ଯାଜପୁର: ଗଣେଶ ଭଷାଣିରେ ଅଘଟଣ । ପୋଖରୀରେ ବୁଡି ଜଣେ ଅଷ୍ଟମ ଶ୍ରେଣୀ ଛାତ୍ରର ମୃତ୍ୟୁ ହୋଇଛି । ଏପରି ଏକ ଅଭାବନୀୟ ଘଟଣା ଯାଜପୁର ଜିଲ୍ଲା ପାଣିକୋଇଲି ଥାନା ରଙ୍ଗରଙ୍ଗା ଗାଁରେ ଘଟିଛି । ମୃତ ଛାତ୍ର ସତ୍ୟ ପ୍ରକାଶ ସାହୁ ।
ସୂଚନା ଅନୁସାରେ, ରଙ୍ଗରଙ୍ଗା ଗାଁର ହାଇସ୍କୁଲରେ ଅଷ୍ଟମ ଶ୍ରେଣୀରେ ପଢ଼ୁଥିବା ଛାତ୍ର ସତ୍ୟ ପ୍ରକାଶ ସାହୁ ଗଣେଶ ମୂର୍ତ୍ତି ବିସର୍ଜନ ପାଇଁ ପୋଖରୀକୁ ଯାଇଥିଲେ । ଏହି ସମୟରେ ଅସାବଧାନତା କାରଣରୁ ପୋଖରୀରେ ବୁଡି ଯାଇଥିଲେ । ସତ୍ୟ ପ୍ରକାଶଙ୍କୁ ନ ପାଇ ପୋଖରୀରେ ଖୋଜାଖୋଜି କରାଯାଇଥିଲା । ଏହା ପରେ ତାଙ୍କୁ ଉଦ୍ଧାର କରାଯାଇ ଚିକିତ୍ସା ପାଇଁ ବୈତରଣୀ ରୋଡ ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ । ଅଧିକ ଚିକିତ୍ସା ପାଇଁ ତାଙ୍କୁ ଯାଜପୁର ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ । କିନ୍ତୁ ଡାକ୍ତର ସେଠାରେ ତାଙ୍କୁ ମୃତ ବୋଲି ଘୋଷଣା କରିଥିଲେ । ଏହି ଘଟଣା ପରେ ପରିବାରରେ ଶୋକରେ ଛାୟା ଖେଳିଯାଇଛି । ମେଡିକାଲ ପରିସର କାନ୍ଦ ବୋବାଳୀରେ ଫାଟି ପଡୁଛି ।