିତ୍ୱ କରନ୍ତି ବୋଲି ପ୍ରକାଶ କରି ମୁଖ୍ୟମନ୍ତ୍ରୀ ସେମାନଙ୍କ ବିକାଶ ପାଇଁ ହୋଇଥିବା ବିଭିନ୍ନ ଯୋଜନା ସମ୍ପର୍କରେ ଆଲୋକପାତ କରିଥିଲେ। ସେ କହିଥିଲେ ଯେ ବିକାଶ ସହିତ ଆଦିବାସୀ ସଂସ୍କୃତିର ସୁରକ୍ଷା ପାଇଁ ଓଡିଶା ସରକାର ଆଦିବାସୀ ସଂସ୍କୃତି ଓ ଐତିହ୍ୟ ଭବନ ଏବଂ ଆଦିବାସୀ ଭାଷା ପ୍ରତିଷ୍ଠାନ ମଧ୍ୟ ନିର୍ମାଣ କରୁଛନ୍ତି। ଜନଜାତି ଭାଷାରେ ପାଠପଢାଇବା ପାଇଁ ପଦକ୍ଷେପ ନିଆଯାଇଛି ବୋଲି ସେ କହିଥିଲେ। ମୁଖ୍ୟମନ୍ତ୍ରୀ କହିଥିଲେ ଯେ ଏହି ସମ୍ମିଳନୀ ସବୁ ଦୃଷ୍ଟିରୁ ଏକ ଐତିହାସିକ ସମ୍ମିଳନୀ ହେବ। ଏହି ସମ୍ମିଳନୀର ମତାମତକୁ ନେଇ ନୂଆ ନୂଆ ନୀତି ଓ କାର୍ଯ୍ୟକ୍ରମ ପ୍ରସ୍ତୁତ କରାଯିବ । ଅନୁସୂଚିତ ଜାତି ଓ ଜନଜାତି ବର୍ଗର ଲୋକ ମୁଖ୍ୟସ୍ରୋତରେ ସାମିଲ ହୋଇ ସମୃଦ୍ଧ ଓଡିଶା ଓ ବିକଶିତ ଭାରତ ଗଠନରେ ଗୁରୁତ୍ୱପୂର୍ଣ୍ଣ ଅବଦାନ ରଖିବେ ବୋଲି କହିଥିଲେ।
ମୁଖ୍ୟମନ୍ତ୍ରୀ ଆହୁରି କହିଛନ୍ତି, ସ୍ୱାଧୀନତା ପରେ ଭାରତ ଗଣତନ୍ତ୍ରକୁ ବାଛିଥିଲା । ଆମର ପୂର୍ବ ପୁରୁଷ ବହୁତ ବିଚାର ବିମର୍ଶ କରି ବାବା ସାହେବ ଆମ୍ବେଦକରଙ୍କ ନେତୃତ୍ୱରେ ସାମ୍ବିଧାନିକ ବ୍ୟବସ୍ଥା ଆଣିଥିଲେ । ଆଜି ପଲ୍ଲୀଠୁ ନେଇ ଦିଲ୍ଲୀ ଯାଏଁ ସାମ୍ବିଧାନିକ ବିଧିବ୍ୟବସ୍ଥାରେ ବାନ୍ଧି ହୋଇରହିଛି । ସ୍ୱାଧୀନତା ପରେ ଦେଶ ବିଭିନ୍ନ ସମସ୍ୟା ଯଥା ସାମାଜିକ, ଆର୍ଥିକ ଏବଂ ରାଜନୈତିକ ସ୍ତରରେ ସମସ୍ୟାର ସମ୍ମୁଖୀନ ହୋଇଥିଲା । ଯେଉଁଥିରେ ଅନୁସୂଚିତ ଜାତି ଏବଂ ଜନଜାତି ପ୍ରମୁଖ ଥିଲା । କିନ୍ତୁ ବିଡ଼ମ୍ବନାର ବିଷୟ ହଜାର ହଜାର ବର୍ଷ ଧରି ଆଦିବାସୀ ସମ୍ପ୍ରଦାୟ ଉତ୍ପୀଡ଼ନ ସହିଥିଲା । ଏହି ସମ୍ପ୍ରଦାୟର ଲୋକ ଅସ୍ପୃଶ୍ୟତାର ଶିକାର ହୋଇଥିଲେ, କିନ୍ତୁ ସମ୍ବିଧାନ ଆମକୁ ଅଧିକାର ଦେଲା । ଆମେ ସଶକ୍ତୀକରଣ ନହେଲେ ଯେତେ ଯୋଜନା କଲେ ବି ସୁଫଳ ମିଳିବନି । ଏସସି/ଏସଟିଙ୍କ ଉତ୍ଥାନ ନ ହେବା ଯାଏଁ ରାଜ୍ୟର ବିକାଶ ହୋଇପାରିବ ନାହିଁ ବୋଲି ମୁଖ୍ୟମନ୍ତ୍ରୀ କହିଛନ୍ତି ।