କେନ୍ଦ୍ରାପଡ଼ା ଜିଲ୍ଲାପାଳଙ୍କ କାର୍ଯ୍ୟାଳୟ ପରିସରରୁ ଆସିଛି ଏକ ଚାଞ୍ଚଲ୍ୟକର ଖବର। ଦିନ ଦ୍ୱିପ୍ରହରରେ କଲେକ୍ଟରେଟ୍ ଭିତରୁ ଜଣେ ଯୁବକଙ୍କ ଝୁଲନ୍ତା ମୃତଦେହ ଉଦ୍ଧାର ହେବା ପରେ ସମଗ୍ର ଅଞ୍ଚଳରେ ଚର୍ଚ୍ଚା ସୃଷ୍ଟି ହୋଇଛି।

ଶୁକ୍ରବାର ଅପରାହ୍ନ ପ୍ରାୟ ସାଢେ ୩ଟା ସମୟରେ ଜିଲ୍ଲାପାଳଙ୍କ କାର୍ଯ୍ୟାଳୟର ପ୍ରଥମ ମହଲାକୁ ଯିବା ପାଇଁ ଥିବା ଷ୍ଟିଲ୍ ସିଡ଼ି ବାଡ଼ରେ ଜଣେ ଯୁବକ ଗାମୁଛା ସାହାଯ୍ୟରେ ଝୁଲୁଥିବା ଅବସ୍ଥାରେ ଠାବ ହୋଇଥିଲେ। ଏହା ଦେଖି କାର୍ଯ୍ୟାଳୟ କର୍ମଚାରୀ ଓ ସ୍ଥାନୀୟ ଲୋକଙ୍କ ମଧ୍ୟରେ ଖେଳିଯାଇଥିଲା ଆତଙ୍କ।

ପରେ ଖବର ପାଇ କେନ୍ଦ୍ରାପଡ଼ା ଟାଉନ୍ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ଜବତ କରିଥିଲା। ପ୍ରାଥମିକ ତଦନ୍ତରୁ ମୃତ ଯୁବକ ଡେରାବିଶ ବ୍ଲକ୍ ଅନ୍ତର୍ଗତ ରାଏତୁଣ୍ଡି ଗାଁର ଶ୍ରୀଚନ୍ଦନ ଦାସ ବୋଲି ଜଣାପଡ଼ିଛି। ସେ ପେସାରେ ଜଣେ ଡ୍ରାଇଭର ଥିବା ବେଳେ କେନ୍ଦ୍ରାପଡ଼ା ସହରର ମଢ଼ିଆଳ ଅଞ୍ଚଳରେ ଭଡ଼ା ଘରେ ରହୁଥିଲେ।ସକାଳୁଆ ଅଫିସ୍ ହୋଇଥିବାରୁ ଦିନ ଗୋଟାଏ ବେଳେ କାର୍ଯ୍ୟାଳୟ ଛୁଟି ହୋଇଯାଇଥିଲା। ତେଣୁ ଅଫିସ୍ ଖାଲି ହେବା ପରେ ଯୁବକ ଜଣକ କଲେକ୍ଟରେଟ୍ ଭିତରକୁ ପ୍ରବେଶ କରିଥିବା ଅନୁମାନ କରୁଛି ପୋଲିସ।

ଘଟଣାସ୍ଥଳରୁ ପୋଲିସ ଏକ ଛୋଟ ମୋବାଇଲ୍ ଫୋନ୍ ମଧ୍ୟ ଜବତ କରିଛି। ତେବେ ଏହା ଆତ୍ମହତ୍ୟା ନା ଏହା ପଛରେ ଅନ୍ୟ କିଛି କାରଣ ରହିଛି, ସେନେଇ ତଦନ୍ତ ଜାରି ରହିଛି। କାହିଁକି ଶ୍ରୀଚନ୍ଦନ ଏଭଳି ଚରମ ନିଷ୍ପତ୍ତି ନେଲେ ଓ କଲେକ୍ଟରେଟ୍ ପରି ଏକ ସରକାରୀ କାର୍ଯ୍ୟାଳୟକୁ କାହିଁକି ବାଛିଲେ, ତାହା ଏବେ ସବୁଠାରୁ ବଡ଼ ପ୍ରଶ୍ନ ହୋଇ ରହିଛି। ପୋଷ୍ଟମର୍ଟମ୍ ରିପୋର୍ଟ ଓ ପୋଲିସ ତଦନ୍ତ ପରେ ଘଟଣାର ପ୍ରକୃତ କାରଣ ସାମ୍ନାକୁ ଆସିବ ବୋଲି ଆଶା କରାଯାଉଛି।